कांग्रेसको रुखमा ओत लाग्दै गुण्डा नाइकेहरू

A+ A A-

आपराधिक पृष्ठभूमिबाट उदाएकाहरू राजनीतिक छायामा ओत लाग्ने क्रम बढ्दो छ । अपराधको दुनियाँबाट राजनीतिमा उदाएकाहरू अहिले आफूलाई प्रजातान्त्रिक दल भन्ने नेपाली कांग्रेसको महाधिवेशनमा प्रतिनिधि बनेर आएका छन् ।

नेपाल मात्र होइन, भारतमा पनि आपराधिक गतिविधिमा सामेल भएर पक्राउ परेका काभ्रेका दावा लामा महाधिवेशन प्रतिनिधि भएर कांग्रेसको नेतृत्व छान्ने प्रक्रियामा सामेल हुँदैछन् । ०६७ देखि अपराधिक कर्ममा सामेल भएका दावाले सार्वजनिक अपराध, लागूऔषध, ज्यान मार्ने उद्योगजस्ता अभियोगमा दुई वर्ष जेल सजायसमेत काटिसकेका छन् ।

०७० मा प्रहरीबाट जोगिन राजनीतिक ओतमा पुगेका हुन्, दावा । उनलाई राजनीतिमा भित्र्याएका हुन्, तीर्थ लामाले । तीर्थ ०७० को दोस्रो संविधानसभा चुनावमा काभ्रे क्षेत्र नम्बर १ बाट निर्वाचित सांसद हुन् । प्रहरीले गुण्डा नाइकेहरूलाई इन्काउन्टर गर्न थालेपछि दावा ज्यान जोगाउन भारतसमेत पुगेका थिए ।

भारत पुग्दा पनि दावाको आपराधिक गतिविधि रोकिएन । १६ भदौ ०७५ मा दुबईबाट दिल्ली जाने क्रममा भारतीय प्रहरीले इन्दिरा गान्धी अन्तर्राष्ट्रिय विमानस्थलबाट उनलाई पक्राउ गर्‍यो । भारतमा उनीमाथि सट्टेबाजीको अभियोग लागेको थियो ।

भारतबाट छुटेर आएपछि दावालाई कांग्रेसले फेरि आफ्नो छहारीमै ल्यायो । २१ माघ ०७७ मा काभ्रेको तरुण विभागको संयोजक र बागमती प्रदेशको उपसंयोजक बनाएर दावालाई कांग्रेसले राजनीतिक आड दियो । अहिले दावा काभ्रेको भुम्लु गाउँपालिकाको पार्टी सभापति भएर महाधिवेशन प्रतिनिधि छानिएका छन् । दावा देउवाको प्यानलबाटै महाधिवेशन प्रतिनिधि र गाउँपालिका सभापति भएका हुन् ।

अपराधको बाटो हुँदै कांग्रेस छिरेका धादिङका ‘राधे’ भनिने राधाकृष्ण भण्डारी पनि महाधिवेशन प्रतिनिधि छानिएका छन् ।धादिङ क्षेत्र नम्बर १ बाट महाधिवेशन प्रतिनिधिको उम्मेदवार बनेका ‘राधे’ कांग्रेस सभापति तथा प्रधानमन्त्री शेरबहादुर देउवा प्यानलबाट छानिएका हुन् ।

गुण्डागर्दी गरेको अभियोगमा पटक–पटक पक्राउ पर्दै छुट्दै आएका ‘राधे’ पछिल्लो समय २३ असोज ०७७ मा धादिङ सिद्धलेक गाउँपालिकाका जनप्रतिनिधिलाई धाक–धम्की दिएको उजुरीका आधारमा पक्राउ परेका थिए ।

प्रहरी अभिलेखअनुसार राधेमाथि धादिङकै आयुष तामाङलाई खुकुरी प्रहार गरेको, ०७० मा धादिङबाट काठमाडौँ आउँदै गर्दा गुण्डा नाइके ‘चरी’ भनिने दिनेश अधिकारीलाई गोली हानेको अभियोग छ । पछि चरी समूहले राधेमाथि गोंगबुको एक रेस्टुरेन्टमा खुकुरी प्रहार गरेको थियो ।

हत्या र असुली धन्दाका नाइके राजु गोर्खाली भनिने राजेन्द्रबहादुर गोर्खाली पनि कांग्रेस सिन्धुपाल्चोकबाट महाधिवेशन प्रतिनिधि छानिएका छन् । सिन्धुपाल्चोक क्षेत्र नम्बर २ बाट प्रतिनिधि छानिएका गोर्खाली कोटेश्वर, चाबहिल, गौशाला, सिनामंगल क्षेत्रमा असुली धन्धा चलाउने गर्थे ।

गोर्खालीलाई पछिल्लो पटक महानगरीय अपराध महाशाखाले व्यापारीलाई धम्की दिएर पैसा असुल गरेको आरोपमा २० माघ ०७५ मा बानेश्वरबाट पक्राउ गरेको थियो । ०५९ मा राजन लिम्बूलाई काठमाडौंको दरबारमार्गस्थित रोयल डिस्कोमा तरबार हानी हत्या गरेको आरोपमा गोर्खाली १० वर्ष जेलसमेत परेका थिए ।

गोर्खालीलाई ०७४ मा राष्ट्रिय जनता पार्टी (राजपा)ले प्रतिनिधिसभाको निर्वाचनमा समानुपातिकको बन्दसूचीमा समेत राखेको थियो । गोर्खाली यसअगाडि एमालेमा पनि सक्रिय थिए ।

धादिङकै अशोक तामाङ पनि कांग्रेसको महाधिवेशन प्रतिनिधि छानिने गुण्डागर्दी पृष्ठभूमि भएका अर्का पात्र हुन् । धादिङको उत्तरी क्षेत्रमा गुण्डाराज चलाएका तामाङ हत्या अभियोगमा पक्राउ परेर छुटेका व्यक्ति हुन् ।

खनियाँबास गाउँपलिका–४ का ३२ वर्षीय सन्तबहादुर तामाङलाई खुकुरी प्रहार गरेर हत्या गरेको भन्दै प्रहरीले ०७६ माघमा अशोकलाई पक्राउ गरेको थियो । यो घटनामा रविन तामाङ गम्भीर घाइते भएका थिए । यो घटनाका मुख्य योजनाकार थिए, अशोक ।

त्रिभुवन विश्वविद्यालय (त्रिवि) उपप्राध्यापक प्रेमबहादुर चलाउनेमाथि हमला गर्ने समूहका प्रमुख योजनाकार मानिएका योगेन्द्र रावल पनि महाधिवेशनको केन्द्रीय प्रतिनिधि भएका छन् ।

चलाउनेविरुद्द ज्यान मार्ने उद्योग मुद्दामा रावललाई १७ चैत ०७७ मा उच्च अदालत पाटनले मुलुकी फौजदारी कार्यविधि संहिता, २०७४ को दफा ६८ र ७० बमोजिम ५ लाख धरौटी तथा १ लाख अन्तरिम क्षतिपूर्ति र जरिवाना तिराएर तारेखमा छोडेको थियो ।

जघन्य मुद्दाका अभियुक्त २४ मंसिरदेखि २६ सम्म काठमाडौंमा हुने महाधिवेशनमा सहभागी हुँदैछन् । टोल र क्षेत्रका यी दादाहरू आफ्नो अपराध लुकाउन राजनीतिक संरक्षणमा आउँदा उनीहरूको पहुँच र प्रभाव राज्यस्तरमै पर्ने देखिन्छ ।

प्रकाशित मिति: बुधबार, मंसिर २२, २०७८ ०७:४७