गुणकेशरी प्रधान 'एनसेल वुमन आइकन आईसीटी अवार्ड २०२१’ बाट सम्मानित

A+ A A-

नेपालको पहिलो महिला कम्प्युटर इन्जिनियर गुणकेशरी प्रधान 'एनसेल वुमन आइकन आईसीटी अवार्ड २०२१’ बाट सम्मानित भएकी छिन् ।

लिभिङ विथ आईसीटीले आयोजना गरेको एफवान सफ्ट आईसीटी अवार्ड २०२१ अन्तर्गत रहेका विभिन्न १२ विधामध्ये आईसीटीमा योगदान गर्ने महिलालाई सम्मान गर्ने वुमन आइकन आईसीटी अवार्ड विधामा प्रधानले यो पुरस्कार जितेकी हुन् ।

वुमन इन आईटी संस्थाको अध्यक्षमा रही यस क्षेत्रमा महिला सशक्तिकरण र सहभागिता बढाउन सचेतनात्मक कार्यक्रम, तालिम तथा रिसर्चहरूमा काम गरेबापत उनलाई यो पुरस्कार प्रदान गरिएको हो ।

काठमाडौंको सोल्टी होटलमा शुक्रबार आयोजना भएको ग्राण्ड फिनालेमा एनसेल वुमन आइकन आईसीटी अवार्ड प्रधानलाई प्रदान गरिएको हो । प्रधानलाई एनसेलले आईसीटीमा उनको योगदानको कदर गर्दै विविधता, समानता र समावेशीकरण अर्थात् डाइभर्सिटी, इक्विटी एण्ड इन्क्लुसन -डीईआई_ लाई सधैँ प्रोत्साहन गर्ने कम्पनीको नीतिअनुरुप आईसीटी अवार्डमा आबद्ध भई ३ लाख रुपैयाँ पुरस्कार प्रदान गरेको हो ।

सञ्चार तथा सूचना प्रविधिमन्त्री ज्ञानेन्द्र बहादुर कार्की, नेपाल दूरसञ्चार प्राधिकरणका निर्देशक दिपेश आचार्य, एनसेलका चिफ इन्फर्मेसन अफिसर विशालमणि उपाध्याय र एनसेलका कर्पोरेट कम्युनिकेसन तथा सीएसआर प्रमुख विशाखालक्ष्मी खड्काले अवार्ड विजेता प्रधानलाई शिल्ड, प्रमाणपत्र र चेक संयुक्त रूपमा प्रदान गरे ।

प्रधानले नेपालको आईसीटीक्षेत्रमा ३५ वर्षदेखि अनवरत रूपमा योगदान पुर्‍याउँदै आएकी छिन् । नेपाल टेलिकम तथा सरकारी संस्थामा मात्रै करिब ३१ वर्ष महत्त्वपूर्ण स्थान र पदमा रहेर काम गरेकी प्रधान हाल वुमन इन आईटी संस्थाको नेतृत्व गरिरहेकी छिन् । प्रधानले नेपाल टेलिकमको कम्प्युटर इन्जिनियरको रूपमा करियर सुरु गरेकी थिइन् भने प्रवक्ता र निर्देशक जस्तो गरिमामय पदमा रहेर काम गरिसकेकी छिन् ।

प्रधानले सरकारी सेवाबाट अलग भए पनि नेपालमा सूचना प्रविधिमा महिलाहरूको सहभागिता र दक्षता बढाउन विभिन्न ढंगले काम गरिरहेकी छिन् ।

वुमन आइकन आईसीटी अवार्ड विजेता प्रधानसँगै अन्य ११ विधामा विशिष्ट व्यक्ति, संस्था, प्रोडक्ट र स्टार्टअपहरूले पनि अवार्ड प्राप्त गरेका छन् । यस अवार्ड कार्यक्रममा सञ्चार तथा सूचना प्रविधि मन्त्रालय, नेपाल दूरसञ्चार प्राधिकरण, एनसेललगायत ३० भन्दा बढी संस्थाहरूको सहकार्य रहेको थियो ।

प्रकाशित मिति: आइतबार, पुस ४, २०७८ १४:०१