एमसीसीको बहानामा गठबन्धन फुटाउने खतरा छ : बाबुराम भट्टराई

A+ A A-

जनता समाजवादी पार्टीका संघीय परिषद् अध्यक्ष डा. बाबुराम भट्टराईले एमसीसीको बाहानामा सत्ता गठबन्धनलाई तोड्ने खतरा रहेको बताएका छन् ।

सोमबार नेकपा(एकीकृत समाजवादी) निकट समाजवादी प्रेस संगठन नेपालले अघिल्लो वर्ष प्रतिनिधिसभा विघटन भएको पुष ५ गतेको दिनलाई कालो दिनको रुपमा स्मरण गर्दै आयोजना गरेको कार्यक्रममा भट्टराईले एमसीसीको बाहानामा सत्ता गठबन्धनलाई तोड्ने खतरा रहेको बताए ।

'एमसीसीको जुन एउटा मुद्दा छ । यस्ता मुद्दामा हामीले राष्ट्रिय सहमति, कमसेकम गठबन्धनका घटकहरूका बीचमा एउटा सहमति जुटाएर हामी अगाडि बढ्न सकेनौँ भने यही बाहानामा भित्री र बाहिरी शक्तिहरूले खेलेर गठबन्धन तोडिदिने अनि त्यसपछि फेरि अर्को ढंगले प्रतिगमन अगाडि आउने खतरा छ,' भट्टराईले भने ।

देशी, विदेशी शक्ति लागेर गठबन्धन भत्काउन सक्ने भन्दै यसतर्फ सबै सचेत हुनुपर्नेमा उनले जोड दिए । एमसीसीको सम्बन्धमा सत्तारुढ गठबन्धनका बीचमा सहमति जुटाएर मात्रै अघि बढ्नुपर्ने उनको भनाइ थियो । गठबन्धन भत्काएर नयाँ ढंगको प्रतिगमन आउने खतरा रहेको उनले बताए ।

‘गठबन्धनलाई जसरी भत्काउने प्रयत्न भित्र-बाहिरबाट भइरहेको छ, त्यो भत्कने र फेरि नयाँ ढंगले प्रतिगमन अगाडि आउने खतरा छ,' भट्टराईले भने, 'यो अनुमान मात्रै होइन । खासगरी कतिपय मुद्धाहरु, राजनीतिक, आर्थिक, सामाजिक, सांस्कृतिक मुद्धाहरू अगाडि छन् ।'

प्रतिगमनकारी शक्तिलाई निस्तेज पार्न आगामी निर्वाचनसम्मै गठबन्धनलाई कायम राख्नुपर्ने भट्टराईको भनाइ थियो । प्रतिगमनकारीलाई टाउको उठाउनै दिनु नहुने उनको तर्क छ ।

गठबन्धनका दलहरुबीच आपसी प्रतिस्पर्धा पनि गर्दै प्रतिगमनका विरुद्ध एकढिक्का हुनुपर्नेमा भट्टराईले जोड दिए । ‘गठबन्धनलाई हामीले बचाउनै पर्छ । जबसम्म यो प्रतिगमनकारी शक्तिलाई निस्तोज पार्न सकिँदैन, कमसेकम आगामी निर्वाचनसम्म यो गठबन्धनलाई बचाएर लानैपर्छ,' उनले भने ।

प्रकाशित मिति: सोमबार, पुस ५, २०७८ १७:१५