रंगशालामा ८ वर्षपछि बल्ल देखियो दर्शकको भिड

A+ A A-

६ वर्षपछि अर्थात् २०७६ सालमा 'शहीद स्मारक ए डिभिजन लिग' दशरथ रंगशालामा फर्कियो । ८ वर्षपछि अर्थात् २०७० सालपछि त्रिपुरेश्वरको रंगशाला सुनसान बनेको थियो ।

२०७१ सालमा ए डिभिजिन लिग आयोजना भएन । १२ वैशाख २०७२ मा विनाशकारी भूकम्पले त्रिपुरेश्वरको दशरथ रंगशाला भद्रगोल बनायो । राष्ट्रिय खेलकुद परिषद् (राखेप) ले समयमा मर्मत सम्भार गर्न नसक्दा लामो समय रंगशाला सुनसान बन्नुपर्‍यो ।

२०७५ सालमा सातदोबाटोस्थित एन्फा कम्प्लेक्स र सशस्त्र प्रहरी बलको हलचोकमा ए डिभिजन लिग आयोजना भयो । तर, ती खेलमा दर्शकको उपस्थिति शून्यजस्तै थियो ।

लामो समयपछि दशरथ रंगशाला फर्किएको ए डिभिजन लिग - २०७६ मा दर्शकको उलेख्य उपस्थिति रहने अखिल नेपाल फुटबल संघ 'एन्फा'को विश्वास थियो । तर, चिटिक्‍क परेको रंगशालामा दर्शकको उपस्थिति शून्यजस्तै थियो । खेलाडीहरू दर्शकबिना नै मैदानमा उत्रिए ।

कोभिडका कारण २०७७ मा लिग आयोजना भएन ।

अहिले रंगशालामा 'शहीद स्मारक ए डिभिजन लिग' चलिरहेको छ । खेलमा दर्शकको उपस्थिति आश्चर्यजनक नै छ । टिकट काटेर रंगशाला छिर्ने दर्शकको खडेरी लाग्ने ए डिभिजनमा अहिले दर्शक खचाखच देखिन्छन् ।

मनाङ मस्याङ्दी, मच्छिन्द्र, थ्री स्टार, आर्मी, च्यासलजस्ता क्लबको खेलमा दर्शकको भिड लाग्ने गरेको छ । टिम र खेलाडीका लागि अहिले चर्को हुटिङ सुन्न थालिएको छ । हजारौँ समर्थकको हुटिङ र तालीका बीच खेलाडीले उत्साहजनक रूपमा फुटबल खेलिरहेका छन् ।

खेलमा आफ्नो टिम र खेलाडीलाई समर्थन गर्न बच्चादेखि वृद्धसम्म रंगशाला पुगेको देख्न सकिन्छ ।

एन्फाका वरिष्ठ उपाध्यक्ष पंकज नेम्वाङ दर्शकको उपस्थितिले खुसी बनाएको बताउँछन् ।

उनले भने, 'दुई वर्ष हामी दर्शकलाई खेलमा आकर्षित गर्न असफल भएका थियौँ । यस वर्ष भने हामी सफल भएका छौँ । दर्शकको उलेख्य उपस्थितिले हामीलाई खुसी बनाएको छ ।'

दर्शकलाई आकर्षित गर्नका लागि साताको 'विकेण्ड'मा मात्र खेल राखिएको छ । टिकटको पैसा पनि १ सय रुपैयाँ मात्रै राखिएको छ । यसले पनि दर्शकको उपस्थिति बढाएको पंकजले बताए ।

'पहिला दैनिक खेल हुन्थ्यो । दर्शकले समय मिलाउन सक्दैनथे । अहिले बिदाको समय मिलाएर मात्रै खेल राखिएको छ । त्यसले दर्शकलाई आकर्षित गरेको छ', पंकज आफूहरू दर्शक आकर्षित गर्न सकेकोमा खुसी सुनिए ।

खेलमा आकर्षण गरेको समय र टिकट दरले मात्र होइन । पछिल्लो समय नेपाली फुटबलप्रति साँच्चिकै दर्शकको चासो बढेको छ । यसमा राष्ट्रिय टोलीका मुख्य प्रशिक्षक अब्बुदल्लाह अल्मुताइरीको पनि हात छ ।

प्रशिक्षक अल्मुताइरीले नेपाली फुटबललाई नयाँ उचाइ दिएका छन् । सधैँ गोलको खडेरी हुने नेपाली फुटबल टिमले अल्मुताइरीको प्रशिक्षणमा गोल निकाल्न सफल देखिएको छ । यसले पनि दर्शकमा फुटबलप्रतिको चासो बढाएको छ ।

उपाध्यक्ष पंकज सागमा नेपाली टिमले देखाएको खेल कौशलताले पनि दर्शकलाई रंगशालासम्म तानेको स्वीकार्छन् ।

उनले भने, 'सगमा नेपालले पहिलो पटक फाइनलमा स्थान बनायो । उक्त खेलबाट खेलाडीहरूले राम्रो समर्थक कमाएका छन् । त्यहीँ समर्थकहरू अहिले रंगशालासम्म आएका छन् । खेलाडीले राम्रो खेल प्रदर्शन गर्न सके पनि घरेलु लिगहरूमा दर्शकको उपस्थिति बढ्ने रहेछ ।'

कोरोनाका कारण लामो समय बन्द कोठामा थुनिएका मानिसहरू मनोरञ्जनका लागि पनि खेल हेर्न मैदान आउने गरेको पंकजको विश्लेषण छ ।

ए डिभिजन लिगमा अहिले तेस्रो चरणको खेल जारी छ ।

प्रकाशित मिति: सोमबार, मंसिर २०, २०७८ १७:५९