माघदेखि अर्को रियालिटी शो ‘ब्यान्ड च्याम्पियन नेपाल’ आउँदै, एपीवानमा प्रसारण हुने

माघदेखि अर्को रियालिटी शो ‘ब्यान्ड च्याम्पियन नेपाल’ आउँदै, एपीवानमा प्रसारण हुने

A+ A A-

नेपालमा फेरि अर्को रियालिटी शोको आयोजना हुने भएको छ । ब्यान्ड च्याम्पियन लास्ट फ्राइडे इभेन्ट म्यानेजमेन्टको आयोजनामा सुर, ताल र संगीतको संयोजन ब्यान्ड प्रतिस्पर्धा हुने रियालिटी शो ‘ब्यान्ड च्याम्पियन नेपाल’ हुन लागेको हो ।

आयोजकका अनुसार ब्यान्ड च्याम्पियनका लागि गत मंसिर २० गतेसम्म डिजिटल अडिसन खुला गरिएको थियो । ब्यान्ड च्याम्पियन नेपाल रियालिटी शोका निर्देशक फुर्वा शेर्पाले कार्यक्रम माघदेखि जेठसम्म एपीवान टेलिभिजनमा प्रसारण हुने जानकारी दिए ।

निर्देशक शेर्पाले एपीवान टेलिभिजनमा माघको पहिलो सातादेखि सुरु हुने सो कार्यक्रम देशभर छरिएर रहेका ब्यान्डलाई मञ्च प्रदान गर्ने उद्देश्यले आयोजना गर्न लागिएको बताए ।

निर्देशक शेर्पाले भने, 'ब्यान्ड च्याम्पियनको डिजिटल अडिसनमा देशभरका २ सय ब्यान्डले सहभागिता जनाएका थिए, जसमध्ये ७० वटा ब्यान्ड जज अडिसनका लागि छनोट भएका छन् ।'

उनका अनुसार ब्यान्ड च्याम्पियन पावर, प्यासन र पर्फमेन्सको प्रस्तुति भएकाले यस कार्यक्रममा एक जनाको मात्रै होइन, पूरै समूहको प्रस्तुति हेरिन्छ । प्रतिस्पर्धामा विशेषगरी रक, पप र आधुनिक मेलोडी गीतहरू प्रस्तुत हुने उनको भनाइ छ ।

यस प्रतिस्पर्धामा जुनसुकै ब्यान्ड पनि सहभागी हुन पाउने बताइएको छ । साथै, प्रस्तुतिका लागि आवश्यक म्युजिकल सामग्री पनि ब्यान्ड आफैँले व्यवस्थापन गर्नुपर्नेछ ।

आयोजकका अनुसार ब्यान्डको प्रतिस्पर्धा भए पनि भोकल, म्युजिक र समूहको प्रस्तुति हुने र जज राउन्डपछि ओरिजिनल सङ राउन्ड प्रारम्भ हुनेछ, जहाँ ब्यान्डले आफ्नै गीत गाउनुपर्ने हुन्छ ।

त्यस्तै, उत्कृष्ट १० मा पुगेका ब्यान्डहरूबीच भोटिङ राउन्ड प्रारम्भ हुनेछ । भोटिङ राउन्डमा जजको ६० प्रतिशत र जनताको ४० प्रतिशत भूमिका हुनेछ ।

ब्यान्ड च्याम्पियनको जजमा ड्रमर देव राना, भोकलिस्ट रविन तामाङ, गितारिस्ट ज्योति घिमिरे छन् भने नेपाल आइडलकी गोल्डेन माइक विजेता मेगा श्रेष्ठले कार्यक्रम सञ्चालन गर्नेछिन् ।

एपीवान टेलिभिजनमा शनिबार र आइतबार प्रसारण हुने ब्यान्ड च्याम्पियनका विजेताले २० लाख रुपैयाँ नगद पुरस्कार प्राप्त गर्नेछन् भने दोस्रो हुनेले ६ लाख, तेस्रो र चौथोले चार/चार लाख रुपैयाँ पुरस्कार पाउनेछन् ।

त्यस्तै, विजेता ब्यान्डले विभिन्न सातवटा देशमा प्रस्तुति दिने अवसर पनि पाउने आयोजकले बताएका छन् ।

प्रकाशित मिति: बिहीबार, पुस १, २०७८ १४:४५