महराकाे दाबी : २८ मंसिरपछि गठबन्धन भत्काउने विदेशी चलखेल प्रस्ट देखिनेछन्

A+ A A-

माओवादी केन्द्रका प्रवक्ता कृष्णबहादुर महराले पाँच दलीय गठबन्‍धन भत्काउनका निम्ति विदेशी शक्ति सक्रिय रहेको बताएका छन् । गठबन्धन भत्काउनका निम्ति विदेशी सक्रिय रहेको तथ्य २८ मंसिरपछि प्रस्ट देखिने महराको दाबी छ ।

शिलापत्रसँग कुरा गर्दै महराले भने, 'अहिले विदेशी शक्ति वर्तमान गठबन्धन भत्काउने खेलमा लागेका छन्, २८ मंसिरपछि त्यसको संकेत थप प्रष्ट देखिँदै जालान् ।’

२८ मंसिरमा संसद् अधिवेशन आह्वान भएको छ । त्‍यस बैठकमा अमेरिकी सहायता परियोजना एमसीसी टेबुल गर्ने सरकारको तयारी छ । प्रधानमन्त्री शेरबहादुर देउवा एमसीसी टेबुल गर्ने पक्षमा छन् । यता माओवादी केन्द्र भने त्यसको विपक्षमा रहेको छ ।

संसदीय समितिमासमेत एमसीसीको विषयमा कांग्रेसकी सचेतक पुष्पा भुसाल र माओवादी केन्द्रका प्रमुख सचेतक देव गुरुङबीच मतान्तर देखिएको थियो । सोमबार संसदीय सुनुवाइ समितिको बैठकमा गुरुङले अमेरिकाले नेपालमा सैन्य अखडा तयार गर्न लागेको दाबी गरेका थिए । एमसीसीकै कारणले नेपाल अमेरिकी सैन्य अखडा हुने उनकाे तर्क थियाे ।

'उसको सुरक्षा रणनीति सैन्य क्याम्प खडा गर्दै जाने छ । हाम्रो शान्तिपूर्ण रूपमा आर्थिक विकास र स्वाधीनता हो । त्यसैकारणले अमेरिका र नेपालको परराष्ट्र नीतिको स्वार्थमा विरोधाभाष छ', उनले भनेका थिए ।

अमेरिकाले नेपाललाई सैन्य रणनीतिमा जोड्न खोजेको गुरुङले बताएका थिए । नेटोदेखि इन्डोप्यासिफिक सैन्य रणनीति बनाएर अमेरिका अगाडि बढेकाले एमसीसीले नेपालको सुरक्षा खतरामा पर्ने गुरुङको टिप्पणी थियो । त्यही समितिको बैठकमा भुसालले एमसीसी पास नगरे पछि आर्थिक सहायतामा असर पर्ने बताइन् । 'सतही टिप्पणीले विरोध गर्न हुन्न । एमसीसीको समयसीमा तोकिएको छ । यसलाई पनि ख्याल गर्नुपर्छ । भोलिका दिनमा पर्ने असर ख्याल गर्नुपर्छ,' उनको भनाइ छ ।

सत्ता गठबन्धनमा अहिले कांग्रेस, माओवादी केन्द्र, नेकपा एकीकृत समाजवादी पार्टी, जनता समाजवादी पार्टी र राष्ट्रिय जनमोर्चा छन् । यो गठबन्धनले राष्ट्रियसभा निर्वाचनसम्म मात्रै सहकार्य गर्ने प्रधानमन्त्री देउवाले साेमबार मात्रै बताएका थिए । तर गठबन्धनमा रहेका अन्य दलका नेताहरूले भने आगामी आम निर्वाचनसम्मै सहकार्य जारी रहने दाबी गर्दै आएका छन् । यद्यपि एमसीसीकै कारण गठबन्धनको भविष्य संकटमा पर्ने चिन्ता माओवादी केन्द्रलाई छ ।

प्रकाशित मिति: मंगलबार, मंसिर २१, २०७८ १२:२९