महामन्त्रीमा निर्वाचित भएपछि सुन्दरीजल पुगे विश्वप्रकाश शर्मा

A+ A A-

नेपाली कांग्रेसका नवनिर्वाचित महामन्त्री विश्वप्रकाश शर्माले सुन्दरीजलस्थित बीपी सङ्ग्रहालय पुगेर पार्टीका संस्थापक नेता बीपी कोइरालालगायत नेताको सालिकमा माल्यार्पण गरेका छन् ।

पार्टीको निर्वाचन समितिले महामन्त्रीमा निर्वाचित भएको घोषणा गरेलगत्तै उनी नेता-कार्यकर्ता एवं परिवारसहित सङ्ग्रहालय पुगेका हुन् । सङ्ग्रहालयमा उनले प्रथम जननिर्वाचित प्रधानमन्त्री बीपी, सर्वोच्च नेता गणेशमान सिंह, सन्त नेता कृष्णप्रसाद भट्टराई, नेता योगेन्द्रमान शेरचन, दिवानसिंह राई, रामनारायण मिश्रलगातको सालिकमा माल्यार्पण गरे ।

शर्माले बीपीले रोपेको कपुरको रुखमा पानी पनि हाले । भदौ २४ गते बीपी जयन्तीको अवसर पारेर सङ्ग्रहालयमै शर्माले महामन्त्री पदमा उम्मेदवारी घोषणा गरेका थिए । वैदिक विधिपूर्वक पूजाआजासहित सङ्ग्रहालय परिसरमा रुद्राक्षको बिरुवा रोपेर उम्मेद्वारी घोषणा गरेका शर्माले महामन्त्रीमा निर्वाचित भएपछि पनि यही स्थानमा उपस्थित भएर पार्टीका संस्थापक नेताहरूलाई सम्झिएका हुन् ।

बीपी र युवाको सपना एकाकार गरेर कांग्रेस अघि बढाउँछु

२०१७ पुस १ गते अर्थात् आजैका दिन तत्कालीन राजा महेन्द्रले प्रजातन्त्रमाथि नेपाली सेनाको शक्तिका भरमा कू गरी बीपीलगायत नेतालाई बन्दी बनाइएको जेललाई अहिले बीपी सङ्ग्रहालय घोषणा गरिएको छ । यही सम्झनामा कांग्रेसलगायत प्रजातन्त्रप्रेमीले आजको दिनलाई कालो दिनका रूपमा मनाउँछन् ।

सङ्ग्रहालयमा आयोजित कार्यक्रमलाई सम्बोधन गर्दै शर्माले पार्टीका संस्थापक नेता बीपी र वर्तमान युवाको सपना एकाकार गरेर कांग्रेसलालाई अघि बढाउने बताए ।

'कांग्रेस र देश दुवैमा रुपान्तरणको आवश्यकता छ, राजनीतिक परिवर्तनको नेतृत्व गरेको कांग्रेसले अब विकृति, विसङ्गति अन्त्यको नेतृत्व लिएर सामाजिक रुपान्तरण गर्नेछ । राजनीतिमा गुम्दै गएको सहिष्णुता पुनस्र्थापनाका लागि पनि पार्टीमा निर्वाचित महामन्त्रीका नाताले म र गगन थापा क्रियाशील हुनेछौँ,' शर्माले भने ।

महामन्त्री पदमा उम्मेद्वारी घोषणा गर्ने क्रममा आफूले अघि सारेका नीति निर्माणमा पार्टीका तर्फबाट आगामी नीति महाधिवेशनमा अर्का महामन्त्री थापाको समेत सहयोग लिएर प्रस्ताव पेस गर्ने जानकारी दिए । कांग्रेसलाई प्रविधिमैत्री बनाउन पार्टीको सञ्चार तथा सूचना विभागको प्रमुखको नाताले आफूले अघि सारेको कार्यक्रमलाई अब महामन्त्री भएर पूर्णता दिने उनले बताए ।

प्रकाशित मिति: बिहीबार, पुस १, २०७८ २०:३९