आफ्नै हाकिमविरुद्ध छद्‌म नाममा उजुरी दिने इन्स्पेक्टर निलम्बित

A+ A A-

प्रहरी प्रधान कार्यालयले एक जना प्रहरी निरीक्षक (इन्स्पेक्टर) लाई निलम्बन गरेको छ । अख्तियार दुरुपयोग अनुसन्धान आयोग बर्दिबासमा कार्यरत प्रहरी निरीक्षक राजुप्रसाद कुर्मी निलम्बनमा परेका हुन् ।

केन्द्रीय प्रहरी प्रवक्ता वरिष्ठ प्रहरी उपरीक्षक (एसएसपी) वसन्तबहादुर कुँवरले कुर्मी निलम्बनमा परेको पुष्टि गरे । ‘प्रहरी आचरणविपरीत काम गरेको खुलेपछि हामीले कुर्मीलाई निलम्बन गरेका हौँ,’ एसएसपी कुँवरले भने ।

कुर्मीको कारबाही प्रक्रिया भने रोचक छ । प्रहरी स्रोतका अनुुसार कुर्मीले प्रदेश– २ प्रहरी प्रमुखदेखि जिल्लामा खटिएका प्रहरी प्रमुख र घुमुवा प्रहरीले अवैध रूपमा रकम असुली गर्ने र त्यो रकम प्रहरी प्रधान कार्यालयसम्मै पुग्ने भन्दै प्रहरी प्रधान कार्यालयको गुनासो शाखादेखि गृह मन्त्रालयसम्म छद्म नाममा उजुरी दिने गरेका थिए ।

उनको उजुरीले प्रधान कार्यालयको टाउको दुखाइको विषय नै बनेको थियो । केही महिनाअघि जिल्ला प्रहरी कार्यालय सर्लाहीमा कार्यरत प्रहरी सहायक निरीक्षक (असई) मनोज यादवमाथि अवैध रूपमा रकम असुलीको आरोप लागेको थियो ।

सोही आरोपमा प्रहरी प्रधान कार्यालयले यावदलाई प्रहरी प्रधान कार्यालय नै तानेर सोधपुछ गरेको थियो । उनीमाथि आरोप पुष्टि नभएपछि प्रधान कार्यालयले पुनः यादवलाई सर्लाही नै पठायो ।

यावदलाई सर्लाही पठाएपछि कुर्मीले प्रधान कार्यालयले नै असुली धन्दामा यादवलाई पठाएको उजुरी गृह मन्त्रालयसम्म दिए । गृह मन्त्रालय पठाएको उजुरी र प्रहरी प्रधान कार्यालयलाई दिएको उजुरीको प्रकृति एउटै थियो ।

पछि प्रहरी प्रधान कार्यालयले विभिन्न निकायमा उजुरी दिने संगठनभित्रकै प्रहरी कर्मचारी भएको आशंका गर्‍यो । त्यो आशंका कुर्मीमाथि नै थियो ।

प्रधान कार्यालयले कुर्मीलाई सोधपुछ गर्‍यो । तर, उनले प्रधान कार्यालयले लगाएको आरोप स्वीकार गरेनन् । पछि कुर्मीलाई लिखित स्पष्टीकरण दिन निर्देशन गर्‍यो ।

कुर्मीले दिएको स्पष्टीकरण र प्रहरी प्रधान कार्यालयदेखि गृह मन्त्रालयसम्मले दिएको उजुरी एउटै व्यक्तिले लेखेको प्रहरीको विधिविज्ञान प्रयोगशालाले पुष्टि गरेपछि छद्म नामबाट प्रहरी संगठनविरुद्ध उजुरी दिने कुर्मी नै भएको पुष्टि भएको हो । सोही पुष्टिपछि उनी निलम्बनमा परेका हुन् ।

प्रहरी प्रधान कार्यालयले निरीक्षक कुर्मीलाई संगठनका कुनै पनि प्रहरी अधिकारीले अवैध क्रियाकलाप गरेको देखे सिधै प्रहरी प्रधान कार्यालयलाई जानकारी गराउन पाउने अधिकार हुँदाहुँदै उच्च प्रहरी अधिकारीको चरित्रहत्या हुने हिसाबले छद्मभेषी रूपबाट संगठनको नाममा उजुरी दिएको आरोपमा निलम्बन गरिएको जनाएको छ ।

प्रकाशित मिति: सोमबार, पुस ५, २०७८ १६:२०