कोइरालाको गढमा देउवाले गाडे झण्डा, गृहप्रदेशमै शेखर-शशांकलाई धक्का

A+ A A-

नेपाली कांग्रेसको १४औँ महाधिवेशनमा सभापतिका आका‌ंक्षीद्वय शेखर काेइराला र शशांक काेइरालाई गृहप्रदेशमै ठूलाे धक्का लागेकाे छ । यसअघि वडा र पालिका अधिवेशनमा एकलौटी वर्चस्व कायम गरेको पौडेल–कोइराला समूहले प्रदेश अधिवेशनमा त्यसलाई कायम राख्न सकेन ।

प्रदेश अधिवेशनअन्तर्गत सम्पन्न निर्वाचनमा पार्टी संस्थापन र नेता कृष्ण सिटौला गठबन्धनले कोइराला परिवारको आधार क्षेत्र मानिँदै आएको प्रदेश १ मा कब्जा जमाएको छ । प्रदेश १ मा देउवा–सिटौला र पौडेल–कोइराला समूहले छुट्टा छुट्टै प्यानल बनाएर निर्वाचन लडेका थिए ।

सभापतिमा देउवा–सिटौला समूहबाट झापाका उद्धव थापा निर्वाचित भएका छन् । थापाले संस्थापनइतर समूहका नेता गुरुराज घिमिरेलाई २ मतले पराजित गरे । आज बिहान सम्पन्न अन्तिम मतपरिणाम अनुसार थापाले ८४४ मत प्राप्त गरे भने घिमिरेले ८४२ मत ल्याए ।

सभापतिसहित ९ जना प्रदेश पदाधिकारीमा २ जनाले मात्र संस्थापनइतर समूहबाट विजय हासिल गरेका छन् । महामन्त्री उमेश थापा र सहमहामन्त्रीमा रोहितकुमार शाहबाहेक देउवा‒सिटौला समूहका नेताहरू निर्वाचित भएका छन् ।

उपसभापतिमा देउवा‒सिटौला समूहका रमेशजंग रायमाझीले ८९० र टंकप्रसाद राईले ८ सय ४७ मत ल्याएर निर्वाचित भए । महामन्त्रीमा भुपेन्द्र थापा ८ सय २४ र उमेश थापा ८ सय २३ मत ल्याएर विजयी भए । सहमहामन्त्री महिलामा प्रमिला गच्छदारले ८ सय ३७ मत ल्याएर विजयी भएकी छन् ।

खुल्लातर्फ सहमहामन्त्रीमा खड्ग फागोले १ हजार २६, विनोदकुमार बस्नेत ७ सय ४७ र रोहितकुमार शाहले ६ सय ६५ मत ल्याएर विजयी भएको निर्वाचन समितिका अधिकृत भरत थापाले जानकारी दिए । पदाधिकारी बाहेक अन्यको मतगणना जारी रहेको निर्वाचन समितिका अधिकृत थापाले बताए ।

प्रकाशित मिति: सोमबार, मंसिर २०, २०७८ १०:०७