राजनीतिक प्रतिवेदन लेख्न व्यस्त रहेका प्रचण्डले घटाए भेटघाट

A+ A A-

नयाँ नेतृत्वसहित राजनीतिक र वैचारिक विषय टुंगो लगाउन माओवादी केन्द्रले राष्ट्रिय सम्मेलन गर्दैछ । आगामी ११-१३ पुसमा काठमाडौंमा हुने पार्टीकाे राष्ट्रिय सम्मेलनमा अध्यक्ष पुष्पकमल दाहाल 'प्रचण्ड' ले राजनीतिक प्रतिवेदन पेस गर्नेछन् ।

प्रतिवेदन तयारीका लागि प्रचण्ड व्यस्त रहेका छन् । यतिबेला प्रचण्ड राजनीतिक भेटघाटलाई समेत कम गर्दै प्रतिवेदनमा समेट्ने विषयबारे पार्टी नेताहरूसँग समेत परामर्शमा रहेको उनी निकट नेताहरू बताउँछन् ।

‘नयाँ विचार र राजनीतिक कार्यदिशासहितको क्रान्तिकारी पार्टी निर्माण गर्ने ऐतिहासिक कार्यभार हाम्रो सामु विद्यमान छ, १७ मंसिरमा दाहालद्वारा जारी पार्टी परिपत्रमा उल्लेख थियो । आगामी प्रतिवेदनमा माओवादी केन्द्र देशका सबै उत्पीडितको प्रतिनिधित्व गर्ने पार्टी रहेको दाबी गर्दै प्रचण्डले यसलाई समाजवाद निर्माणको मुख्य शक्तिका रूपमा विकास गर्ने प्रस्ताव गर्ने बुझिएको छ ।

उनी निकट नेताहरूका अनुसार दाहालले प्रतिवेदनमा पार्टीले अंगीकार गरेको ‘एक्काइसौं शताब्दीको वैज्ञानिक समाजवाद’ को आर्थिक, राजनीतिक र सांस्कृतिक स्वरूपको विश्लेषण गर्नेछन् । नयाँ विचार र राजनीतिक कार्यदिशासहितको नयाँ क्रान्तिकारी पार्टीका रुपमा समाजवाद निर्माणमा पार्टीलाई अघि बढाउने कार्यभार माओवादीको रहेको प्रतिवेदनको मूल सार रहनेछ ।

साथै केन्द्रीय सरकार, प्रदेश सरकार र स्थानीय सरकारले आफ्नो क्षेत्रभित्र समाजवाद उन्मुख अर्थराजनीतिक कार्यक्रमलाई प्रतिवेदनमा उल्लेख गरिनेछ । यसका साथै राष्ट्रिय सम्मेलनमा विधान र समसायिक प्रस्ताव प्रस्तुत हुनेछन् । विधानको आवश्यक परिमार्जन गर्न देव गुरुङको संयोजकत्वमा माओवादी केन्द्रले जनार्दन शर्मा, लीलामणि पोखरेल, पम्फा भुषाल र मातृका यादवसहितको पाँच सदस्य समिति गठन गरेको छ ।

राष्ट्रिय सम्मेलनमा करिब १ हजार ५ सय प्रतिनिधि सहभागी हुने माओवादीले बताएको छ । सम्मेलनमा केन्द्रीय सदस्य स्वतः प्रतिनिधि हुने बताइएको छ । त्यस्तै, प्रत्येक प्रदेशले कम्तीमा १ जना घाइते/अपांगहरूलाई राष्ट्रिय सम्मेलनको प्रतिनिधि अनिवार्य चयन गर्नुपर्ने निर्णय माओवादीले गरेको छ ।

सम्मेलनमा प्रत्येक प्रदेशबाट ३० जनाका दरले प्रतिनिधि छनोट गर्ने र बाँकी १ हजार ५ सय संगठित सदस्य बराबर १ जना प्रतिनिधि चयन गर्ने निर्णय माओवादीले गरेको छ ।

भूगोलबाट निर्वाचित भएर ८ सय र केन्द्रीय पदाधिकारीबाट करिब ५ सय (केन्द्रीय सदस्य र केन्द्रीय सल्लाहकारबाट सबै र केन्द्रीय विभागबाट ३/३ जना) राष्ट्रिय सम्मेलनका प्रतिनिधि हुनेछन्, त्यसबाहेक केन्द्रीय कार्यालयले ५ प्रतिशत मनोनीत गरी बढीमा १ हजार ५ सय प्रतिनिधि सहभागी हुने माओवादीले बताउँदै आएको छ ।