टण्डन प्रकरणमा लापर्वाही गर्ने १५ प्रहरी अधिकारीमाथि हेडक्वार्टरकाे लिखित स्पष्टीकरण

टण्डन प्रकरणमा लापर्वाही गर्ने १५ प्रहरी अधिकारीमाथि हेडक्वार्टरकाे लिखित स्पष्टीकरण

A+ A A-

प्रहरी प्रधान कार्यालयले अपहरण तथा शरीर बन्धक मुद्दाका कुख्यात नाइके अमर टण्डनमाथिको अनुसन्धान नै नगरी म्याद गुजार्ने प्रहरी अधिकारीमाथि लिखित स्पष्टीकरण मागेको छ । प्रहरी प्रधान कार्यालयको कानुन शाखाले लिखित स्पष्टीकरण माग गरेकाे प्रहरी प्रधान कार्यालय स्रोतले जानकारी दियाे ।

रुपन्देही अमुवाका टण्डनले १४ वर्षअघि २९ माघ २०६४ मा बुटवल– ११, मिलन चोकका ६२ वर्षीय टीकाराम अर्याललाई अपहरण गरेकाे अभियाेग थियाे । तर, सो अभियोगमा उनीमाथि प्रहरीले अनुसन्धान नै नगरी समय म्याद गुजारेको रहस्य हालै खुलासा भएकाे थियाे ।

सोही प्रकरणमा प्रहरी प्रधान कार्यालयले अर्याल अपहरणको समयमा अनुसन्धान गर्ने प्रहरी अधिकारीसहित घटनाबारे अनुसन्धान पूरा नगर्ने प्रहरी अधिकारीमाथि छानबिन गर्न समिति बनाएको थियो ।

सो समितिले अनुसन्धान नगर्ने प्रहरी अधिकारीलाई कारबाही सिफारिस गरेपछि कानुन शाखाले लिखित स्पष्टीकरण मागेको हो । प्रहरी प्रधान कार्यालयले एसएसपी भीम ढकालको नेतृत्वमा तीन सदस्यीय छानबिन समिति बनाएको थियो ।

सो समितिले अपहरणको उजुरी दर्ता हुँदादेखि हालसम्म अनुसन्धानको म्याद नै नहेरी अनुसन्धान गर्ने १५ प्रहरी अधिकारीमाथि प्रहरी नियमावलीअनुसार कारबाही गर्न सिफारिस गरेको थियो ।

उक्त घटनाको अनुसन्धान गर्न बनेको छानबिन समितिले असोज अन्तिम साता प्रहरी प्रमुख आईजीपी शैलेश थापा क्षेत्रीलाई प्रतिवेदन बुझाएको थियो । अवकाशप्राप्त प्रहरी अधिकारीमाथि भने प्रहरी नियमावली आकर्षित नहुने भएकाले प्रतिवेदनमा कमजोरी देखिए पनि कारबाही नहुने भएको छ ।

यसअघि नै प्रहरी प्रवक्ता एसएसपी वसन्तबहादुर कुँवरले पनि प्रहरीकै कारण अर्यालबारेकाे न्यायिक प्रक्रिया समाप्त भएको भन्दै छानबिन समितिको प्रतिवेदनका आधारमा संगठनले संलग्न प्रहरीमाथि हदैसम्मको कारबाही गर्ने बताएका थिए ।

अब टण्डनको अनुसन्धानमा संलग्न प्रहरीको लिखित बयानका आधारमा उनीहरूमाथि कारबाही हुने कानुन शाखा स्रोतकाे भनाइ छ । प्रहरी नियमावलीअनुसार अनुसन्धानमा कमजोरी तथा प्रहरी आचरणविपरीत काम गर्ने अधिकारीलाई सामान्य सचेत गराउनेदेखि जागिरबाट बर्खास्त गर्न सक्ने उल्लेख गरिएको छ ।

यी हुन् कारबाहीका भागिदार प्रहरी अधिकारी

१. डीएसपी सुशीलकुमार यादव (हाल एसएसपी)
२. डीएसपी दानबहादुर कार्की (हाल एसपी)
३. डीएसपी कृष्णकुमार महत (हाल एसएसपी)
४. डीएसपी दीपक थापा (हाल एसएसपी)
६. डीएसपी दिनेशकुमार आचार्य (हाल एसपी)
७. डीएसपी दिलीप घिमिरे (हाल एसपी)
८. डीएसपी महेन्द्र खड्का (हाल एसपी)
९. डीएसपी मुकुन्द मरासिनी ( हाल एसपी)
१०. डीएसपी पवनकुमार भट्टराई (हाल कार्यरत)
११. डीएसपी केशव भट्टराई (हाल कार्यरत)
१२. डीएसपी डिलबहादुर मल्ल (हाल कार्यरत)
१३. डीएसपी भीमलाल भट्टराई (हाल कार्यरत)
१४. डीएसपी प्रतितसिंह राठौर (हाल कार्यरत)
१५. प्रहरी जवान राजकुमार विक– अनुसन्धान सहयोगी (हाल असई)

अवकाशप्राप्त प्रहरी अधिकारी

१. डीएसपी जगतमान श्रेष्ठ– कार्यालय प्रमुख (हाल अवकाशप्राप्त)
२. प्रहरी निरीक्षक नवीन क्षेत्री– अनुसन्धान अधिकृत (हाल अवकाशप्राप्त)
३. डीएसपी ठाकुरप्रसाद ज्ञवाली (आईजीपी भई अवकाश)
४. प्रहरी निरीक्षक सोमबहादुर थापा (डीएसपीबाट अवकाश)
५. डीएसपी राजकुमार बैदवार (एसपीबाट अवकाश)

सम्बन्धित समाचार

प्रकाशित मिति: सोमबार, पुस ५, २०७८ १२:२६