खानेपानीको माग राख्दै सदरमुकामबासी आन्दोलनमा, नगरपालिकामा तालाबन्दी

A+ A A-

सदरमुकाम मार्तडीमा रहेको बृहत् खाने पानी आयोजनाको पाइप सडक निर्माणका क्रममा काटिएपछि सरमुकाममा खानेपानीको हाहाकार भएको छ ।

खानेपानी नपाएको भन्दै सदरमुकावासी आन्दोलनमा उत्रिएका छन् । तत्काल खानेपानीको व्यवस्थापन गर्नुपर्ने मागसहित बजारवासीले बडीमालिका नगरपालिकामा तालाबन्दीसमेत गरेका छन् ।

बाजुराको सदरमुकाम मार्तडीमा रहेको बृहत् खानेपानीको सडक निर्माणको क्रममा पाइपलाइन डोजरले तोडेपछि १ महिनादेखि बाजुरा सदरमुकाममा खानेपानीको चरम अभाव भएको व्यापारी हंशबहादुर सिंहले बताए ।

आन्दोलनकारीले नाराबाजीसहित बडीमालिका नगरपालिकाको मूल ढोकामा तालाबन्दीसमेत गरेका छन् । सदरमुकामसँगै जोडिएको बडीमालिका नगरपालिकाले मार्तडी जोड्ने रिङरोड बनाउन सडक निर्माणको क्रममा मुहानबाट आएको खानेपानी पाइपलाइन जथाभावी काटेर फाल्दा एक महिनादेखि खानेपानीको समस्या भएको स्थानीय व्यापारी सुरेन्द्र नाथले बताए ।

खानेपानीको पाइपलाइन भएको ठाउँमा डोजर प्रयोग गरेर खानेपानीको पाइपसमेत काटिदिएपछि जिल्ला सदरमुकाममा खानेपानीको हाहाकार भएको र यसको तत्काल समाधान नगरपालिकाले गर्नुपर्ने भन्दै नगरपालिकाका दुवै मूल गेटमा ताला लगाएको उपभोक्ता हिक्मत रोकायाले बताए ।

बडीमालिका नगरपालिकाले खाने पानीभन्दा पनि सडकलाई प्रथमिकता दिएको र खानेपानीको संरक्षणमा ध्यान नदिएका कारण १ महिनादेखि खानेपानीको हाहाकार भएकाले आन्दोलन गर्न बाध्य भएको बजार व्यवस्थापन समितिका उपाध्यक्ष धनकृष्ण बिकले बताएका छन् ।

बडीमालिका नगरपालिकाको बजेटबाट सडक विस्तार भयो तर खानेपानीको लाइनमै सडक काटिनु भनेको दुःखद भएको उपाध्यक्ष विकको भनाइ छ ।

सदरमुकाम मार्तडीमा खानेपानीको चरम अभाव भएपछि सदरमुकाममा बसोवास गर्ने करिब १७ हजार बढी जनसंख्या खानेपानीबाट वञ्चित हुनु मानवअधिकारको हनन भएको बताएका छन् ।

सदरमुकाम मार्तडीमा खानेपानीको चरम अभाव भएपछि एक गाग्री पानी ल्याउन यहाँका स्थानीयरले घण्टौं समय कुर्नुपर्ने भएको छ ।

एक महिनादेखि सदरमुकामवासीले खानेपानी बाउली खोला र थापाबाडा जानुपरेको छ । यता, केही होटलमा पानीको अभाव हुँदा नजिकै रहेको विद्युतकाे नहरको फोहाेर पानीसमेत खुवाउने गरेको स्थानीयले बताएका छन् ।

सदरमुकाम मार्तडीमा खानेपानीको चरम अभाव भएपछि सदरमुकामवासीले आधा घण्टा हिँडेर घण्टाैंसम्म लाइनमा बस्ता पनि पानी भर्न नपाएको, एउटै धारोमा पानी सयौं जनाले पानी भर्नुपरेको र पर्याप्त मात्रामा खानेपानी नपाइएको बडीमालिका नगरपालिका–९ कि झरना विकले गुनासो गरिन् ।

सदरमुकाम मार्तडीभित्र बडीमालिका नगरपालिका ८ र ९ नम्बर वडा पर्छन् । बृहत् मार्तडी खानेपानी तथा सरसफाइ उपभोक्ता समितिका अनुसार खानेपानी उपभोग गर्न सदरमुकाम मार्तडीमा सरकारी तथा गैरसरकारी कार्यालय र स्थानीय गरी झन्डै ४ सय बढी ग्राहक छन् ।

प्रकाशित मिति: बिहीबार, असार ५, २०७६ ०४:१९