राजधानीकाे गुरुयोजना एक महिनाभित्र तयार पार्न मुख्यमन्त्री केसीको निर्देशन

राजधानीकाे गुरुयोजना एक महिनाभित्र तयार पार्न मुख्यमन्त्री केसीको निर्देशन

A+ A A-

लुम्बिनी प्रदेशका मुख्यमन्त्री कुलप्रसाद केसीले प्रदेश राजधानी निर्माणको लागि जग्गा अधिग्रहण र गुरुयोजनाको काम एक महिनाभित्र सम्पन्न गर्न सम्बन्धित पक्षलाई निर्देशन दिएका छन् । जग्गा अधिग्रहण कार्यदलको प्रथम बैठकलाई सम्बोधन गर्दै मुख्यमन्त्री केसीले गुरुयोजना निर्माणको काम द्रुत गतिमा अघि बढाउन निर्देशन दिएका हुन् ।

दाङ लालमटियास्थित मुख्यमन्त्रीको सम्पर्क कार्यलयमा आयोजित उक्त बैठकमा केसीले राजधानी निर्माण ख्यालठट्टाको विषय नभएको बताए । समग्र प्रदेशबासीको हित र भावी पुस्तालाई पनि न्याय हुने गरी गम्भीरताका साथ कुशल कार्यसम्पादन गर्नुपर्नेमा उनले जाेड दिए ।

राजधानी निर्माणका लागि लुम्बिनी प्रदेशले 'भर्जिन ल्याण्ड' पाएको उल्लेख गर्दै मुख्यमन्त्री केसीले योजनाबद्ध काम गर्न सके लुम्बिनी प्रदेशको राजधानी देशकै सुन्दर बन्न सक्ने दाबी गरे । राजधानी निर्माणका लागि भित्री र बाहिरी घेरा बनाएर काम गर्नुपर्ने उनले बताए ।

उनले भने, 'हाम्रो राजधानीको निर्माणका लागि पहिलो चरणमा राप्ती गाउँपालिका, गढुवा गाउँपालिका र अर्घाखाँचीको शितगंगा नगरपालिकालाई पहिलो घेरा बनाएर काम गर्ने र दोस्रो चरणका लागि लमही नगरपालिका, कपिलबस्तुको शिवराज नगरपालिका, प्यूठानको सरुमारानी गाउँपालिका लगातयतलाई सहभागी बनाएर अगाडि जानु पर्दछ ।'

बैठकमा कानुन, महिला तथा बालबालिका मन्त्री रमा घर्तीमगरले सबै जनतालाई हित हुने गरी काम गर्नुपर्नेमा जाेड दिइन् । बैठकमा राप्ती गाउँपालिका, शितगंगा गाउँपालिका, लमही नगरपालिका, गढुवा गाउँपालिका लगायतका जनप्रतिनिधिहरू सहभागी थिए । प्रदेश सरकारका मुख्य न्यायाधिवक्ता श्रीकृष्ण सुवेदी संयोजक रहेको पाँच सदस्यीय कार्यदलले जग्गा अधिग्रहणकाे काम गरिरहेको छ ।