प्रदेश २ मा प्रचण्डकै तीन गुटको झगडा, नेतृत्व छान्न साह, यादव र पोखरेलबीच लफडा

प्रदेश २ मा प्रचण्डकै तीन गुटको झगडा, नेतृत्व छान्न साह, यादव र पोखरेलबीच लफडा

A+ A A-

नेकपा माओवादी केन्द्रको प्रदेश २ मा आन्तरिक किचलो बढ्दा प्रदेश सम्मेलन नै सम्पन्न हुन समस्या भएको छ । माओवादी केन्द्रको प्रदेश २ मा तीनवटा गुट देखिएपछि समस्या भएको हो । माओवादी नेताहरूका अनुसार, पहिला प्रदेश २ मा दुईवटा गुट थिए ।

अहिले मातृका यादव, गणेश साह र गिरिराजमणि पोखरेलले एक-एकवटा गुटको नेतृत्व गरेपछि प्रदेशसभाको बन्दसत्र सुरु हुनै समस्या भएको थियो । प्रचण्डले २५ मंसिरमा एकसाथ ९ वटा प्रदेशको सम्मेलनको उद्घाटन गरेका थिए ।

तर, प्रदेश २ मा भने यी तीनवटा गुटको झगडाका कारण ३ पुसमा बन्दसत्र आयोजना गरिएको थियो । त्यसदिन पनि समस्या भएपछि ४ मंसिरमा बन्दसत्र सकियो । तर, प्रदेश कमिटीको संख्या तय भए पनि पदाधिकारी र नेताहरूको नाम टुंगो लगाउन सकेको छैन ।

माओवादीका एक नेताको भनाइमा प्रदेश २ का इञ्चार्ज गणेश साहको नेतृत्वमा एउटा समूह निर्माण भएको छ । प्रचण्डसँग निकट यो समूहलाई काउन्टर भने मातृका यादव नेतृत्वको गुटले गरिरहेको छ । विगतदेखि नै प्रचण्डसँग रहेको तर नारायणकाजी श्रेष्ठसँग जोडिएका नेता गिरिराजमणि पोखरेलले अर्का गुटको नेतृत्व गरेका छन् । प्रदेश २ मा माओवादीको केन्द्रीय कमिटीमा २५ जना सदस्य छन् । पोखरेल गुटमा रहेका राजु खड्कासहितका केही नेताले छोडेका छन् ।

पोखरेल समूहमा पूर्वजनमोर्चा पृष्ठभूमिका नेताहरू विश्वनाथप्रसाद साह र प्रल्हाद बुढाथोकीसहितका नेताहरू सक्रिय छन् । त्यही समूहका खड्का भने गणेश साहको गुटमा समाहित भएका छन् । त्यसैले अहिले पोखरेल समूह कमजोर बन्न थालेको विश्लेषण हुन थालेको छ ।

त्यसैकारण बन्दसत्रका बेला सर्लाहीको लालबन्दीमा बसेर नेता पोखरेलले आफ्नो समूहको रणनीति बनाएका थिए । उनी बन्दसत्रमा भने सहभागी भएनन् । त्यसो त, बन्दसत्रमा मातृका यादव पनि सहभागी भएका थिएनन् ।

नेकपा संयुक्तबाट माओवादीमा आएका गणेश साह अहिले प्रदेश २ को इञ्चार्जसमेत छन् । विगतमा उनी प्रदेश २ मा गुट बनाउने अवस्थामा थिएनन् । तर, अहिले साह प्रचण्डको सहयोगमा गुट बनाइरहेका छन् । र, उनको गुट भने मातृका यादवलाई काउन्टर दिने खालको छ ।

साहको नेतृत्वमा माओवादी नेताहरू महेन्द्र पासवान, अजयशंकर नायक, रामेश्वर राय यादव, युवराज भट्टराईलगायतका नेताहरू रहेका छन् । उता मातृका यादवको गुटमा भने जगत यादव र भरत साहलगायतका नेताहरू रहेको बताइएको छ ।

माअ‍ोवादी केन्द्रमा प्रभु साहले नेतृत्व गर्ने समूहका केही नेताहरू साहसँगै एमालेमा प्रवेश गरेका कारण उनको समूहका केही नेताहरू पोखरेलको गुटमा जोडिएका छन् ।

यी गुटको झगडाले नेतृत्व र पदाधिकारी चयनमा समस्या आएकाले प्रदेश २ मा २६७ सदस्यीय प्रदेश कमिटी बनाउने मात्रै सहमति जुटेको छ । नेताहरूको नाम टुंगिएको छैन । यी तीन गुटबीच सहमति जुटेपछि मात्रै नेताहरूको नाम सार्वजनिक हुनेछ । अहिले बन्दसत्रले भने जिल्लागत संख्या भने टुंगो लगाएको छ ।

अहिले लगाएको भागबण्डा अनुसार सप्तरीलाई २९, सिराहालाई ३९, धनुषालाई ३४, महोत्तरीलाई ३७, सर्लाहीलाई ३४, रौतहटलाई ४०, बारालाई ३० र पर्सालाई २४ जनाको नाम टुंगो लगाएर पठाउन भनेको छ । माओवादीका स्थायी कमिटी सदस्य गिरिराजमणि पोखरेलले प्रदेश २ को समस्याबारे टिप्पणी गर्न रुचाएनन् ।

शिलापत्रसँगको कुराकानीमा पोखरेलले माओवादी सांगठनिक संरचनामा जान थालेकोलाई नै महत्त्वपूर्ण मान्नुपर्ने उल्लेख गरे । प्रदेश २ को विवादको विषयमा कुरा गर्दा आफू स्कूल विभागमा भएकाले धेरै जानकारी नभएको दाबी गरे ।

प्रकाशित मिति: मंगलबार, पुस ६, २०७८ १३:५४