रोचक बन्दै नाडाको निर्वाचन, कसले मार्ला बाजी ?

A+ A A-

गत बुधवार व्यवसायी करण चौधरीले २२ मंसिरमा हुन लागेको नाडा अटोमोबाइल्स एसोसिएसन अफ नेपाल (नाडा) को ४५औँ साधारणसभा तथा उक्त सभाले नेतृत्व चयन गर्ने निर्वाचनमा आफ्नो प्यानलबाट चुनाव लड्नेहरूको नाम सार्वजनिक गरे ।

ठूलादेखि साना व्यवसायीहरूको साथ आफूलाई भएकाले जित सुनिश्चित भएको उनको दाबी छ । नेपालमा चलेका ब्राण्डहरूले आफूलाई सर्मथन गरेका कारण आफ्नो जित सुनिश्चित भएको उनको दाबी छ ।

उनको प्यानललाई दुईपांग्रेमा यामाहा, हिरो, होण्डा, सुजुकी, बजाज, रोयल इन्फिल्डको समर्थन रहेको उनले जानकारी दिए । त्यस्तै टायरमा केटा, बिकेटी, डेल्टा, मिचेलिनको समर्थन रहेको उनले जानकारी दिए ।

त्यस्तै लुब्रिकेन्ट तर्फ गल्फ, पीएलओ, म्याक्स, ईएनआई, एचपी, एससीटी र गाडीतर्फ सुजुकी टाटा, महिन्द्रा, अशोक लेल्याण्ड, आइसर, जिप, स्कोडा, फोटोन, च्याङ्जन, जेसीबी, स्र्कट, टेफ, रेनालगायत ब्राण्डहरूको समर्थन रहेको उनको दाबी छ ।

चौधरीको प्यानलमा अनुपकुमार बराल, सुरेन्द्रकुमार उप्रेती, विक्रम सिंहानियाँ, राजनबाबु श्रेष्ठ, अभिक ज्योती, मिलनबाबु मल्ल, नीलमणि पाठक, पंकज अग्रवाल, राजेन्द्र अग्रवाल, वर्ण न्यौपाने, सुनील रिजाल, वरदान बस्नेत, निशान ढकाल, प्रकाश कपुरी, देवराज भण्डारी, गोपाल भट्टराई र गंगाराज भट्टराई छन् ।

त्यसैगरी, बिहीबार अध्यक्षका अर्का प्रत्यासी ध्रुव थापाले पनि आफ्नो प्यानल सार्वजनिक गरे । आफ्नो प्यानल नाडाको इतिहासकै समावेशी प्यानल भएको थापाको दाबी छ । उनले आफ्नो प्यानलमा महिलालाई पनि स्थान दिएका छन् । ३ हजार १ सय ९० मतमध्ये धेरैजसो मोफसलको भएको र मोफसलको सर्मथन आफूलाई रहेको थापाको दाबी छ ।

त्यसैगरी टीभीएस, प्रोटोन, चेरी, सिट्रोन, फोर्ड, डाट्सन, निशान, फोर्स, क्यासट्रोल, सेल, विवाईडी, स्टुड, बोस, बजाज, टोयोटा, दुगढ महिन्द्रा लगायत ५०/६० वटा ब्राण्डले आफ्नो प्यानललाई सर्मथन गरेको उनले बताए ।

‘साना व्यवसायीदेखि ठूला कर्पोरेट हाउसको सर्मथन हामीलाई छ । एक जनाबाहेक सबै पूर्वअध्यक्षको समर्थन हामीलाई छ । हाम्रो जित त भइनै सक्यो । घोषणा हुन मात्रै बाँकी हो ,’ उनले भने ।

बजाजको तर्फबाट शेखर गोल्छा नखुले पनि दुुवै पक्षले बजाजले आफूलाई समर्थन गर्ने दाबी गरिरहेका छन् । शेखरका भाई आकाश गोल्छा थापाको प्यानलमा भएकाले बजाजले थापा प्यानललाई सघाउने सम्भावना धेरै छ । सरसर्ती हेर्दा नेपालमा चलेका धेरै ब्राण्ड चौधरीको पक्षमा देखिन्छ । ब्राण्डको ह्विप मानेर मतदाताहरूले चौधरीलाई भोट दिएमा उनको सम्भावना बलियो देखिन्छ ।

सामान्य व्यवसायीसँग सजिलै सम्पर्कमा नआउने भन्ने आरोप चौधरीलाई लाग्दै आइरहेको छ । यो उनको दुर्वल पक्ष हो । त्यस्तै, सामान्य रिकन्डिसन व्यवसायबाट उदाएका ध्रुव थापालाई मोफसल र साना व्यवसायीहरूबाट सहानुभूति मत राम्रै खस्न सक्ने आकलन गरिएको छ । यसो भएमा उनको पल्ला भारी हुन कठिन छैन ।

सधैँजसो एउटा पक्ष मात्र हावी हुने नाडाको निर्वाचनमा यो पटक भने दुवै पक्ष बलिया देखिन्छन् । सानो व्यवसायबाट उदाएका ध्रुव थापा र ठूलो व्यापारिक घरानाका करण चौधरीको प्रतिस्पर्धामा बाजी कसले मार्ला भनेर सजिलै आकलन गर्न सकिँदैन । तर जे होस्, यसपालिको नाडाको निर्वाचन रोचकचाहिँ अवश्य नै हुनेछ ।

प्रकाशित मिति: शुक्रबार, मंसिर १७, २०७८ १३:१२