सिन्धुपाल्चोकका गुठीपीडित आन्दोलनमा, विधेयक जस्ताको त्यस्तै पास गर्न माग

A+ A A-

काठमाडौंमा प्रस्तावित गुठी विधेयक फिर्ताको माग गर्दै आन्दोलन भइरहेका बेला सिन्धुपाल्चोकका गुठीपीडित भने विधेयकको पक्षमा आन्दोलित भएका छन् ।

सिन्धुपाल्चोकका सयौं गुठीपीडित किसानले संसदमा प्रस्तुत विधेयक जस्ताको तस्तै पारित गर्न माग गरेका छन् । मंगलबार मेलम्चीमा भेला भएका पीडित किसानले विधेयकको पक्षमा आवाज उठाएका हुन् ।

गुठीपीडित किसानको आन्दोलनलाई संघीय र प्रदेश सांसदले साथ दिएका छन् । जिल्ला भूमि अधिकार मञ्चको आयोजनामा भएको कार्यक्रममा गुठीपीडितले भूमाफियाका कारण सरकार पछि हटेर विधेयक फिर्ता लिए कडा आन्दोलनमा उत्रने चेतावनी दिएका छन् ।

गुठीपीडितले धर्म संस्कृति जोगाउने नाममा आफूहरु अन्यायमा परेको बताएका छन् ।

कार्यक्रममा प्रतिनिधिसभाका सांसद शेरबहादुर तामाङले गुठीपीडितको पक्षमा सरकारले ल्याएको विधेयकलाई भूमाफियाले जबर्जस्त विवादमा ल्याएको बताए । त्यस्तै, प्रदेश सांसद एवं भूमि अधिकारका अभियन्ता सरेश नेपालले भूमिहीनलाई जसरी पनि आफ्नो जग्गाको स्वामित्व प्रदान गरेरै छाड्ने प्रतिबद्धता व्यक्त गरे ।

भूमि अधिकार मञ्चकी अध्यक्ष सरस्वती सुब्बाले हचुवाका भरमा प्रस्तावित विधेयकलाई विवादमा ल्याएको भन्दै चिन्ता व्यक्त गरिन् ।

सिन्धुपाल्चोकमा मात्रै १४८ गुठी

सिन्धुपाल्चोकमा प्रमाणित र अप्रमाणित गरी १ सय ४८ प्रकारका गुठीबाट किसान समस्यामा छन् । जिल्ला मालपोत कार्यालयको तथ्यांकमा ४५ वटा मात्र गुठीका लगत भए पनि त्यसबाहेक अरु गुठी पनि रहेको भूमि अधिकारकर्मी हरि तिमिल्सिनाले जानकारी दिए ।

जिल्लामा गुठीबाट पीडित किसानको संख्या ११ हजार १ सय ४८ छन् । गुठीले ओगटेको जमिन १ लाख ५३ हजार ८ सय २७ रोपनी छ । मेलम्ची नगरपालिका–१० र ११ को पुरै जग्गा पशुपति महास्नान गुठीको नाममा रहेको अभियानकर्ता तिमिल्सिनाले बताए ।

मेलम्ची नगरपालिकास्थित फटकशिलाका किसानले २०५१ सालसम्म पशुपतिमा चौरासी बुझाउने गरेका थिए । २०५६ सालमा किसानले आन्दोलन गरेपछि तिरो छुट भएको स्थानीय सीताराम घोरासैनीले जानकारी दिए । छुट हुँदा पनि कुत बाली तिर्नुपर्दा जग्गा नै बिक्री गर्नुपरेको उनले बताए ।

फटकशिलाका स्थानीयले २०५६ सालदेखिको सबै कुत बुझाउने हो भने अब आफूहरुसँग एक टुक्रा जग्गा पनि बाँकी नरहने अर्का गुठीपीडित गोमा तिवारीले बताइन् ।

प्रकाशित मिति: बुधबार, असार ४, २०७६ ०२:५०