कोरोना महामारी रोकथाममा राष्ट्रपतिको चासो, ओमिक्रोन भेरियन्टबारे स्वास्थ्यमन्त्रीसँग छलफल

कोरोना महामारी रोकथाममा राष्ट्रपतिको चासो, ओमिक्रोन भेरियन्टबारे स्वास्थ्यमन्त्रीसँग छलफल

A+ A A-

राष्ट्रपति विद्यादेवी भण्डारीले कोभिड–१९ महामारी रोकथाम र नियन्त्रणका सम्बन्धमा चासो राखेकी छन् । उनले आज स्वास्थ्य तथा जनसङ्ख्यामन्त्री विरोध खतिवडा र मन्त्रालयका उच्च अधिकारीसँग यसबारेमा छलफल गरेकी हुन् ।

राष्ट्रपति कार्यालय शीतल निवासमा आयोजित छलफलमा भण्डारीले कोरोना भाइरसको नयाँ भेरियन्ट ‘ओमिक्रोन’बाट जोगिन विगतका अनुभवबाट पाठ सिकेर तत्काल सावधानी अपनाउन आवश्यक रहेको बताइन् ।

ओमिक्रोनबाट नागरिकको जीवनरक्षा गर्न जनस्वास्थ्यका मापदण्ड पालना गर्नेबारे जनचेतनाका कामलाई निरन्तरता दिनुपर्ने उनको भनाइ छ ।

'विस्तारै सामान्य अवस्थातिर फर्किन लागेको हाम्रो जनजीवन फेरि कोरोना भाइरसको त्रासमा रहनुपर्ने अवस्था आउने हो कि भन्ने चिन्ता यसबाट बढेको छ,' उनले भनिन्, 'जनताको जीवन रक्षा हाम्रो एक मात्र प्राथमिकता भएकाले नयाँ भेरिoन्टबाट जोगिन विगतका हाम्रा अनुभवबाट पाठ सिकेर तत्काल सावधानी अपनाउन आवश्यक छ ।'

राष्ट्रपति भण्डारीले पछिल्लो समय विश्वका विभिन्न मुलुकमा फेरि कोरोना भाइरसको नयाँ भेरियन्ट ‘ओमिक्रोन’ देखापरेको र अघिल्ला भेरिएन्टको तुलनामा यसको सङ्क्रमण दर पनि धेरै हुने भनिएको उल्लेख गर्दै नयाँ भेरिएन्टबाट बच्न दक्षिण अफ्रिका, नेदरल्याण्ड्सलगायत कतिपय मुलुकमा नयाँ सुरक्षा मापदण्ड घोषणा गरिएको सन्दर्भ उल्लेख गरिन् ।