आईएमई लाइफको बिजनेस एक्सिलेन्स अवार्ड २०२१ सम्पन्न, उत्कृष्ट कार्य गर्नेहरू पुरस्कृत

आईएमई लाइफको बिजनेस एक्सिलेन्स अवार्ड २०२१ सम्पन्न, उत्कृष्ट कार्य गर्नेहरू पुरस्कृत

A+ A A-

आईएमई लाइफ इन्स्योरेन्सले 'बिजनेस एक्सिलेन्स अवार्ड २०२१' शनिबार सम्पन्न गरेको छ । कम्पनीले वार्षिक रूपमा आयोजना गर्दै आएको उक्त कार्यक्रम ‘ह्याण्ड इन ह्याण्ड फर एन एक्सिलेन्ट फ्युचर’ नारासहित होटल याक एण्ड यतीमा सम्पन्न गरेको हो ।

कार्यक्रममा देशभर रहेका २४ हजार ५ सय अभिकर्ताहरूमध्ये आर्थिक वर्ष २०७७/०७८ मा उत्कृष्ट कार्य गरी आईएमई लाइफ इन्स्योरेन्सको कर्पोरेट क्लबमा पर्न सफल २ सय जना क्लब दाबेदार, उत्कृष्ट ८ एजेन्सी म्यानेजर, ३२ एमडीआरटीमा योग्य अभिकर्ता, अभिकर्ता, विभिन्न विधाद्वारा चुनिएका उत्कृष्ट शाखा र कर्मचारीहरूलाई सम्मान गरियो ।

कार्यक्रममा आईएमई ग्रुपका म्यानेजिङ डाइरेक्टर हेमराज ढकाल, कम्पनी अध्यक्ष डा. रामहरि अर्याल र सञ्चालक समितिका सदस्यहरू, ब्राण्ड एम्बास्डर मनीषा कोइराला र ३ सयभन्दा बढी अभिकर्ताको उपस्थिति थियो ।

आईएमई लाइफ इन्स्योरेन्स कम्पनीका अभिकर्ताहरूको क्षमता अभिवृद्धि गर्ने, उत्प्रेरणा जगाउने र हौसला प्रदान गर्ने उद्देश्यले सो कार्यक्रमको आयोजना गरिएको कम्पनीले जनाएको छ । कार्यक्रममा अन्तर्राष्ट्रिय प्रशिक्षकद्वारा एमडीआरटीलाई केन्द्रबिन्दु बनाई प्रशिक्षण दिइएको थियो ।

आईएमई लाइफ इन्स्योरेन्स कम्पनीका प्रमुख कार्यकारी अधिकृत कवि फुयाँलले यस पेसालाई सम्मानित बनाउन र उत्कृष्टलाई पुरस्कृत गर्ने कार्यमा कम्पनी सदैव तयार रहेको बताउँदै यस्ता कार्यक्रमले व्यावसायिक क्षमता वृद्धिमा थप सहयोग पुग्ने विश्वास व्यक्त गरे ।

उनले कम्पनीले आफ्नो सेवालाई समयसापेक्ष परिमार्जन गर्दै थप उत्कृष्ट बनाई व्यावसायिक उपलब्धि हासिल गर्ने कुरामा आफू विश्वस्त रहेको बताए ।

त्यस्तै, कम्पनीका अध्यक्ष डा रामहरि अर्यालले बीमा अभिकर्ता सम्मानजनक पेसा भएको र यसले राष्ट्रका लागि योगदान पुर्‍याएको बताए । सञ्चालक अश्विनीकुमार ठाकुरले कम्पनीलाई आजको अवस्थामा ल्याइपुर्‍याउन प्रत्यक्ष अप्रत्यक्ष रूपमा सहयोग पुर्‍याउने सम्बन्धित सबैप्रति कृतज्ञता व्यक्त गरे ।