यु–१९ क्रिकेटको उपाधि लुम्बिनीलाई, सुदूरपश्चिम उपविजेता

A+ A A-

सुदूरपश्चिम प्रदेशलाई हराउँदै लुम्बिनी प्रदेशले वाई–वाई यू–१९ पुरुष क्रिकेट प्रतियोगिताको उपाधि जितेको छ । कीर्तिपुरस्थित त्रिभुवन विश्वविद्यालयको मैदानमा भएको खेलमा लुम्बिनीले सुदुरपश्चिमलाई ११३ रनले पराजित गरेको हो ।

२१३ रनको लक्ष्य पछ्याएको सुदुरपश्चिम २८.३ ओभरमा सबै विकेट गुमाउँदै ९९ रनमा समेटिएको थियो । जितसँगै लुम्बिनीले नगद २ लाख रुपैयाँ पुरस्कार पाएको छ । उपविजेता सुदूरपश्चिमले एक लाख रुपैयाँमा चित्त बुझाएको छ ।

मध्य लक्ष्य पाएको सुदुरपश्चिमका लागि लोकेश बमले सर्वाधिक २५ रनको पारी खेल्दा ओपनर कप्तान खडक बोहरा २१, शेर मल्लले १५ तथा नारायण जोशीले ११ रन जोड्नुबाहेक अरु ब्याट्सम्यानले दोहोरो अंकको स्कोर गर्न सकेनन् ।

सुदुरपश्चिमलाई सस्तैमा समेट्न लुम्बिनीका अजय चौहानले सर्वाधिक ५ विकेट लिए । त्यस्तै दुर्गेश गुप्ताले ३ विकेट तथा मोहम्मद हुसेनले २ विकेट हात पारे ।

यसअघि टस हारेर पहिले ब्याटिङ गरेको लुम्बिनीले निर्धारित ५० ओभरको खेलमा सबै विकेट गुमाएर २ सय १२ रन जोडेको थियो । लुम्बिनीका लागि कप्तान देव खनालले सर्वाधिक ७० रनको योगदान गरे । देवले ९५ बल खेल्दै ५ चौका र ४ छक्का प्रहार गरे । त्यस्तै विशाल विक्रम केसीले ५१, दुर्गेश गुप्ताले ३२ तथा प्रज्वल थापाले २४ रन जोडे ।

सुदूरपश्चिमका आकाश चन्दले सर्वाधिक तीन विकेट हात पारे । शेर मल्ल र हेमन्त धामीले समान दुई/दुई विकेट आफ्नो नाममा लेखाए । नरेन साउद र राहुल भण्डारीले एक/एक विकेट लिए ।

प्रतियोगितामा प्यलेयर अफ दि म्याच लुम्बिनीका अजय चौहान चुनिँदा लुम्बिनी मोहम्म हुसेन उत्कृष्ट बलर, लुम्बिनीकै देभ खनाल उत्कृष्ट ब्याट्स म्यान तथा प्रतियोगिताको उत्कृष्ट खेलाडी लुम्बिनीकै मोहम्मद हुसेन नै चुनिए

राउन्ड रोबिनको आधारमा खेलाइएको प्रतियोगितामा सातवटै प्रदेशको सहभागिता रहेको थियो ।

प्रकाशित मिति: आइतबार, मंसिर १९, २०७८ १८:५२