'ठेकेदार नेता'ले पुल अलपत्र पारेपछि स्याङ्जालीले गुहारे प्रदेश सरकार

A+ A A-

दुई वर्षमा सक्ने भनेर निर्माण थालिएको पुल सात वर्षसम्म नसकिएपछि स्याङ्जालीले गण्डकी प्रदेश सरकारलाई गुहारेका छन् ।

स्याङ्जाको आँधिखोला गाउँपालिकास्थित आँधिखोलामा निर्माण थालिएको पुल सम्झौताअनुसार गत २०७३ साल असोजमा सकिनुपर्ने थियो । तर, अहिलेसम्म बनेको छैन । ठेकेदारले पटकपटक निर्माण समयावधि थपिरहेका छन् ।

ठेकेदारलाई पटकपटक आग्रह गर्दा अटेर गरेपछि कांग्रेस आँधिखोला गाउँपालिका कार्यसमितिले आइतबार मुख्यमन्त्री कृष्णचन्द्र नेपाली पोखरेललाई जिल्लाको समस्या सुनाएको छ । कांग्रेसका स्याङ्जा जिल्ला सभापति राजु थापासहित जिल्लाका कांग्रेस नेता/कार्यकर्ताको टोलीले मुख्यमन्त्रीलाई भेट्न उनको निवासमा पुगेका थिए ।

उनीहरूले ठेकेदारलाई काम थाल्न कडा निर्देशन दिन मुख्यमन्त्रीलाई आग्रह गरेका छन् । ‘नेपालकै पहिलो पर्यटकीय गाउँ पञ्चमुल सिरुवारी आवतजावत गर्न कठिनाइ हुनुका साथै गाउँपालिकाको सेवा लिन आउने वडा नम्बर १ र ६ का नागरिकलाई ज्यादै पिरमर्का परेकाले सम्बन्धित ठेकेदारलाई यथाशीघ्र पुल निर्मार्ण कार्य सम्पन्न गर्न कडा निर्देशन प्रदान गरिदिनुहुन यो पत्र पेस गरिएको छ,’ मुख्यमन्त्रीलाई कांग्रेस आँधिखोला सभापति नरेन्द्रराज पौडेलले बुझाएको ज्ञापनपत्रमा भनिएको छ ।

‘ठेकेदार नेता’ले अलपत्र पारे पुल, जनता भन्छन्– मान्छेको गुण बाँकी भए बनाउनुस्

निर्माणाधीन पुलले आँधिखोला गाउँपालिकाको ५ र ६ नम्बर वडा जोड्छ । पुल अलपत्र छाड्नेहरू दुई ठूला पार्टी एमाले र कांग्रेसका नेता हुन् । पुल बनाउने जिम्मा कान्छाराम–आशेष जेभीले पाएको थियो । यो जोइन्ट भेन्चरका दुई साहुजी हुन् पूर्णबहादुर लामा (कान्छाराम) र ऋषिराम गौतम । कान्छाराम कांग्रेस र ऋषिराम एमाले निकट हुन् । कान्छारामा गत प्रतिनिधिसभा निर्वाचिनमा रामेछाप क्षेत्र नम्बर २ बाट पराजित भएका थिए । हालैको १४औँ महाधिवेशनबाट उनै ठेकेदार लामा रामेछापको जिल्ला सभापति बनेका छन् । ऋषिराम एमालेको कास्की जिल्ला कमिटी सदस्य हुन् ।

२०७३ साल २५ असोजमा काम सक्ने गरी २०७१ साल २६ असोजमा ठेकेदार कम्पनीसँग सम्झौता भएको थियो । भ्याटबाहेक दुई करोड ८९ लाख ९५ हजार रुपैयाँ लागतमा ४० मिटर लम्बाइ र सात मिटर चौडाइ बनाउने भनिएको पुलको ठेक्का कान्छाराम–आशेष जेभीले पाएको थियो । सेतीदोभान तरेर दक्षिण एसियाकै पहिलो होमस्टे सिरुबारी पुगिन्छ । पुल समयमै नसकिँदा बर्खामा खोलाबाट वारपार गर्न निकै कठिन हुने गरेको छ ।

आँधिखोला गाउँपालिकाभित्रै पर्ने अर्को पुल निर्माणमा पनि ढिलासुस्ती भएको भन्दै मुख्यमन्त्रीलाई भेट्न पुगेको टोलीले त्यसबारे ध्यानाकर्षण गराएको छ । गुरुकुल वेदविद्याश्रम मावि जाने स्थानीय भैरवकुण्डको पक्की पुल निर्माणमा पनि ढिलाइ भएको सभापति पौडेलले बताएका छन् । प्रदेश सरकारको भूमिका खोज्दै त्यो पुल निर्माण पनि समयमै सक्न स्थानीयले ठेकेदारलाई आवश्यक निर्देशन दिन माग गरेका छन् ।

प्रकाशित मिति: आइतबार, मंसिर १९, २०७८ १४:५३