ओली अहिले पनि प्रतिगमनकै बाटोमा छन् : प्रचण्ड

A+ A A-

माओवादी केन्द्रका अध्यक्ष पुष्पकमल दाहाल 'प्रचण्ड'ले एमाले अध्यक्ष केपी शर्मा ओली अहिले पनि प्रतिगमनकै बाटोमा रहेको आरोप लगाएका छन् ।

समाजवादी प्रेस संगठन नेपालले सोमबार काठमाडौंमा आयोजना गरेको प्रतिगमनविरुद्धको कार्यक्रममा प्रचण्डले एमालेले संसद अवरुद्ध गरिरहेकाले ओली अहिले पनि प्रतिगमनकै बाटोमा रहेको पुष्टि भएको बताए ।

'प्रतिगमनकै निरन्तरतामा उहाँ (ओली) हुनुहुन्छ । उहाँले जस्ता शक्तिहरूसँग सहकार्य गर्ने कोशिस गरिरहनु भएको छ, ती सबै प्रतिगमनका पक्षधरहरूसँग नै गरिरहनुभएको छ,' प्रचण्डले भने ।

‘अहिले पनि केपीजी माधवजी देखिएपछि त्यहाँ उपस्थित नहुने कसो अस्ति नेपाली कांग्रेसको महाधिवेशनमा आउनुहुन्न की भनेको आउनु भयो । नत्र माधवजी कहीँ जाने भन्ने भयो भने त्यहाँ उहाँ नजाने,' प्रचण्डले भने, 'योभन्दा अराजनैतिक, अलोकतान्त्रिक र निरंकुश चरित्र अरु केही हुन्छ ?'

अदालतले ह्वीप नलाग्ने फैसला गरिसकेको, सभामुखले आफूले लिनुपर्ने निर्णय १३ दिनमै लिएको र कतै पनि संविधानको मर्म र भावनाविपरीत नभएको दाबी गर्दै प्रचण्डले संसद अवरुद्ध गर्नुको औचित्य प्रतिगमन नै रहेको दाबी गरे ।

'उहाँको अघि यो त प्रस्ट नै छ । निर्वाचन आयोगले मान्यता दिएको छ । अदालतले निर्णय गरिदिएको छ । संसदले स्वीकार गरेको छ । ५ दलीय गठबन्धन बनेर सरकार चलिरहेको छ । त्यो कुरालाई अस्वीकार गर्ने जो भनिएको छ यसबाट पनि उहाँको प्रवृत्ति भनेको बिल्कुल लोकतन्त्र बिरोधी निरंकुश हो भन्ने कुरा पस्ट नै देखिन्छ,’ प्रचण्डले भने ।

संसद अवरोध गरिरहनुको कारण गठबन्धन तोड्नु रहेको उनको दाबी छ । एमाले अध्यक्ष ओलीले गठबन्धन तोडाउनका लागि कांग्रेसलाई एकलौटी सरकार बन्न दिने र एमालेले त्यसमा सहयोग गर्ने साथै एमसीसी पास गराउन सहयोग गर्ने भनेर खुलेआम तर्क दिइरहेको दाबी समेत गरे ।

प्रकाशित मिति: सोमबार, पुस ५, २०७८ १७:३१