उग्र गर्मीका कारण बिहारमा १ सय ४८ जनाको मृत्यु

A+ A A-

भारतको बिहार राज्यमा गर्मी र ‘लु’का कारण शनिबारदेखि अहिलेसम्म १ सय ४८ जनाको मृत्यु भइसकेको छ । सोमबार नवादा जिल्लामा थप पाँच जनाको मृत्यु भएको छ । राज्यमा आइतबार ७७ जनाको र शनिबार ६६ जनाको मृत्यु भएको थियो ।

गया शहरमा धारा १ सय ४४ लागू गरिएको छ, मानिसहरुलाई दिउँसो भेला हुन पनि रोक लगाइएको छ । नितीश कुमार नेतृत्वको सरकारले राज्यका सबै सरकारी र निजी विद्यालयलाई २२ जुनसम्मका लागि बन्द गर्न आदेश दिएको छ । त्यहाँकाे मौसम विभागले राज्यमा प्रचण्ड गर्मी अझै दुई तीनसम्म जारी रहने बताएको छ ।

नालंदाको पावापुरी मेडिकल कलेजमा सोमबार पाँच जनाको मृत्यु भएको छ । अस्पताल अध्यक्ष ज्ञान भूषणले लुका कारण बिरामी परेका ५८ जनाको उपचार भइरहेको जानकारी दिएका छन् । अर्कोतिर, प्रशासनले गया जिल्लामा धारा १४४ लागू गर्दै दिनको समय (बिहान ११ बजेदेखि अपरान्ह ४ बजेसम्म) मानिसहरुलाई खुला स्थानमा एकत्रित हुन रोक लगाएको छ । यस क्रममा सबै खालका निर्माण कार्य पनि बन्द गरिनेछ ।

औरंगाबादमा हर आधा घन्टामा एक जनाकाे मृत्यु

औरंगाबाद जिल्लामा लूबाट दुई दिनमा ६३ र गयामा ३४ जनाको मृत्यु भइसकेको छ । औरंगाबादमा आइतबार पनि डाक्टरहरु व्यस्त थिए । हर आधा घण्टामा एक जनाको मृत्यु भइरहेको थियो । आइतबार नै नवादामा १७, पटनामा ११, बक्सरमा सात र आरामा पाँच जनाको मृत्यु भएको छ ।

पटनामा ४५ र गयामा ४४.४ डिग्री तापमान

आइतबार पटनामा सबैभन्दा बढी गर्मी थियो । पटनाका अधिकतम तापमान ४५ डिग्री थियो जो शनिबारको तुलनामा ०.८ डिग्री कम हो । उता, गयाको अधिकतम तापमान ४४.४, भागलपुरको ४१, मुजफ्फपुरको ४२.६ डिग्री रह्यो ।