पत्रकारिताको आडमा अपराध कर्ममा छिरेकी इञ्जिना कार्कीको कथा

A+ A A-

भारतीय टेलिभिजन जी न्युजकी नेपाल संवाददाता इञ्जिना कार्की २१ मंसिरमा काठमाडौंबाट पक्राउ परिन् । त्यो बेला उनी वसन्तपुरको हिमालयन जाभा कफी सपमा थिइन् ।

कार्कीमाथि एक व्यवसायीलाई प्रलोभनमा पारेर ठगी गरेको आरोप थियो । सोही आरोपका आधारमा उनी प्रहरी फन्दामा परेकी हुन् ।

महानगरीय प्रहरी वृत्त जनसेवाले कार्कीलाई १५ लाख रुपैयाँ लिँदै गरेको प्रमाणका आधारमा पक्राउ गरेको दाबी गरेको छ । प्रहरी वृत्त जनसेवाका प्रमुख डीएसपी डिलबहालुर मल्लले उनीमाथिको आरोप पुष्टि हुने प्रमाण फेला परेपछि पक्राउ गरिएको बताए ।

‘हामीले उनीमाथि व्यवसायीलाई गलत तरिकाले बार्गेनिङ गरेर पैसा असुल गरेको प्रमाण पाएपछि पक्राउ गरेका हौँ । उनीमाथि अझै अनुसन्धान जारी छ,’ डीएसपी मल्लले भने । उनको साथबाट प्रहरीले जी न्युजको प्रेस कार्डसमेत बरामद गरेको थियो ।

जनसेवा प्रहरीका अनुसार कार्कीले प्रमाणसहित उजुरी दिने व्यवसायीबाहेक अन्य व्यवसायीलाई समेत त्यसरी नै प्रभावमा पारेर रकम असुली गर्दै आएकी थिइन् ।

कार्कीले 'हनी ट्रयाप'को शैलीमा रकम असुलीको धन्दा नै चलाएको आशंका प्रहरीको छ । ‘उनी पहिला पत्रकार थिइन् होला तर, अहिले जुन धन्दामा लागेको खुलेको छ । त्यो आपराधिक कामबाट लाभ लिने उद्देश्यले मात्रै काम गरेको देखिन्छ । कार्कीको सम्बन्ध पनि हाई प्रोफाइलसँग मात्रै देखियो,’ ती अधिकारीले थपे, ‘पत्रकारिताको आडमा हाई प्रोफाइल व्यक्तिसँग नजिकिने र पछि उनीहरूसँग नै बार्गेनिङ गर्ने गरेकी रहिछन् ।’

प्रहरीका अनुसार अन्य दुई जना ठूला व्यवसायीसमेत कार्कीबाट पीडित भएको भन्दै प्रहरीको सम्पर्कमा आएका छन् । यद्यपि उनीहरूले गोपनीयताको डरले लिखित उजुरी भने नदिएको प्रहरीको भनाइ छ । प्रहरीको सोधपुछमा कार्कीले खासै केही बताएकी छैनन् ।

सोलुखुम्बु स्थायी घर भएकी कार्कीले २०६७ सालदेखि हिमालय टेलिभिजनबाट पत्रकारिता सुरु गरेकी हुन् । त्यसपछि उनी विभिन्न टेलिभिजन च्यानलमा काम गर्न पुगेकी थिइन् । हिमालय टेलिभिजनमा काम गरेकै बेला उनको सम्पर्क जी न्युजको नेपाल संवाददाता बिन्नी शर्मासँग भयो । पछि बिन्नी हिमालय टेलिभिजनको कार्यकारी निर्देशक भए ।

पछि बिन्नीमार्फत नै उनी जी न्युजको नेपाल संवाददाता बनेकी हुन् । त्यो बेला हिमालय टेलिभिजनमा कार्यरत पत्रकारहरूका अनुसार बिन्नीसमेत पत्रकारिताको आडमा विभिन्न अवैध काम गर्थे ।

उनीहरूको उद्देश्य नेपालमा व्यवसाय गरिरहेका ठूला भारतीय व्यवसायीहरूको कमजोरी खोज्ने र समाचार प्रकाशन गरी असुलीको धन्दा चलाउँथे । बिन्नीकै शैली कार्कीले पनि अपनाएको कार्कीलाई नजिकबाट चिन्ने केही पत्रकारहरू नै बताउँछन् ।

बिन्नीसँगको सम्पर्कपछि उनको आर्थिक अवस्थासमेत निकै फेरिएको थियो । बिन्नीले हिमालय टेलिभिजनमा काम गर्न आउने कैयौँ महिला पत्रकारहरूलाई गलत कामका लागि समेत प्रयोग गरेको दाबी बिन्नीलाई नजिकबाट चिन्ने पत्रकारहरूको दाबी छ ।

पछिल्लो समय कार्कीले त्यही शैलीलाई अपनाएको खुलेको हो । कार्कीको फेसबुक पेजका फोटोले समेत उनको सम्पर्क भीभीआईपीसँग हुने गरेको देखाउँछ । प्रहरीले कार्कीमाथि आपराधिक लाभ लिन खोजेको कसुरमा मुद्दा चलाएर अनुसन्धान जारी राखेको छ । पहिलो चरणमा अदालतबाट अनुसन्धानका लागि पाँच दिनको म्याद पाएकाे प्रहरीले आज पुनः म्याद थप गर्ने तयारी छ ।

(नोटः यसअघि प्रकाशित समाचारमा भुलबस प्रयोग भएका केही शब्द क्षमायाचनासहित संशोधन गरिएको छ । सं.)

प्रकाशित मिति: बुधबार, मंसिर २९, २०७८ १३:४३