'ड्रिम माउन्टेन' प्रिमियरसँगै सुरु भयो 'किम्फ'

A+ A A-

काठमाडौं अन्तर्राष्ट्रिय चलचित्र महोत्सव (किम्फ) को १९ औँ संस्करण बिहीबारदेखि सुरु भएको छ । चलचित्र विकास बोर्डको हलमा फेस्टिभलको उद्घाटन गरिएको हो । फेस्टिभलको उद्घाटन भारत लद्दाखका चर्चित वातावरण अभियन्ता तथा रोलेक्स अवार्ड विजेता सोनम वाङचुकले वक्तव्यसहित गरे ।

वाङचुक उनै हुन्, जसको जीवनीमा आधारित रहेर फिल्म 'थ्रि इडिएट्स' बनेको थियो । जसमा आमिर खानले वाङचुकको भूमिका निर्वाह गरेका छन् ।

कोभिड–१९ महामारीको जोखिमले यसपटकको किम्फ 'हाइव्रिड' शैलीमा आयोजना गरिएको छ । फेस्टिभलमा समावेश फिल्महरू केही दर्शकको उपस्थितिमा नै देखाइनेछ भने केही अनलाइनको माध्यमबाट देखाइनेछ ।

डकुमेन्ट्री, फिक्सन, प्रयोगात्मक, सर्ट र एनिमेसन फिल्म गरी २८ मुलुकका ६० भन्दा बढी फिल्म अनलाइन र प्रत्यक्ष देखाइने छ । विश्वभरदेखि दर्शकले सबै फिल्मलाई महोत्सव अवधिभर किम्फ फिल्म फेस्टिभलको पोर्टलमा हेर्न सक्नेछन् ।

यसपटकको किम्फमा ४० फिल्म अन्तर्राष्ट्रिय प्रतिस्पर्धामा सहभागी छन् भने १३ फिल्म नेपाल पानोरमार्फत प्रतिस्पर्धी छन् । अभिनेता अनुप बराल, स्वीस फिल्ममेकर क्यारोलाइन फिंक र मारियो कासेला निर्णायकको रूपमा छन् ।

हिमाल एसोसियसनद्वारा आयोजित यस फेस्टिभल मंसिर २७ गतेसम्म चल्नेछ ।

यसपटक किम्फ फेस्टिभलको मुख्य थिम ‘क्लाइमेट कर्म’ राखिएको छ । जलवायु परिवर्तनका असर चित्रण गरिएका फिल्म, लैंगिक समानता र सशक्तीकरणका सन्देश दिने फिल्महरू किम्फमा देखाइने भएको छ ।

फेस्टिभल शुभारम्भ काइली रुडिक निर्देशित १८ मिनेट लामो वृत्तचित्र ‘ड्रीम माउन्टेन’ प्रिमियरसँगै सुरु भयो ।

उद्घाटन समारोहमा बोल्दै वातावरण अभियन्ता तथा प्रमुख अतिथि वाङ्चुकले हिमालय क्षेत्रमा देखिएको जलवायु परिवर्तन मानव सभ्यताको सबैभन्दा ठूलो खोजी प्रेम र सम्बन्ध रहेको चर्चा गर्दै उनले जलवायु परिवर्तनको असरप्रति गम्भीर बन्न सरकार र नागरिक दुवै गम्भीर बन्नुपर्ने बताए ।

आयोजक संस्था हिमाल एसोसिएसनका अध्यक्ष बसन्त थापाले जलवायु परिवर्तन यतिबेला विश्वको वास्तविक चुनौती रहेकाले यसपटकको फेस्टिभल नै जलवायुमा केन्द्रित रहेको बताए । कोभिड–१९ महामारीको जोखिम कायमै भएकाले हाइव्रिड शैलीमा फेस्टिभल गर्नुपरेको बताउँदै उनले त्यसको बाबजुद पनि भएको दर्शकीय उपस्थितिले आफूहरूलाई हौसला थपेको बताए ।

फेस्टिभल निर्देशक रम्यता लिम्बूले मानिसहरू वातावरणसँग कसरी सम्बन्धित छन् र स्थानीय तथा विश्वव्यापीरूपमा भैरहेका जलवायु परिवर्तनका प्रतिकूल प्रभावलाई कसरी कम गर्न सकिन्छ भनेर सन्देश दिनु फेस्टिभलको उद्देश्य रहेको बताइन् ।

प्रकाशित मिति: बिहीबार, मंसिर २३, २०७८ १६:२१