सिन्धुपाल्चोकमा निजी आवास पुनर्निर्माण अन्तिम चरणमा

A+ A A-

भूकम्पका कारण सबैभन्दा क्षतिग्रस्त सिन्धुपाल्चोकको पुनर्निर्माण अन्तिम चरणमा पुगेको छ । जिल्ला आयोजना कार्यन्वयन इकाइ, अनुदान व्यवस्थापन कार्यालयका अनुसार ६८ हजार लाभग्राहीले घर निर्माण सम्पन्न गरेर तेस्रो किस्ताको अनुदान लिइसकेका छन् ।

त्यस्तै, विभिन्न कारणले घर निर्माण गर्न छुट भएको भन्दै १८ हजार ६ सय ८९ परिवारले गुनासो दर्ता गरेका छन् ।

पुनर्निर्माण प्राधिकरणले २१ असारसम्म पहिलो किस्ता नलिनेलाई लाभग्राही सूचीबाट हटाउने पनि निर्णय गरेको छ ।

गुनासो दर्ता गराएकामध्ये १५ हजार ८२० लाभग्राहीको पुनः सर्वेक्षण सकिएको छ भने २ हजार ८६९ लाभग्राहीको सर्वेक्षण गर्न बाँकी रहेको जिल्ला आयोजना कार्यान्वयन इकाइका कृष्ण ज्ञवालीले जानकारी दिए ।

पुनर्निर्माण प्राधिकरणले यसअघि जेठ मसान्तसम्म गुनासो दर्ता गर्ने अन्तिम समयसीमा निर्धारण गरे पनि गुनासो दर्ता बाँकी रहेको भन्दै १५ असारसम्म गुनासो दर्ताको समय थपेको छ ।

जिल्लाका १२ स्थानीय तहमध्ये सबैभन्दा बढी गुनासो सुनकोसी गाउँपालिकामा दर्ता भएको छ । सुनकोसीबाट २ हजार २४० लाभग्राहीले गुनासोमा नाम दर्ता गराएका छन् ।

त्यसैगरी, चौतारा साँगाचोकगढी नगरपालिकाबाट २ हजार ५१, मेलम्ची नगरपालिकाबाट २० हजार ९४ र बाह्रबिसे नगरपालिकाबाट १२ सय ९२ लाभग्राहीले गुनासो दर्ता गराएका छन् ।

त्यस्तै, पाँचपोखरी थाङपाल गाउँपालिकाबाट १२८६, जुगल १३२१, हेलम्बु ८९२, त्रिपुरासुन्दरी १०४१, लिसंखुपाखर ११२७, भोटेकोसी १४९६, इन्द्रावती २०७३, बलेफी गाउँपालिकाबाट १७७६ लाभग्राहीले गुनासो दर्ता गराएको ज्ञावालीले जानकारी दिए ।

सिन्धुपाल्चोकको १०३ वडामध्ये वडामा पुनः सर्वेक्षण सम्पन्न भएको र प्राधिकरणले थपेको समयसीमाभित्र गुनासो दर्ता सकिने ज्ञवालीले बताए । १८ हजार ६८९ लाभग्राहीमध्ये १५ हजार ८ सय २० लाभग्राहीको गुनासो दर्ता सम्पन्न भएको छ भने अब जम्मा २ हजार ८६९ लाभग्राहीको गुनासो दर्ता बाँकी छ ।

अघिल्लो दिन नागरिकता, भोलिपल्ट गुनासो दर्ता

पुनर्निर्माण प्राधिकरणले भूकम्प प्रभावित जिल्लाहरुमा छुट भएका लाभग्राहीका लागि भन्दै अन्तिमपटक गाउँगाउँमा प्राविधिक पठाएर छुटेका लाभग्राहीलाई समावेश गर्न खोजेको छ ।

गाउँमा गएका प्राविधिकसँग अघिल्लो दिन नागरिकता बनाएर भोलिपल्टै गुनासोमा नाम दर्ता गराउनेहरु पनि उत्तिकै छन् । विदेश गएका, पहिला लाभग्राही पहिचान हुँदा विभिन्न कारणले छुट भएकाहरुका लागि प्राथामिकता र वास्तविक पीडित नछुटून् भनेर प्राधिकरणले अन्तिम पटक म्याद थप गरेको थियो ।

तर, जिल्लामा अन्तिमपटक गुनासो दर्तामा विकृति आएको छ । एउटै घरबाट बाबु, छोरा र नातिले समेत गुनासोमा नाम दर्ता गराएका छन् । पहुँच हुनेले यसो गरेपछि अन्तिमपटकको अवसर पनि गुम्ने भन्दै केही वास्तविक पीडित भने चिन्तामा छन् ।

जिल्लामा यसअघि सुरुमा आएका र पछि विभिन्न समयमा गुनासो दर्ता गराएका गरी कुल लाभग्राहीको संख्या ८८ हजार २ सय ७३ थिए । अब पछिल्लोपटक गुनासो दर्ता गराएका पनि सबै मूल लाभग्राहीमा पर्ने हो भने सिन्धुपाल्चोकबाट मात्रै १ लाख ६ हजार ९६२ कुल लाभग्राही हुने निश्चित छ । पछिल्लो जनगणनाअनुसार सिन्धुपाल्चोकको कुल घरघधुरी संख्या ६६ हजार मात्रै रहेको थियो ।

अन्तिम भयो निजी आवास पुनर्निर्माण

भूकम्पको ठिक एक वर्षपछि सिन्धुपाल्चोक सदरमुकाम चौताराबाट प्रधानमन्त्री केपी शर्मा ओलीले निजी आवास पुनर्निर्माणको औपचारिक सुरुवात गरेका थिए । भूकम्पको चार वर्षमा सिन्धुपाल्चोकको पुनर्निर्माण करिब–करिब अन्तिम चरणमा पुगेको छ ।

कुल ८८ हजार २७३ लाभग्राहीमध्ये ८५ हजार ८ सय २२ लाभग्राहीले पहिलो किस्ताबापतको १ लाख रुपैयाँ लिएका थिए । पहिलो किस्ता लिनेमध्ये ८१ हजार १ सय ८० ले दोस्रो किस्ताको अनुदान लिएका छन् । अब यहीँ अनुपातमा हेर्ने हो भने ४ हजार ६४२ ले मात्रै घर निर्माण सुरुवात नगरेको जिल्ला अनुदान व्यवस्थापन कार्यालयले जानकारी दिएको छ ।

दोस्रो किस्ता लिनेको संख्या हेर्दा दशैंभित्र जिल्लाका सबै लाभग्राहीहरुले निजी आवस पुनर्निर्माण सकिने कार्यालयले जानकारी दिएको छ ।

प्रकाशित मिति: बुधबार, असार ४, २०७६ १९:१५