साउदीमा अवैध रूपमा बसेका विदेशी कामदारमाथि धरपकड, एक सातामै समातिए १५ हजार

A+ A A-

साउदीमा गत एक सातामै १५ हजारभन्दा बढी विदेशी कामदार पक्राउ परेका छन् । ९ देखि १५ डिसेम्बरको बीचमा बिनाभिसा अवैध रूपमा लुकीछिपी काम गर्दै बसेका विदेशी कामदार पक्राउ परेको साउदीको स्थानीय सञ्चारमाध्यम साउदी गजेटले जनाएको छ ।

सीमासम्बन्धी कानुन उल्लंघन गरेका र श्रमसम्बन्धी कानुन उल्लंघन गरेका विदेशी कामदारहरूलाई पक्राउ गरिएको साउदीको अध्यागमनलाई उद्धृत गर्दै गजेटले जनाएको छ ।

पक्राउ परेका मध्ये ७ हजार ५ सयभन्दा बढी भिसाको म्याद सकिएर पनि लुकीछिपी बसेका, ५ हजार ७ सयभन्दा बढी सीमा सुरक्षासम्बन्धी कानुन उल्लंघन गरेका र १ हजार ८ सय ५० जना श्रम कानुन उल्लंघनको अभियोगमा पक्राउ परेको गजेटले उल्लेख गरेको छ ।

साउदीको सुरक्षा निकायको संयुक्त अभियानका क्रममा अवैध हैसियतमा बसेका विदेशी कामदार पक्राउ परेको जनाइएको छ ।

साउदीले सन् २०२१ मा करिब १ लाख विदेशी नागरिकलाई पक्राउ गरेको र उनीहरूलाई कानुनी कारबाही तथा स्वदेश फिर्ता गराएको जनाइएको छ । गजेटका अनुसार यसरी पक्राउ परेकामध्ये ८२ हजार ८ सय पुरुष र ८ हजार ७ सय महिला छन् ।

त्यसमध्ये ७९ हजारलाई स्वदेश फिर्तीका लागि सम्बन्धित मुलुकको दूतावासमा जानकारी गराइएको र एकतर्फी यात्रा अनुमतिपत्र बनाएर फर्काइएको थियो ।

साउदी सरकराले यसरी पक्राउ पर्नेहरू तथा अवैधानिक रूपमा बसोबास गरिरहेकाहरूलाई रोजगारी उपलब्ध गराउने वा आवास सुविधा उपलब्ध गराउनेहरूलाई १५ वर्षसम्मको जेलसजाय गर्ने चेतावनी दिँदै आएको छ । यसैगरी, उनीहरूलाई १० लाख रियालसम्म जरिवाना हुन सक्नेसमेत जनाइएको छ ।

प्रकाशित मिति: सोमबार, पुस ५, २०७८ १६:०७