निधि बन्दैछन् निर्णायक शक्ति, फकाउँदै देउवा

A+ A A-

कांग्रेस महाधिवेशनका लागि भर्खरै प्रदेशहरूमा सकिएका अधिवेशनमा शेरबहादुर देउवा र कृष्ण सिटौलाबीचकाे माेर्चाबन्दीका कारण देउवा अझ बलिया बन्ने देखिएकाे छ । कांग्रेसभित्र लामो समयदेखि देउवा निकट मानिएका विमलेन्द्र निधिको साथ गुमाउँदा उनी कमजोर भएको आँकलन गरिएको थियो ।

राजनीतिका चतुर खेलाडीका रूपमा चिनिएका देउवाले प्रदेश अधिवेशनमा पूर्वमहामन्त्री कृष्णप्रसाद सिटौलासँग समीकरण बनाएका थिए । जसका कारण सभापतिका दावेदार पौडेल–कोइराला समूह मात्र होइन निधिसमेत दबाबमा परेका छन् ।

राजनीति वृतमा निधिलाई भावी सभापतिमा देउवालाई दबाब दिनसक्ने र कांग्रेसमा पुस्तान्तरणको बलियो दावेदारका रूपमा चर्चा भइरहेका बेला देउवाले भने सिटौलालाई साथ लिएर अघि बढ्ने रणनीति लिएको पाइन्छ ।

देउवा नयाँ सुझबुझका साथ पुनः सभापतिमा दोहोरिने बाटो समाएको भर्खरै सकिएको कांग्रेसको प्रदेश अधिवेशनको नतिजाबाट प्रष्ट हुने राजनीतिका जानकारहरू बताउँछन् । देउवा र सिटौलाबीचको पछिल्लो समीकरणका कारण प्रदेश १ र बागमतीमा यो समूहले महत्वपूर्ण जित हासिल गरेको उनीहरूको विश्लेषण छ ।

देउवा अझ शक्तिशाली बन्दै पुनः सभापतिमा दोहोरिने उपायको खोजीमा रहेको देखिन्छन् । उनी इतरका नेताहरूको रणनीति अघि नै देउवा फेरि अर्को माेर्चाबन्दीका लागि जोडबल गर्दैछन् । विश्वस्त स्रोतका अनुसार देउवा यतिबेला निधिलाई आफ्नो क्याप्पमा फर्काउन चाहन्छन् । तर, निधि मानिरहेका छैनन् । निधि कुनै पावर सेयरिङको आश्वासनमा देउवा तिरै फर्किए देउवा पुनः सभापतिमा दोहोरिने प्रवल सम्भावना हुन्छ ।

राजनीतिका जानकारहरूका अनुसार नेताहरूको ध्रुवीकरणले भावी सभापति को हुने भन्ने निर्णायक शक्ति निधिको हातमा गइरहेकाे देखिएकाे छ । देउवा र सिटौलाबीचको साझेदारीले अर्कातिर पौडेल–कोइराला समूहका नेता पनि सभापतिमा साझा उम्मेदवारको खोजीमा जुटेको छन् । सभापतिका दाबेदार चार नेताबीच शक्ति बाँडफाँट गरेरै भए पनि सभापति हत्याउने पक्षमा यो समूह छ ।

वरिष्ठ नेता रामचन्द्र पौडेल, महामन्त्री शशांक कोइराला, पूर्वमहामन्त्री प्रकाशमान सिंह र केन्द्रीय सदस्य शेखर कोइरालाले छलफल तीव्र बनाएका छन् । आफ्नो पक्षका नेताहरू मिलेर चाँडै सभापतिको उम्मेदवार टुंगो लगाउन यो समूहका युवा नेताले दबाब दिन थालेका छन् ।

पौडेल–कोइराला समूहबीच सहमति भएर सभापतिमा साझा उम्मेदवारी दिनसके देउवा र पौडेल–कोइराला समूहबीच कडा प्रतिस्पर्धा हुनेछ । यस्ताे बेला उपसभापति विमलेन्द्र निधि निर्णायक शक्ति बन्ने देखिन्छन् । उनी दुई समूहमध्ये जतातिर लाग्छन् सोही समूहको नेता भावी सभापति हुने प्रवल सम्भावना हुन्छ ।

विशेषगरी प्रदेश २ मा निधिको पकड बलियो मानिएकाे छ, तर यसै प्रदेशअन्तर्गतमा जिल्ला अधिवेशनहरूमा देउवाले चलाखीपूर्ण ढंगले आफ्ना प्रतिनिधि जिताउन सफल भएका छन् । निधि शक्ति बाँडफाँट गरेर देउवाइतर समूहसँग मिलेर अघि बढ्ने सम्भावना बढी छ । निधिले यसअघि नै पौडेल पक्षका प्रकाशमान सिंह र शशांक कोइरालासँग मिलेर जाने गरी सन्देश दिइरहेका छन् । निधि, सिंह र शशांकबीच पटक–पटक भेटघाट भइसकेको छ ।

प्रकाशित मिति: मंगलबार, मंसिर २१, २०७८ १२:१७