चिसो बढेपछि तिंकरका सबैले छाडे गाउँ, छाङ्गरूमा पनि चौकीदार मात्रै

A+ A A-

चिसो बढेसँगै दार्चुलाको व्यास गाउँपालिका- १ छाङ्गरु र तिङ्करका स्थानीय सदरमुकाम खलङ्गा झरेका छन् ।

आफ्ना पशुचौपायासहित स्थानीयहरू सदरमुकाम खलङ्गा झरेपछि छाङ्गरु र तिङ्कर गाउँ मानवविहीन बनेको छ । छाङ्गरुमा गाउँको निगरानी तथा चोरी भए खबर गर्न एक जना चौकीदार राखेर स्थानीय सदरमुकाम सरेका छन् । तिङ्कर भने मानवविहीन बस्ती बनेको छ ।

छाङ्गरुभन्दा तिङ्करमा बढी चिसो हुने र हिमपात हुने भएपछि हिउँदको समयमा तिङ्करका स्थानीय खलङ्गा झर्ने गरेका छन् । नेपालतर्फबाट बाटो नभएपछि भारतीय पक्षको अनुमति लिएर दुई गाउँका स्थानीय भारतको बाटोहुँदै खलङ्गा झरेको स्थानीय योगेश बोहराले बताए ।

छाङ्गरु

३ हजार २ सय मिटर उचाइमा रहेको दुई गाउँका स्थानीय ६ महिना छाङ्गरु तिङ्कर र ६ महिना जिल्ला सदरमुकाम खलंङ्गामा बस्दै आएका छन् ।

कालापानीक्षेत्रनजिकै रहेको छाङ्गरु गाउँ हेर्नका लागि राईसिंह ऐतवाललाई चौकीदारको जिम्मा दिइएको स्थानीयले बताएका छन् । स्थानीयले गत वर्ष पनि ऐतवाललाई नै चौकीदार तोकेका थिए ।

गत वर्षदेखि गाउँनजिकै सशस्त्र प्रहरी र नेपाल प्रहरी पनि बसेको छ । सुरक्षाकर्मी भएपछि गाँउमा रहेका घर रेखदेख गर्न सहज भएको चौकीदार ऐतवालले बताए ।

छाङ्गरु

'भारतसँग खुला सीमा भएका कारण तस्करी हुने हुँदा चौकीदार बस्नुपर्थ्यो । तस्करहरूले गाउँमा आएर आगलागी गरिदिने, धन सम्पत्ति चोरीदिने खतरा हुन्थ्यो तर प्रहरी चौकी स्थापना भएदेखि त्यस्तो अवस्था आएको छैन,' ऐतवालले भने, 'बिहान, दिउँसो र रातिको समयमा सबैको घरघर पुगेर त्यहाँको अवस्थाका बारेमा जानकारी लिने गरेको छु ।'

तीन वर्षदेखि चौकीदार बस्दै आएका ऐतवालले गत वर्षबाट सशस्त्र प्रहरी बल नेपाल नम्बर ५० गुल्म र नेपाल प्रहरीको चौकी पनि छाङ्गरुमै बसेपछि सहज भएको बताए ।

छाङ्गरुभन्दा तिङ्करमा बढी चिसो हुने र हिमपात छिट्टै हुने भएपछि स्थानीय कात्तिकको दोस्रो सातादेखि नै खलङ्गा झर्ने गर्छन् । छाङ्गरुमा १२० र तिङ्करमा ६५ घरधुरी रहेका छन् ।

तिङ्कर गाउँ

छाङ्गरुमा चौकीदार राखेको भए पनि चीनको सीमा नजिकैको दार्चुलाको उत्तरी क्षेत्रको तिङ्कर गाउँ भने मानवविहीन बस्ती बनेको स्थानीय योगेश बोहराले बताए । तिङ्करको छायालेकमा नेपाल प्रहरीको चौकी छ । चिसो बढेसँगै प्रहरी चौकी पनि कात्तिकमै छाङ्गरु झरेको छ ।

हिँउदमा ४ देखि ६ फिटसम्म हिउँ पर्छ । यस क्षेत्रमा तापक्रम माइनस १६ डिग्रीसम्म झर्ने गर्दछ । गाउँका सबै सदरमुकाम झरेपछि वडा नम्बर १ को कार्यालयले पनि सदरमुकामबाटै सेवा प्रवाह गर्ने गरेको वडाध्यक्ष अशोकसिंह बोहराको भनाइ छ ।

प्रकाशित मिति: शनिबार, पुस ३, २०७८ १९:३७