ज्ञानेन्द्रसँग पाँचबुँदे सहमति गरेकाे पुष्टि गर्न ओलीलाई प्रचण्डकाे चुनाैती

ज्ञानेन्द्रसँग पाँचबुँदे सहमति गरेकाे पुष्टि गर्न ओलीलाई प्रचण्डकाे चुनाैती

A+ A A-

नेकपा माओवादी केन्द्रका अध्यक्ष पुष्पकमल दाहाल प्रचण्डले तत्कालीन राजा ज्ञानेन्द्र शाहसँग आफूले पाँचबुँदे सहमति गरेको प्रमाणित गर्न एमाले मध्यक्ष केपी ओलीलाई चुनौती दिएका छन् । प्रमाणित गर्न नसके झुटो बोलेकोमा जनतासँग माफी माग्न पनि दाहालले ओलीलाई चेतावनी दिएका छन् ।

बुधबार एमालेका मनोनीत ४४ जना केन्द्रीय सदस्यलाई शपथग्रहण गराउँदै ओलीले प्रचण्ड र ज्ञानेन्द्रको साँठगाँठमा माघ १९ को उपद्रो मच्चिएको जिकिर गरेका थिए । प्रचण्ड र ज्ञानेन्द्रबीच पाँचबुँदे सहमति नै भएको ओलीको आरोप थियाे ।

त्यसकाे भाेलिपल्ट आज प्रचण्डले ज्ञानेन्द्र शाहसँग पाँचबुँदे सहमति भएको थियो भन्ने शतप्रतिशत झुटो कुरा प्रचार गरेर ओलीले आफ्नो दरिद्र राजनैतिक चरित्र प्रदर्शन गरेको बताएका छन् ।

‘म केपी ओलीलाई पाँच बुँदे सहमति प्रमाणित गर्न र प्रमाणित गर्न नसके झुटो बोलेकोमा जनतासँग माफी माग्न चुनौती दिन्छु’, दाहालले भनेका छन् ।

प्रचण्डले शेयरबजारबारे आफ्नाे अभिव्यक्तिमा ओलीले गरेको टिप्पणीप्रति पनि आक्रोश पोखेका छन् । शेयरबजारलाई प्रचण्डले साम्राज्यवादकाे विकसित रूप भनेपछि ओलीले चन्दा नदिएपछिकाे अभिव्यक्ति करार गरेका थिए । ओलीकाे यस्ताे आराेपकाे पनि दाहालले खण्डन गरेका छन् ।

'मार्क्सवाद र कम्युनिस्ट सिद्धान्तबाट कोसौँ टाढा भागेका ओलीबाट मैले भूमण्डलीकृत साम्राज्यवाद र वित्तीय एकाधिकार पुँजीवादबारे गरेको विश्लेषणमाथि गरिएको टिप्पणीलाई दलाल पुँजीपति वर्गको एजेन्टको टिप्पणीका रूपमा खारेज गर्दछु', प्रचण्डले भनेका छन् ।

उनले अघि भनेका छन्, 'आजको पुँजीवादको चरित्रबारे मैले गरेको विश्लेषण सही रहेको दाबीसहित नेपालको शेयर बजारका सन्दर्भमा हाम्रो पार्टी र म समेत लाखौँ लगानीकर्ताहरूको हितका पक्षमा रहेको स्पष्ट गर्न चाहन्छु । दलाल पुँजीपतिहरूको झुटो प्रचारबाट भ्रमित नहुन म शेयर होल्डर जनसमुदायसँग अनुरोध गर्दछु ।'

प्रकाशित मिति: बिहीबार, पुस १, २०७८ ०९:२५