ज्येष्ठ सदस्यको अध्यक्षतामा माओवादी केन्द्र कर्णाली प्रदेशको पहिलाे बैठक बस्दै

ज्येष्ठ सदस्यको अध्यक्षतामा माओवादी केन्द्र कर्णाली प्रदेशको पहिलाे बैठक बस्दै

फाइल तस्वीर

A+ A A-

दर्जन बढी नेताहरू आकांक्षी देखिएपछि माओवादी केन्द्रको कर्णाली प्रदेश सम्मेलन पदाधिकारी चयन नगर्दै सकिएको छ । शनिबारदेखि सुरु भएको माओवादी केन्द्रको प्रथम प्रदेश सम्मेलन मंगलबार सम्पन्न भएको हो ।

सम्मेलनले २११ सदस्यीय प्रदेश समिति चयन गरेको छ । कमिटीको पहिलो बैठकले पदाधिकारी चयन गर्ने जनाइएको छ । पहिलो बैठक भने ज्येष्ठ सदस्यको अध्यक्षतामा बस्नेछ । आज पहिलो बैठक बस्नेछ ।

प्रदेश सदस्य मध्येबाट नै अध्यक्ष चयन गर्ने प्रावधान भएकाले अध्यक्षका दाबेदार मध्ये विमला केसी मात्रै सदस्यमा छानिएकी छन् । अध्यक्षका दाबेदार अन्य नेताहरू केन्द्रीय सदस्य थिए । प्रदेश सदस्य छानिएका लागि अन्य कमिटीमा नरहेको हुनुपर्ने हुन्छ । अध्यक्ष नपाए केन्द्रीय सदस्य समेत गुम्ने भयले अरु नेताहरूले प्रदेश सदस्यमा रुचि नदेखाएको एक नेताले बताए । केसी रुकुम पश्चिमबाट कर्णाली प्रदेशसभामा समानुपातिक तर्फकी सांसद् हुन् । उनी महेन्द्र शाही नेतृत्वको प्रदेश सरकारमा पहिलो कार्यकालमा भूमि व्यवस्था कृषि तथा सहकारी मन्त्री बनेकी थिइन् ।

अध्यक्ष बाहेकका पदाधिकारीमा पनि आकांक्षी धेरै देखिएका छन् । प्रदेश कमिटीमा उपाध्यक्ष र सहसचिव तीन–तीन जना तथा सचिव र कोषाध्यक्षमा एक एक जना रहने व्यवस्था छ । पदाधिकारीमा सुर्खेतका कृष्ण जिसी जाजरकोटका गगन खड्का र गणेशप्रसाद सिंह, सल्यानका कर्णजीत बुढाथोकी, दैलेखका कर्ण बस्नेत, कालिकोटका लक्ष्मीप्रसाद चौंलागाई लगायतको दाबी देखिन्छ ।

प्रदेश सदस्य संख्या जिल्लामा संगठित सदस्य संख्याका आधारमा निर्धारण गरिएको छ । धेरै संगठित सदस्य हुने जिल्लाले बढी र कम संगठित सदस्य हुने जिल्लाले कम प्रदेश सदस्य पाएका छन् । प्रदेश सदस्यमा समेत आकांक्षी धेरै भएपछि दुई दिनका लागि भनिएको सम्मेलन चार दिन चलेको छ । सदस्य चयनमा विवाद भएपछि मंगलबार बेलुका सम्मेलन स्थलमै कुटाकुट समेत भएको छ ।

जुम्ला र हुम्ला जिल्लाका प्रतिनिधिबीच सम्मेलन स्थल वीरेन्द्रनगर ६ स्थित सभाहलमा कुटाकुट भएको थियाे । मंगलबार साँझ प्रदेश सदस्यहरूको नाम अध्यक्ष मण्डलले घोषणा गरेको थियो । अध्यक्ष मण्डलले घोषणा गरेको नाममा असहमति जनाउँदै प्रतिनिधिबीच कुटाकुट भएपछि प्रहरी नै हलभित्र आउनु परेको थियो ।

प्रकाशित मिति: बुधबार, मंसिर २९, २०७८ ०८:२४