पार्टी पदाधिकारीमा देउवा पक्षको बहुमत, यस्तो बन्यो टिम

A+ A A-

नेपाली कांग्रेसको १४औँ महाधिवेशनबाट शेरबहादुर देउवा पार्टी सभापतिमा दोस्रो कार्यकालका लागि निर्वाचित भएका छन् । सभापतिका अर्का उम्मेदवार डा. शेखर कोइरालालाई दोस्रो चरणको मतदानमा पराजित गर्दै देउवा सभापतिमा निर्वाचित भएका हुन् ।

पहिलो चरणको निर्वाचनमा सभापतिका लागि पाँच जनाले प्रतिस्पर्धा गरेका थिए । तर, निर्वाचित हुनका लागि आवश्यक मत कसैले पनि ल्याउन नसकेपछि बढी भोट ल्याउने देउवा र कोइरालाबीच दोस्रो चरणमा प्रतिस्पर्धा भएको थियो । दोस्रो चरणको मतदानमा पहिलो चरणबाटै बाहिरिएका सभापतिका उम्मेदवारहरू प्रकाशमान सिंह, विमलेन्द्र निधि र कल्याण गुरुङले देउवालाई सघाएका थिए ।

कांग्रेसमा पार्टी सभापतिसहित १३ सदस्यीय पदाधिकारी निर्वाचित भएको छ । कोषाध्यक्ष पछि नियुक्त गरिने छ । पार्टी पदाधिकारीमा हालसम्म देउवासहित उनको पक्षका आठ जना निर्वाचित भएका छन् ।

कांग्रेस उपसभापतिमा पूर्णबहादुर खड्का र धनराज गुरुङ निर्वाचित भएका छन् । खड्का देउवा र गुरुङ कोइराला प्यानलबाट उपसभापतिको उम्मेदवार बनेका थिए ।

तर, महामन्त्रीमा भने देउवा प्यानलका दुवै उम्मेदवार पराजित भए । महामन्त्रीमा निर्वाचित भएका गगन थापा कोइरालाको प्यानलका हुन् भने विश्वप्रकाश शर्मा सिंहको प्यानलका हुन् ।

त्यस्तै कांग्रेसमा आठ जना सहमहामन्त्री निर्वाचित भएका छन् । तिमध्ये ६ जना देउवाको प्यानलका छन् । बाँकी दुई जना भने कोइरालाको प्यानलबाट सहमहामन्त्रीको उम्मेदवार बनेका थिए ।

१४औँ महाधिवेशनबाट सहमहामन्त्रीमा निर्वाचित भएका भीष्मराज आङ्देम्बे, महालक्ष्मी उपाध्याय डिना, उमाकान्त चौधरी, किशोरसिंह राठौर, फरमुल्लाह मन्सुर र महेन्द्र यादव देउवाको प्यानलका हुन् ।

त्यस्तै कोइरालाको प्यानलबाट सहमहामन्त्रीमा बद्री पाण्डे र जीवन परियार निर्वाचित भएका छन् ।