सस्तो सेवा भनेर नाम कमाएको पठाओले के यात्रु ठगेकै हो त !

A+ A A-

ललितपुरका कृष्ण सिंह लोथ्यालले गत मंसिर १३ गते बुद्धनगर स्थित अफिसबाट लगनखेल जान पठाओ बोलाए । पठाओमा उनको भाडा १ सय ४९ रुपैयाँ देखायो । पछि उनले विवरण हेर्दा आधार शुल्क ३०, ५.५ किलोमिटरको ९४.४ र सर्ज शीर्षकमा १.२ (२० प्रतिशत) अनुसार २४.९६ जोडिएको रहेछ ।

‘मोटरसाइकल सर्भिसिङमा दिएको बेलामा सस्तो पर्छ भनेर पठाओ प्रयोग गरियो । यो ट्याक्सी जत्तिकै महंगो रहेछ नी ! ’ उनले भने ।

बुद्धनगरका नवराज कार्की गत कात्तिक १७ गते बुद्धनगरबाट कलंकीसम्मका लागि पठाओ बोलाए । उनको भाडा २ सय १ रुपैयाँ उठेको रहेछ । सर्ग शीर्षकमा १.४ अर्थात ५७ रुपैयाँ १२ पैसा जोडिएर आएको रहेछ ।

‘पहिले सरकारले पठाओ बन्द गर्न खोज्दा सामाजिक संजालमा बिरोध गरियो । अहिले विभिन्न शीर्षकमा पैसा तोकेर दु:ख दिइरहेको छ,’ उनले भने ।

कम्पनीले आफ्नो फाइदाको लागि यात्रुसँग अनाकमा पैसा लिएको कुरा गलत भएको पठाओका क्षेत्रीय निर्देशक अशिममान सिंह बस्न्यातले दाबी गर्छन् ।

राइडरको आम्दानी बढाउन कम्पनीले क्वेस्ट, बुस्ट र सर्ज गरी ३ वटा सुविधा दिएको उनले बताए ।

‘क्वेस्टमा कम्पनीले निश्चित राइड पुर्‍याएपछि राइडरलाई केही पैसा दिन्छ । यसले गर्दा राइडर संलग्नता बढ्न जान्छ । त्यस्तै बुस्ट सुविधामा थोरै राइडर भएको ठाउँमा हामीले लिने कमिशन घटाउँदै जान्छौं । अझ राइडरनै नभएको ठाउँमा कमिशन नै लिदैनौं,’ उनले भने ‘ त्यस्तै मुख्य विवाद रहेको सर्ज हो । यस अन्तरर्गत क्वेस्ट र बुस्टबाट पनि राइडर उपलब्ध हुन नसकेमा प्यासेन्जरसगँ सर्ज चार्ज अधिकतम २० प्रतिशत अतिरिक्त शुल्क लिएर त्यो पैसा राइडरलाइनै दिन्छौं,’ उनले भने ।

त्यस्तै दशै र तिहारको समयमा राइडर नहुँदा ३० प्रतिशत पुर्याइएको र हाल पुन २० कै क्याप लगाइएको उनले बताए । सर्जले राइडर र प्यासेन्जर दुवैलाई फाइदा पुग्ने उनको तर्क छ । त्यसै गरी रातिकाे समयमा पनि सर्ज लागुहुने भएकाले यात्रुले सजिलै सेवा पाउने उनले बताए ।

‘कसैलाई कुनै एक ठाउँमा राइड चाहिएको छ र त्यहाँ कुनै राइडर उपस्थित छैनन् भने प्यासेन्जरले थोरै पैसा बढी तिर्दा त अर्काे ठाउँबाटै भनेपनि राइडर लिन जान्छ । यसले गर्दा यात्रुको पनि काम बन्यो र राइडरको कमाई पनि बढ्यो,’ बस्न्यातले भने ।

सर्ज सिस्टम उबर जस्ता अन्तरराष्ट्रिय प्लयाटफर्ममा चलिरहेको उनले स्पष्ट पारे ।
पठाओ कुनै कानुनबाट चलेको नहुनाले यातायात व्यवस्था विभागले केही गर्न नमिल्ने विभागका महानिर्देशक नमराज घिमिरेकाे भनाइ छ ।

‘हाम्रो कानुनले राइड सेयरिङलाई अहिलेसम्म माान्यता नदिएको हुनाले वर्तमान यातायात ऐनले यिनीहरुलाई चिन्दैन । हामीले यो विषयमा केही बोल्न मिल्दैन,’ उनले भने ।

प्रकाशित मिति: मंगलबार, मंसिर २१, २०७८ ११:१८