वैदेशिक रोजगारीमा जाने नेपालीलाई खोप उपलब्ध गराउन आईओएमसँग श्रममन्त्रीको आग्रह

वैदेशिक रोजगारीमा जाने नेपालीलाई खोप उपलब्ध गराउन आईओएमसँग श्रममन्त्रीको आग्रह

A+ A A-

श्रम, रोजगार तथा सामाजिक सुरक्षामन्त्री कृष्णकुमार श्रेष्ठसँग संयुक्त राष्ट्रसंघको अन्तर्राष्ट्रिय आप्रवासी संगठन (आईओएम)का मिसन प्रमुख लोरेना ल्यान्डोले शिष्टाचार भेट गरेका छन् ।

मन्त्रालयमा बिहीबार भएको भेटमा आप्रवासी नेपाली कामदारको क्षेत्रमा आईओएमले नेपाल सरकारसँग गरिरहेको सहकार्यबारे समीक्षा गर्दै मन्त्री श्रेष्ठले कोभिड–१९ महामारीका कारण अन्तर्राष्ट्रिय श्रम बजारमा नेपाली श्रमिकहरूले भोगेका बहुआयामिक समस्याको सम्बोधनका लागि आईओएम नेपालले पुर्‍याएको योगदानप्रति आभार व्यक्त गरेका थिए । श्रेष्ठले वैदेशिक रोजगारीमा जाने नेपालीलाई कोभिडविरुद्धको खोप उपलब्ध गराउन आईओएमबाट सहयोगको आग्रहसमेत गरे ।

वैदेशिक रोजगारीमा गई नेपाल फर्केका नागरिकहरूले आर्जन गरेका सीप र पुँजीको परिचालनका लागि मन्त्रायलले गरेका प्रयासमा आईओएमले सहयोग गरेको चर्चा गर्दै मन्त्री श्रेष्ठले पाँचवर्षे रणनीतिमा उल्लेख गरिएका विषय कार्यान्वयन गर्न मन्त्रालय र आईओएम नेपालबीच छुट्टै समझदारी हुनुपर्नेमा जोड दिए ।

मन्त्री श्रेष्ठले मन्त्रालय र आईओएम नेपालबीच आगामी पाँचवर्षे संयुक्त रणनीतिपत्रको मस्यौदा तयार गर्न विज्ञ समिति गठनको प्रस्तावसमेत गरेका छन् ।

नेपालको अर्थतन्त्रको मेरुदण्डको रूपमा रहेको श्रमशक्तिलाई उत्पादनमूलक र प्रतिस्पर्धी बनाउँदै वैदेशिक रोजगारीबाट आर्जित पुँजी, प्रविधि, सीप र अनुभवलाई अधिकतम रूपमा परिचालन गर्ने राज्यको नीति रहेको मन्त्री श्रेष्ठले बताए ।

नेपाल सरकारको नीति तथा कार्यक्रममा श्रम आप्रवासनसम्बन्धी अन्तर्राष्ट्रिय प्रतिबद्धताहरूलाई आन्तरिकीकरण गर्दै लगिने उल्लेख रहेको र यससम्बन्धमा आईओएम नेपालले सरकारलाई पुर्‍याएको योगदानका बारेमा मन्त्री श्रेष्ठले धन्यवाद दिए ।

प्रकाशित मिति: शुक्रबार, पुस २, २०७८ ११:१७