पौडेल पक्षमा अझै किचलो, आकांक्षी छाँट्न देउवाले खटाए कमाण्डर

A+ A A-

बुधबार नेपाली कांग्रेसको १४‍औँ महाधिवेशनको निर्वाचन कार्यतालिका सार्वजनिक भएको छ । उक्त कार्यतालिकामा २५ गते साँझ ५ गतेसम्म मनोनयन दर्ताको समय तोकिएको छ । तर संस्थापन र इतर पक्षले अझै पनि उम्मेदवारको टुंगो लगाउन सकेका छैनन् ।

सभापति शेरबहादुर देउवाले आफ्नो समूहमा आफूबाहेकका उम्मेदवार टुंगो लगाउन बाँकी छ भने पौडेल पक्षले हालसम्म सभापतिको उम्मेदवार नै टुंगो लगाउन सकेको छैन ।

बुधबार संस्थापन र संस्थापनइतर पक्षको केन्द्रीय सदस्यहरूको भेला भएको थियो । बूढानीलकण्ठस्थित आफ्नो निवासमा देउवाले बैठक राखेका थिए । बत्तिसपुतलीको पार्टी प्यालेसमा युवा नेताहरूसँग छलफल गरेको पौडेल समूहले बुधबार नै प्रकाशमान सिंहको चाक्सिबारीस्थत निवासमा दिउँसो ३ बजेदेखि साँझ ७ बजेसम्म छलफल गरेको थियो ।

देउवा पक्षबाट उपसभापतिका लागि पूर्णबहादुर खड्का र विजयकुमार गच्छदारको दाबी छ । देउवाले बुधबार राखेको बैठकमा महामन्त्रीमा बालकृष्ण खाँण, एनपी साउद र प्रकाशशरण महतले दाबी गरेका थिए । दुई महामन्त्रीको लागि तीन जनाको दाबी परेपछि महामन्त्रीमा दाबी गर्दै अवधारणा पत्र समेत सार्वजनिक गरेका प्रवक्ता विश्वप्रकाश शर्मालाई देउवाले खस आर्य समुदायबाट सह-महामन्त्रीमा उठ्न भनेका छन् । 'बैठकमा आ-आफ्नो दाबी पेस भएका छन् । मैले पहिलेदेखि नै महामन्त्रीको दाबी गरेको हुनाले मैले बैठकमा दाबी राखेँ । मेरो दाबीबाट पछि हट्ने स्थिति छैन,' नेता साउदले भने ।

पार्टीको आवश्यकताअनुसार नेतृत्वमा देउवालाई दोहोर्‍याउनुपर्ने मत बैठकमा नेताहरूले राखेको साउदले बताए । पदाधिकारीमा देउवा समूहमा आकांक्षीहरू बढी छन् । विभिन्न क्लस्टर अन्तर्गत ८ वटा सह-महामन्त्रीका लागि खस आर्यतर्फबाट देउवा पक्षका मोहनबहादुर बस्नेत, गोविन्द भट्टराई र रमेश लेखकले पनि आकांक्षा व्यक्त गरेका छन् । यस्तै, देउवा पक्षबाट दलिततर्फबाट सह-महामन्त्रीमा मीन विश्वकर्मा र मानबहादुर विश्वकर्मा, जनजातितर्फ बहादुरसिंह लामा, सीता गुरुङ, भीष्मराज आङ्देम्बे र चीनकाजी श्रेष्ठले पनि आकांक्षा प्रस्तुत गरेका छन् ।

नेताहरूको व्यवस्थापनका निम्ती सह-महामन्त्रीको संख्या बढाउनुपर्ने प्रस्तावमा पनि छलफल भइरहेको छ । 'सह-महामन्त्रीमा क्लस्टर भए पनि खुला प्रतिस्पर्धालाई समेत ध्यानमा राखेर संख्या बढाउने विकल्पमा पनि छलफल भइरहेको छ,' नेता गोविन्द भट्टराईले भने ।

पदाधिकारी टुंगो लगाउन नसकेको देउवा पक्षले प्रदेशअनुसार केन्द्रीय समितिका उम्मेदवार चयनका लागि नौ जना नेतालाई जिम्मेवारी दिएको छ । प्रदेश अध्यक्ष र उम्मेदवारसँग परामर्श गरेर आकांक्षीको नाम दिन सभापतिको निर्देशन रहेको नेतृ डिला संग्रौलाले बताइन् । 'बिहीबार १२ बजेसम्म नाम दिन भनिएको छ । त्यसपछि बैठक बसेर टुंगो लगाउने तयारी छ,' उनले भनिन् ।

सूची बनाउने जिम्मेवारी प्राप्त गरेका नेताहरूमा प्रदेश १ मा ज्ञानेन्द्रबहादुर कार्की छन् । यस्तै प्रदेश २ मा रमेश रिजाल, बागमतीमा प्रकाशसरण महत, गण्डकीमा गोपालमान श्रेष्ठ, लुम्बिनीमा बालकृष्ण खाँण, सुदूरपश्चिममा पूर्णबहादुर खड्का र जीवन बहादुर शाही र सुदुरपश्चिममा एनपी साउँद र रमेश लेखकले केन्द्रीय समितिका उम्मेदवार चयनको जिम्मा पाएका छन् ।

पौडेलले भने सबै उठ्ने भए पार्टीबाटै बिदा लिन्छु

सभापतिमा साझा उम्मेदवार तय गर्न दुई सोमबारदेखि घनिभूत छलफलमा रहेको वरिष्ठ नेता पौडेल समूहको सो प्रयास बुधबार पनि सफल भएन । नेताद्वय शेखर कोइराला र प्रकाशमान सिंहले आफ्नो अडान नछोडेपछि उनीहरूले सभापतिको उम्मेदवार छनौट गर्न नसकेका हुन् ।

महामन्त्री शशांक कोइरालाले आफूले वरिष्ठताका आधारमा पौडेललाई साथ दिन तयार रहेको भन्दै दाबेदारी छोडेको बताइसकेका छन् । नेताद्वय शेखर र प्रकाशमानले दाबी नछोडेपछि बुधबारको बैठकमा पौडेल आक्रोशित बने । 'सबै लड्ने भए म राजनीतिबाट बिदा हुन्छु, आराम गर्छु, पार्टीबाटै अलग हुन्छु,’ पौडेलले बैठकमा भनेका छन् ।

नेताहरूले सहमतिको उम्‍मेदवार टुंगो लगाउन नसकेपछि युवा नेताहरूले हस्तक्षेप गर्ने तयारी गरेका छन् । बिहीबार आकांक्षीबिनै बैठक बसेर आधारसहित सहमतिको उम्मेदवारको सूची लिएर जाने नेता गुरुराज घिमिरेले बताए । ‘उहाँहरूले सर्वसम्मत सभापतिको उम्मेदवार छान्न सक्नुभएन, समय पनि लगाउनुभयो । हामी भोलि केन्द्रीय सदस्यको बैठक बसेर सभापतिको उम्मेदवार र उम्मेदवार हुने आधारसहित नेताहरूलाई नाम बुझाउँछौँ,' घिमिरेले भने ।

बत्तिसपुतलीमा भएको भेलामा मतदानमार्फत साझा उम्मेदवार टुंगो लगाउने प्रस्ताव पनि आएको थियो । कर्णालीका नेता भूपेन्द्र शाहीले लोकतान्त्रिक प्रक्रियाअनुसार उम्मेदवार टुंगो लगाउनुपर्ने प्रस्ताव राखेका थिए ।

प्रकाशित मिति: बुधबार, मंसिर २२, २०७८ २०:३७