सिटौलालाई फकाउन देउवा-रामचन्द्रकाे दौडधुप, २० केन्द्रीय सदस्यकाे व्यवस्थापन सिटाैलाकाे सर्त

सिटौलालाई फकाउन देउवा-रामचन्द्रकाे दौडधुप, २० केन्द्रीय सदस्यकाे व्यवस्थापन सिटाैलाकाे सर्त

A+ A A-

महाधिवेशनको मिति नजिकिँदै गर्दा पदाधिकारीको टुंगो लगाउन नसकेको संस्थापन पक्ष र सभापतिको साझा उम्मेदवार छनोट गर्न नसकेको संस्थापनइतर समूहले नेता कृष्णप्रसाद सिटौलाबाट समर्थन पाउनका लागि उनलाई फकाउन थालेका छन् ।

१३औँ महाधिवेशनमा सिटौलाकै साथ पाएर सभापतिमा निर्वाचित देउवा यसपटक उनकै भरमा छन् । उनले सिटौला पक्षबाट पदाधिकारीमा बढी उम्मेदवार समेटेर आफ्नो जित सुनिश्चित गर्ने हिसाबले प्रस्ताव ल्याइरहेको सिटौलानिकट नेता भीमसेनदास प्रधानले बताए । 'अहिले पनि सभापतिमा दोहोरिने भएपछि देउवा पक्षबाट पनि विभिन्न प्रस्ताव आइरहेका छन् । आफ्नाे समूहलाई केन्द्रमा राखेर निर्णय लिने सिटौलाले बताउनुभएको छ,' प्रधानले भने ।

प्रदेश अधिवेशनको नतिजाले सिटौलासँग उनी स्वयम् नेतृत्वमा पुग्न पर्याप्त मत नभए पनि उनीसँग निर्णायक मत रहेको देखेर देउवाले यसपटक पनि उनको समर्थन जुटाउन जोडबल गरिरहेका छन् । छवटा प्रदेशमा भएको निर्वाचनमध्ये प्रदेश १ मा सिटौलानिकट उद्धव थापा निर्वाचित भए भने बागमती प्रदेशमा दोस्रो चरणमा उनले देउवा पक्षका इन्द्रबहादुर बानियाँलाई समर्थन गरेका थिए । यो पटक आफ्नो समूहमा ५ सय प्रतिनिधि रहेको त्यस समूहको दाबी छ । विगतको भन्दा पनि आफूहरू अझै बलियो रहेका सिटौला पक्षका नेता प्रदीप पौडेल बताउँछन् । 'अघिल्लो महाधिवेशनभन्दा अहिले हामी बलियो छौँ,' उनले भने ।

सिटौला अहिले पदाधिकारी र केन्द्रीय सदस्यमा आफ्नो नेताहरूको व्यवस्थापनमा केन्द्रित छन् । 'कम्तीमा पनि २० जना नेताहरूको व्यवस्थापन गर्नुपर्ने जिम्मेवारी उहाँमा छ,' नेता प्रधानले भने । यो समूहबाट नेता पौडेल उमाकान्त चौधरी, उद्धव थापा, सुधीर शिवाकोटी, शिवप्रसाद हुमागाईं बढी चर्चित छन् । सिटौला कम्तीमा पौडेल र चौधरीलाई पदाधिकारीसहित आफूनिकट अन्य नेतालाई केन्द्रीय समितिमा सुनिश्चित गर्न चाहन्छन् ।

त्यसैले आफूलाई भेट्न आएका रामचन्द्र पौडेललाई उनले सहकार्यको खाका ल्याउन भनेका छन् । आफू पक्षका युवा नेताहरूसँगको भेलाबाट निस्किएर पौडेल सिटौलालाई भेट्न पुगेका थिए । त्यहाँ उनले सिटौलालाई उपसभापतिमा उठ्न आग्रह गर्दै आफूलाई सभापतिमा सघाउन आग्रह गरेका थिए । 'रामचन्द्र दाइले सभापतिमा आफूलाई सघाउन भन्नुभएछ,' नेता प्रधानले भने ।

भेटमा नेता पौडेलले विगतमा शेरबहादुर देउवाविरुद्ध सँगै लडेकाले अहिले पनि त्यो परिस्थिति आएको भन्दै सहकार्य गर्नुपर्ने तर्क गरे । 'हिजो देउवाविरुद्ध हामी सँगै लडेका हौँ । तपाईंले देउवालाई सहयोग गर्दा नैतिक प्रश्न खेप्दै आउनुभएको छ । अहिले त्यो कुरा सुधार गर्न र पार्टीलाई सुदृढ बनाउने मौका छ । हामी वैचारिक हिसाबले सधैँ एकठाउँमा छौँ । यो पटक मिलेर जाऔँ,' नेता पौडेलको प्रस्ताव थियो ।

पौडेलको प्रस्तावपछि सिटौलाले सहकार्यको आधार ल्याउन आग्रह गरे । 'सँगै यात्राका लागि आधार तयार हुनुपर्‍यो नि । तपाईंले मनस्थिति बनाएर मात्रै हुँदैन, आधार पनि बनाउनुस् अनि विचार गरौँला,' पौडेललाई सिटौलाको जवाफ थियो ।

सिटौलाले भने २३ मंसिरपछि निर्णय लिने जवाफ दुवै समूहलाई दिएका छन् । २३ गते देशभरबाट प्रतिनिधि आइपुग्ने र उनीहरूसँग सामूहिक छलफल गरेर निर्णय लिने सिटौलाको भनाइ छ । बुधबार पनि उनले आफूनिकट नेताहरूको बैठक बोलाएका थिए । त्यस बैठकमा अधिकांश नेताहरूले देउवालाई समर्थन गर्न सुझाएका छन् ।

प्रकाशित मिति: बुधबार, मंसिर २२, २०७८ १५:१०