कांग्रेस महाधिवेशनः दुई सय जना अट्ने मञ्च, इन्टरनेटका लागि महाधिवेशनस्थलमै एनटीसी टावर

कांग्रेस महाधिवेशनः दुई सय जना अट्ने मञ्च, इन्टरनेटका लागि महाधिवेशनस्थलमै एनटीसी टावर

A+ A A-

सत्तासीन नेपाली कांग्रेसकाे चाैधाैँ महाधिवेशन आजदेखि काठमाडाैंमा सुरु हुँदै छ । 'उत्साह, एकता, रूपान्तरणः सफल बनाऔँ १४औँ महाधिवेशन' भन्ने नाराका साथ दिउँसाे १ बजे भृकुटीमण्डपमा महाधिवेशन उद्घाटन गर्ने कार्यक्रम छ ।

महाधिवेशन उद्घाटनका लागि सो स्थानमा करिब २ सय जना बस्न मिल्ने मञ्च तयार गरिएकाे छ । याे मञ्च ८० फिट लम्बाइ र ४० फिट चौडाइको छ । बन्दसत्र हुने प्रदर्शनी कक्ष पनि आकर्षकरूपमा सजाइएको छ ।

भृकुटीमण्डप छिर्ने गेटदेखि नै पार्टी सभापति, महामन्त्री, केन्द्रीय सदस्यलगायत विभिन्न पदका आकाङ्क्षी उम्मेदवारका तुल, ब्यानर टाँगिएका छन् । राष्ट्रियसभागृह र महेन्द्र पुलिस क्लब समेत चारतारे झण्डा र प्रचार सामग्री देख्न सकिन्छ ।

चार दिनसम्म करिब पाँच हजार कांग्रेसका महाधिवेशन प्रतिनिधिले यो स्थानमा छलफल र बहस गरी नयाँ नेतृत्व चुन्नेछन् । सोही स्थानभित्र विभिन्न पदाधिकारी र सदस्यका अकाङ्क्षीले सम्पर्क कार्यालय खोलेर प्रतिनिधिलाई आकर्षण गरिरहेका छन् । महाधिवेशनमा २०० जनालाई एकैसाथ मतदान गर्ने व्यवस्था गर्न लागिएको छ । राष्ट्रियसभागृहमा मतदान गर्न २०० बुथ राख्न लागेको कांग्रेस काठमाडौंका सचिव गोविन्द पुडासैनीले जानकारी दिए ।

महाधिवेशनमा सहभागी हुने चार हजार ५०० भन्दा बढी प्रतिनिधिले ब्यालेटमै मतदान गर्नुपर्ने छ । एक जनालाई मतदान गर्न कम्तीमा पनि एक घण्टाभन्दा बढी लाग्ने पुडासैनीले बताए । २४ मंसिरमा महाधिवेशन उद्घाटन हुने र २७ गते मतदान हुने कार्यतालिका छ ।

इन्टरनेटका लागि टावर

इन्टरनेटको सहजताका लागि महाधिवेशनस्थलमा नेपाल टेलिकमको टावर स्थापना गरिएको छ । मिडिया सेन्टर, सहायताकक्ष तथा विभिन्न होल्डिङ सेन्टरसमेत बनाइएको छ । महाधिवेशन प्रतिनिधि बस्नका लागि राजधानीका ठमेल, सुन्धारा र गौशलामा गरी तीन ठाउँमा होटल बुकिङ गरिएको छ । त्यहाँ हालसम्म तीन हजार ८०० प्रतिनिधिका लागि ८६ होटल बुकिङ गरिएको आवास तथा भोजन समितिका संयोजक एवं कांग्रेस केन्द्रीय सदस्य सुरेन्द्र पाण्डेले जानकारी दिए । चार हजार ३०० महाधिवेशन प्रतिनिधि बस्न मिल्ने गरी होटल बुकिङ गरिएको उनले बताए । समितिले महाधिवेशनमा सहभागी हुने आठ हजार व्यक्तिका लागि खानाको व्यवस्था गर्ने छ । बत्तीसपुतलीस्थित अनुपम फुडल्याण्ड र बसुन्धराको दियालो फुडल्याण्डमा भोजनको व्यवस्था गरिएको पाण्डेले जानकारी दिए । याे सुविधा आजदेखि २७ गते बेलुकासम्मका लागि हाे ।

फागुन २०७२ मा कांग्रेसकाे तेह्राैँ महाधिवेशन पनि भृकुटीमण्डपमै भएकाे थियाे ।

प्रकाशित मिति: शुक्रबार, मंसिर २४, २०७८ ०५:४५