विधान र सुविधाजनक बहुमतले कांग्रेसमा झन् शक्तिशाली बन्दै देउवा

A+ A A-

नेपाली कांग्रेसका सभापति शेरबहादुर देउवा पार्टीको विधान र निर्वाचित कमिटीमा आफ्नो पक्षमा बहुमत रहेकाले शक्तिशाली सभापति हुने भएका छन् । कांग्रेस सामूहिक नेतृत्वको प्रणालीमा अघि बढेको भए पनि सभापतिको कार्यसम्पादनमा अवरोध नआउने गरी सभापतिलाई विधानले सुविधाजनक अधिकार दिएको छ ।

विगतमा सभापतिको निर्णय केन्द्रीय समितिबाट अनुमोदनको व्यवस्था भए पनि हालको विधानले ३३ प्रतिशत केन्द्रीय सदस्य मनोनयन, कोषाध्यक्ष, विभागका पदाधिकारी सभापतिले मनोनीत गर्दा अब केन्द्रीय समितिबाट अनुमोदन अनिवार्य छैन । 'केन्द्रीय समितिको समीकरणका कारण सभापतिको निर्णय कार्यान्वयनमा संकट पर्ने अवस्थालाई अन्त्य गर्ने उद्देश्यले सहमतिमै सभापतिको निर्णयलाई अनुमोदन गराउन नपर्ने व्यवस्था उल्लेख गरिएको हो,' नेता विमलेन्द्र निधिले भने ।

कांग्रेसका दुई महामन्त्रीलाई जिम्मेवारी दिने अधिकार पनि सभापतिलाई छ । महामन्त्रीका अधिकांश काम, कर्तव्य र अधिकार सभापतिको निर्देशन अनुसार गर्ने र सभापतिलाई सघाउने लेखिएको छ । सभापतिको अधिकारबारे विधानको धारा २५ मा भनिएको छ, 'केन्द्रीय कार्यसमितिका पदाधिकारीको कार्यविभाजन गर्ने, केन्द्रीय विभाग एवं निकायका प्रमुख, उपप्रमुख, सचिव र सदस्यको नियुक्ति, मनोनयन र हेरफेर गर्ने, केन्द्रीय कार्यालयका लागि आवश्यक कर्मचारीको नियुक्ति, मनोनयन वा हेरफेर गर्ने अधिकार सभापतिमा निहीत छ । पार्टीको निकाय, पदाधिकारी वा सदस्यका सम्बन्धमा परेका उजुरी र गतिविधिका सम्बन्धमा छानविन समिति गठन गर्ने अधिकार पनि सभापतिलाई रहेको छ ।'

पदाधिकारी र केन्द्रीय कमिटीमा देउवाको बहुमत

१४औँ महाधिवेशनबाट निर्वाचित पदाधिकारी र केन्द्रीय समितिमा देउवाको सुविधाजनक बहुमत छ । निर्वाचित १३ पदाधिकारीमध्ये ८ जना सभापति देउवा पक्षका छन् । चार जना शेखर कोइराला पक्ष र एक जना प्रकाशमान सिंह पक्षका छन् । पदाधिकारीमा निर्वाचितमध्ये उपसभापति पूर्णबहादुर खड्का, सहमहामन्त्रीमा भीष्मराज आङ्दाम्बे, किशोर सिंह राठौर, फर्मुल्लाह मन्सुर, उमाकान्त चौधरी, महालक्ष्मी उपाध्याय डिना र महेन्द्र यादव देउवा पक्षका हुन् ।

खुलातर्फ निर्वाचित ३५ केन्द्रीय सदस्यमध्ये २५ जना देउवा पक्षका छन् । केन्द्रीय सदस्यमा निर्वाचितमध्ये एनपी साउद, बालकृष्ण खाँण, उदय शमशेर राणा, रामहरि खतिवडा, ज्ञानेन्द्रबहादुर कार्की, रमेश लेखक, शंकर भण्डारी, जिपछिरिङ लामा, जितजंग बस्नेत, गोपालमान श्रेष्ठ, मोहनबहादुर बस्नेत, सुनिल बहादुर थापा देउवा पक्षका हुन् । यस्तै, नैनसिंह महर, गोविन्द भट्टराई, कुन्दनराज काफ्ले, सुरेन्द्रराज पाण्डे, पद्मनारायण चौधरी, राजीव ढुंगाना, गुरु बराल, मदनबहादुर अमात्य, गणेश लामा, उमेशजंग रायमाझी, मोहन आचार्य, गोपाल दहित र कृष्णकिशोर घिमिरे पनि देउवा प्यानलबाटै निर्वाचित भएका हुन् ।

खुला केन्द्रीय सदस्यमा १७ नयाँ र १८ पुरानै अनुहार

कांग्रेसको केन्द्रीय सदस्यमा १७ नयाँ अनुहारले डेब्यु गरेका छन् । पहिलोपटक केन्द्रीय सदस्य हुनेमा उदय शमशेर राणा, रामहरि खतिवडा, मोहन आचार्य, अजयबाबु सिवाकोटी, उमेशजंग रायमाझी, गोविन्दराज पोखरेल रहेका छन् । यस्तै जितजंग बस्नेत, नैनसिंह महर, कुन्दन काफ्ले, मदनबहादुर अमात्य, राजिव ढुंगाना, कृष्णकुमार घिमिरे, सञ्जयकुमार गौतम, गुरु बराल, दिनेश कोइराला, जिपछिरिङ लामा र गणेश लामाले पनि केन्द्रीय समितिमा डेब्यु गरेका हुन् ।

केन्द्रीय समितिमा अटाएका डा. शशांक कोइराला, गोपालमान श्रेष्ठ, डा. रामशरण महत, बलबहादुर केसी, अर्जुननरसिंह केसी, बालकृष्ण खाँण, एनपी साउद, रमेश लेखक, दिलेन्द्र बडु, सुनिल बहादुर थापा, गोपाल दहित, शंकर भण्डारी, मोहन बहादुर बस्नेत, ज्ञानेन्द्र बहादुर कार्की, गोविन्द भट्टराई, दीपक गिरी, सुरेन्द्रराज पाण्डे र पद्मनारायण चौधरी पुरानै अनुहार हुन् ।

प्रकाशित मिति: सोमबार, पुस ५, २०७८ १७:५५