एमालेको अपानि : स्कुल विभागमा बालकृष्ण ढुंगेल, असन्तुष्ट थकाली र आचार्यको जिम्मेवारी खोसियाे

एमालेको अपानि : स्कुल विभागमा बालकृष्ण ढुंगेल, असन्तुष्ट थकाली र आचार्यको जिम्मेवारी खोसियाे

फाइल तस्वीर ।

A+ A A-

एमाले अध्यक्ष केपी ओलीले २६ मंसिरको केन्द्रीय कमिटी बैठकमा कार्यविभाजनमा असन्तुष्ट केन्द्रीय सदस्यको जिम्मेवारी १ पुसमा अन्तरपार्टी निर्देशन (अपानि) जारी गर्दासम्म फेरबदल गरिदिएका छन् ।

बैठकमा प्रस्तावित निर्णयभन्दा अपानि जारी गर्दा त्यसरी असन्तुष्ट हुनेहरूलाई थन्क्याउने गरी जिम्मेवारी दिइएको हो ।

२६ मंसिरका बैठकमा जाजरकोटका निरज आचार्यलाई जाजरकोटको सहइञ्चार्ज प्रस्ताव गरिएको थियो । अपानि जारी हुँदा आचार्यलाई निर्वाचन विभागको उपप्रमुख बनाइएको छ । जाजरकोटको इञ्चार्ज अपेक्षा गरेका आचार्यले त्यही दिन असन्तुष्टि जनाएका थिए । र, लिखित असहमति जनाएका थिए ।

त्यतिबेला शिलापत्रसँगको कुराकानीमा आचार्यले कार्यविभाजन मापदण्डबिना भएको भन्दै लिखित असहमति जनाएको बताएका थिए । भैरवसुन्दर श्रेष्ठलाई इञ्चार्ज बनाएकाेप्रति आचार्यको असन्तुष्टि थियो । तर, आचार्यको असन्तुष्टि सम्बोधन गरिएन, बरू निर्वाचन उपप्रमुखको जिम्मेवारीमा सारियो ।

जाजरकोटका आचार्यकाे मात्र होइन, मुस्ताङकी श्रीमाया थकालीको पनि यस्तै असन्तुष्टि थियो । नवौँ महाधिवेशनमा पोलिटब्युरो सदस्य भइसकेकी थकालीलाई २६ मंसिरमा ओलीले केन्द्रीय सदस्यमा घटुवा गरिदिए । त्यसप्रति उनको असहमति र असन्तुष्टि चर्काे थियो ।

थकालीले असन्तुष्टि महासचिव शंकर पोखरेललाई राखिसकेकी थिइन् । त्यही असन्तुष्टिका कारण थकालीले मुस्ताङको इञ्चार्ज अस्वीकार गर्ने बताएकी थिइन् । २७ मंसिर साँझ महासचिव पोखरेलले असन्तुष्टि सम्बोधन गर्ने बताएका थिए र इञ्चार्ज स्वीकार गर्न आग्रह पनि गरेका थिए । तर, अपानि जारी हुँदा थकालीलाई पोलिटब्युरोमा बढुवा पनि गरिएन र इञ्चार्ज पद पनि खोसेर चन्द्रमोहन गौचनलाई दिइएको छ ।

२६ मंसिरको केन्द्रीय कमिटी बैठकमा असन्तुष्टि जनाउने अर्का नेता झपट रावललाई पनि थन्काउने गरी जिम्मेवारी दिइएको छ । उनलाई खानेपानी तथा सरसफाइ विभागको प्रमुख बनाइएकाे छ । नेता भीम रावलनिकट रावललाई भूगोलमा पहुँच नै दिइएको छैन । र, उनको कैलाली जिल्लाको इञ्चार्ज र सहइञ्चार्ज दुवै पद रावलको भागमा परेन ।

यता, घनश्याम भुसालनिकट उषाकिरण तिम्सिनालाई पनि खानेपानी तथा सरसफाइ विभागकै उपप्रमुख बनाइएको छ । आश्चर्यचाहिँ माओवादीबाट एमालेमा आएका विवादास्पद पृष्ठभूमिका वालकृष्ण ढुंगेलले पनि एमाले स्कुल विभागको सदस्यको जिम्मेवारी पाएका छन् ।

अनि, परराष्ट्र मामिला विभागको उपप्रमुख आस गरेका विष्णु रिजाललाई प्रचार विभागको उपप्रमुखमा थन्काएका ओलीले परराष्ट्र विभागको उपप्रमुख माओवादीबाट आएका बाग्लुङका नेता कृष्ण केसीलाई बनाएका छन् ।

ओलीले अपानि जारी गर्ने बेला सचिवहरूको मर्यादाक्रम भने फेरबदल गरेका छन् । सचिवको दोस्रो कार्यकालमा रहेका गोकर्ण विष्ट र योगेश भट्टराईलाई सचिवको सूचीमध्ये मर्यादाक्रममा पछाडि राखेका थिए । त्यसलाई संशोधन गरेर अगाडि ल्याएका छन् ।

पहिला विष्ट र भट्टराईभन्दा अघि छविलाल विश्वकर्मा र रघुवीर महासेठलाई राखेका थिए । अपानि जारी गर्दा विष्ट र भट्टराईलाई विश्वकर्मा र महासेठभन्दा अगाडि राखेका छन् ।

प्रकाशित मिति: शुक्रबार, पुस २, २०७८ १०:००