कांग्रेसमा पौडेल समूह विभक्त र देउवा समूह असन्तुष्ट हुँदा नयाँ गुटको उदय

A+ A A-

१४औँ महाधिवशेनमा आन्तरिक एकता मजबुद बनाउने मत राख्दै आएका शेरबहादुर देउवा र रामचन्द्र पौडेल दुबै समूहभित्रको आन्तरिक एकता खलबलिएको छ । उम्मेदवारी मनोनयनको दिन पौडेल समूह विभक्त भएको छ भने देउवा समूहमा असन्तुष्टि चुलिएको छ । पौडेल समुह विभक्‍त र देउवा समूहमा असन्तुष्टि चुलिँदा कांग्रेसमा नयाँ गुटको उदय भएको छ ।

सभापतिको साझा उम्मेदवार बनाउन कसरत गरेको पौडेल समूहमा प्रकाशमान सिंहले अडान नछोडेपछि यो समूहले सभापतिको एकल उम्मेदवार बनाउन सकेन । पौडेल समूहबाट प्रकाशमान सिंह र शेखर कोइराला सभापतिको उम्मेदवार बनेका छन् ।

सभापतिको उम्मेदवारी घोषणासभामा सम्बोधन गर्दै नेता सिंहले पौडेल समूहमा सर्वसम्मत उम्मेदवार तयका लागि आफू बाधक बनेको कुरामा कुनै सत्यता नरहेको जिकिर गरे । 'हाम्रो विचार समूहमा सर्वसम्मत रूपले सभापति चयनका लागि म बाधक बनेको कुरामा कुनै पनि सत्यता छैन । मैले १३ औँ महाधिवेशनपछि तयारी थालेको थिएँ । कांग्रेसमा नेतृत्व परिवर्तनको मुद्दा उठाउँदै आएको थिएँ,' उनले भने ।

घोषणा सभामा उनले कांग्रेसमा देउवा निर्वाचित भए पार्टी झन् कमजोर हुने र उनले महाधिवेशन प्रतिनिधि छनौटमा गरेको सत्ता र शक्तिको दुरुपयोगको सजाय पाउनुपर्ने बताए । 'तपाईंहरूलाई आफूहरूमाथि भएको अन्यायको विरुद्ध निर्णय लिने अवसर आएको छ । नेतृत्व परिवर्तनको निम्ती उचित निर्णय लिनुहोला,' उनले प्रतिनिधिलाई आग्रह गरे ।

सिंह उपसभापतिमा सुजाता कोइराला र महामन्त्रीमा विश्वप्रकाश शर्मासहित मैदानमा उत्रिएका छन् । यता पौडेल समूहबाट शेखर कोइराला पनि सभापतिको प्रतिस्पर्धामा छन् । उनले उपसभापतिमा चन्द्र भण्डारी र धनराज गुरुङलाई छनौट गरेका छन् भने महामन्त्रीमा गगन थापा र मिनेन्द्र रिजाललाई अघि सारेका छन् ।

उम्मेदवारी दर्तापछि सञ्चारकर्मीसँग कुरा गर्दै कोइरालाले कांग्रेसलाई रुपान्तरण गर्ने बताए । उनले मुलुक र पार्टीको परिस्‍थिति सुधार्नका निम्ति नयाँ सोच र विचारका कार्यक्रम लिएर अघि बढ्ने बताए । 'पाकाहरूका होस् र युवाका जोसका आधारमा नेपाली कांग्रेसलाई अघि बढाउछौँ,' उनले भने ।

सिंह र शेखरको दाबीका कारण पौडेल उम्मेदवार बनेन् । पौडेलले विज्ञप्ति जारी गर्दै प्रतिस्पर्धाको मैदान छोड्न परे पनि कांग्रेसलाई राष्ट्रिय राजनीतिमा स्थापित गर्न आफू क्रियाशील हुने बताएका छन् । 'प्रतिस्पर्धाबाट म अलग रहे पनि आस्थावान साथीहरूले आफ्नो विवेक प्रयोग गरेर लोकतान्त्रिक प्रतिस्पर्धाको आदर्श र मूल्यलाई जोगाउनु हुनेछ भन्ने शुभेच्छा व्यक्त गर्दछु,' पौडेलले भनेका छन् ।

तीन दशकपछि देउवा-निधि पनि अलग

पौडेल समूहमात्रै होइन, देउवा समूह पनि विभक्त भएको छ । देउवालाई साथ दिँदै आएका निधिले ३६ वर्षपछि उनको साथ छाड्दै सभापतिमा उम्मेदवारी दिएका छन् । देउवाले यो पटक आफ्नो भविष्यको मात्रै ख्याल गर्दा महामन्त्रीमा दाबी गरिरहेका एनपी साउद, बालकृष्ण खाँण, रमेश लेखक र ज्ञानेन्द्र कार्कीले केन्द्रीय सदस्यमा मात्रै उम्मेदवारी दिनुपरेको अवस्था छ ।

देउवाले महामन्त्रीमा प्रदीप पौडेल र प्रकाशरण महतलाई अघि सारेपछि यो समूहमा असन्तुष्टि व्याप्त छ । सिटौलासँग सहकार्यका निम्ती आफ्नो पक्षका नेताहरूलाई अन्याय गरेको भन्‍दै देउवा समूहका नेताहरू डेलिगेसन पनि गएका थिए । नेता साउदले देउवालाई भेटेर नै असन्तुष्टि व्यक्त गरेका थिए, 'म नेविसंघको सभापति हुँदा अनेरास्ववियुको अध्यक्ष हुने शंकर पोखरेल महासचिव भइसके म सधैँ केन्द्रीय सदस्य हुनुपर्ने,' उनको असन्तुष्टि थियो ।

केन्द्रीय सदस्यमा उम्मेदवारी दर्तापछि सञ्चारकर्मीसँग प्रतिक्रिया दिँदा नेता खाँण पनि खुसी थिएनन्,' विशेष कारणले अहिले महामन्त्रीमा उम्मेदवारी दिन सकिएन तर म शेरबहादुर देउवासँगै छु,' उनको भनाइ थियो ।

सभापतिमा उम्मेदवारी दिएका निधिले नेतृत्व पुस्तान्तरणको सन्देशका लागि आफ्नो उम्मेदवारी भएको बताएका छन् । 'कांग्रेस रुपान्तरणका लागि युवाहरूको भूमिका अहं छ । नेतृत्व पुस्तान्तरणको सन्देशका लागि मेरो उम्मेदवारी हो युवाहरूलाई पुराना नेताहरूले नेतृत्वमा पुर्‍याउन सहजीकरण पनि गर्नुपर्छ र पार्टीलाई सही नीति र विधिमा अघि बढाउनुपर्छ,' उनले भने ।

सभापतिमा दोहोरिने दाउसहित उम्मेदवारी दिएका देउवाले भने पहिलो चरणमै आफूले निर्वाचन जित्ने दाबी गरे । तीनै तहको सकारमा कांग्रेसको नेतृत्वको लागि आफूलाई जिताउनुपर्ने उनको भनाइ छ । 'सभापतिको निर्वाचनमा पहिलो चरणमा नै विजयी हुनेछु,' देउवाले भने ।

यी हुन् गुट परिवर्तन गरेका नेताहरू

देउवाको गुट छोड्दै निधिले उनैलाई सभापतिमा चुनौती दिएका छन् । यस्तै पौडेल समूहबाट वैकल्पिक नेता बन्‍ने उद्देश्य राखेर सिं‌ह अलग भएका छन् । देउवा खेमामा रहेका विश्वप्रकाश शर्मा सिंहकोमा गएका छन् । कोइराला समूहकी नेतृ सुजाताले पनि सिंहलाई साथ दिएकी छिन् । यस्तै सिटौलालाई छाडेका नेता गगन थापा कोइराला समूहमा लागेका छन् ।

१ सय ३४ पदका लागि ५ सय ४८ जनाको उम्मेदवारी

१४ औँ महाधिवेशनको मनोनयन दर्ताका दिन ५ सय ४८ जनाले उम्मेदवारी दिएका छन् । १ सय ३४ पदका लागि नेताहरूले विभिन्न पदमा उम्मेदवारी दिएका हुन् । एक सभापतिका लागि ६ जनाको उम्मेदवारी परेको छ भने दुई उपसभापतिका लागि ७ र दुई महामन्त्रीका लागि ६ जनाले उम्मेदवारी दिएका छन् । त्यस्तै आठ जना सहमहामन्त्रीको पदमा २० जनाको उम्मेदवारी परेको छ ।

त्यस्तै केन्द्रीय सदस्यमा थारुतर्फ १४, मधेसीतर्फ ३२, आदिवासी जनजातितर्फ ८७, खसआर्यतर्फ ९३, दलिततर्फ ३९, महिलातर्फ ३१, पिछडिएको क्षेत्रतर्फ २, अपाङ्गता भएकाहरूका तर्फ १६, अल्पसंख्यकतर्फ ६, मुस्लिमतर्फ १६ जनाले उम्मेदवारी दिएका छन् । त्यस्तै खुलातर्फ १०९ जनाको उम्मेदवारी परेको छ ।

प्रकाशित मिति: शनिबार, मंसिर २५, २०७८ २०:२६