जसपाका सांसद, कांग्रेसका महाधिवेशन प्रतिनिधि

A+ A A-

बागमती प्रदेशसभामा जनता समाजवादी पार्टी (जसपा) का लागि एउटै कुर्सी छ । र, त्यो कुर्सीमा बस्छन्, रसुवाली सांसद प्रेमबहादुर तामाङ । प्रदेशसभाबाहिरचाहिँ उनले अर्कै पार्टीको कुर्सी सुरक्षित गरेका छन् ।

हालै उनी रसुवाबाट कांग्रेसको केन्द्रीय महाधिवेशन प्रतिनिधिमा चुनिएका छन् । अर्थात्, जसपाका सांसद, कांग्रेसको महाधिवेशन प्रतिनिधि । कांग्रेसकै झण्डामुनि आगामी प्रदेशसभा चुनाव लड्ने तयारीमा छन् उनी । याे कुरा उनी स्वयम्‌ले बाहिर बाेलेका छैनन् तर भित्रभित्र उनी कांग्रेसी राजनीतिमा समाहित भइसकेका छन् ।

यसबारे जिज्ञासा राख्दा तामाङ बोल्न चाहेनन् । भने, ‘यो विषयमा अहिले म बोल्न चाहन्नँ । बोल्नुपरे पनि पछि बोलौँला ।’ जसपाकाे कारबाहीमा परिने डरले कांग्रेसकाे महाधिवेशन प्रतिनिधि चुनिएको कुरा उनले गोप्य नै राखेका छन् ।

मंगलबार सदरमुकाम धुन्चेस्थित एक पानी फ्याक्ट्रीकाे हलमा महाधिवेशन प्रतिनिधिहरूकाे घाेषणा गर्दा मुख्य निर्वाचन अधिकृत शर्मिला थापाले प्रेम तामाङकाे नाम पनि लिएकी थिइन् । तर, प्रमाणपत्र लिन भने प्रेम त्यहाँ गएनन् ।

रसुवा कांग्रेसका बागमती सांसद प्रभात तामाङले प्रेम तामाङ कांग्रेस प्रवेश गरिसकेकाे र पार्टीकाे महासमिति सदस्य रहेकाे पुष्टि गरे ।

रसुवाकै अर्का एक नेताका अनुसार आगामी प्रदेशसभा निर्वाचन प्रेम तत् ठाउँबाटै चुनाव लड्ने तयारीमा छन् । ‘कांग्रेसले संघमा मोहन आचार्य, प्रदेशका दुई निर्वाचन क्षेत्रमा उहाँ (प्रेम तामाङ) र प्रभात तामाङलाई नै दोहोर्‍याउलाजस्तो छ’, ती नेताले कांग्रेस नेतृत्वबाट सुइँको पाएकोबारे खुलाए । प्रेम रसुवा (क) र प्रभात (ख) मा राम्राे प्रभाव भएका नेता हुन् । २०६४ सालमा माओवादीका तर्फबाट प्रेम संविधानसभामा निर्वाचित भएका थिए ।

प्रेम तामाङ तिनै नेता हुन्, जो २०७४ सालको चुनावमा संघको टिकट त्यागेर प्रदेशसभामा ओर्लेका थिए । त्यो बेला उनलाई बाबुराम भट्टराई नेतृत्वको नयाँ शक्ति पार्टीले संघको टिकट दिएको थियो । तर, कांग्रेसका उम्मेदवार मोहन आचार्यलाई प्रतिनिधिसभा छोडेर उनी प्रदेशसभाको उम्मेदवार बने ।

नयाँ शक्तिले केही क्षेत्रमा कांग्रेससँग चुनावी गठबन्धन गरेको थियो । गोरखा-२ बाट बाबुराम आफैँ चुनाव लड्दै थिए । रसुवामा जनाधार राम्रो भएकाले प्रेम तामाङलाई भट्टराईले संघको टिकट दिएका थिए । तर, अन्तिम समयमा तामाङ प्रदेशमा ओर्लिनुलाई बाबुरामले पैसाको चलखेलको संज्ञा दिएका थिए । पछि नयाँ शक्ति संघीय समाजवादीमा मिल्यो अनि संघीय समाजवादी अन्य पार्टीमा मिलेर जसपा बनेको छ । बागमती प्रदेशमा जसपाका एक मात्र सांसद प्रेम तामाङ नै हुन् ।

अनौठो त के भने, बागमतीका आफ्ना एउटै सांसद पनि कांग्रेसतिर पसिसकेको कुरा जसपाले पत्तो पाएको छैन । यद्यपि प्रेम तामाङ कांग्रेसको महाधिवेशन प्रतिनिधि चुनिएको प्रमाण भेटिए कारबाही गर्ने जसपा अध्यक्ष उपेन्द्र यादवले बताए । 'बिनाप्रमाण कारबाही गर्ने कुरा भएन । हाम्रो पार्टीको सांसद भएर अर्को पार्टीको महाधिवेशन प्रतिनिधि चुनिएकाे प्रमाण भेटिए कारबाही हुन्छ', उनले भने ।

हेलिकाेप्टर लिएर देउवा रसुवा उक्लेका थिए

एकातिर प्रतिनिधिसभामा एक सिट थप्न सहयोग गरेको, अर्कातिर जिल्लामा राम्रो प्रभाव भएकाले प्रेम तामाङप्रति कांग्रेसकाे लाेभ सानाेतिनो थिएन । यही लाेभले १३ फागुन २०७५ मा सभापति शेरबहादुर देउवासहित कांग्रेस शीर्ष नेताहरू हेलिकोप्टर लिएर हिमाली जिल्ला रसुवा उक्लिए । ०७४ काे चुनावमा नमीठाेसँग पछारिएकाे कांग्रेस शिथिलप्राय: थियाे । तर, रसुवातिर हानिँदा देउवासहितका शीर्ष नेता निकै उत्साहित थिए । र, याे यात्रा र उत्साहकाे कारक थिए, यिनै प्रेम तामाङ ।

कांग्रेसी नेताहरू तामाङ र उनका सयौँ कार्यकर्तालाई कांग्रेसको गम्छा ओढाउन हिमाली सिरेटाे छिचोल्दै हेलकाेप्टरबाट रसुवा ओर्लिए । तर, अन्तिम समयमा प्रेम कार्यक्रममा आउँदै आएनन् । अनि सभामा नाचगान हेरेर फर्किए देउवासहितका कांग्रेसी नेता । कांग्रेसमा प्रवेश गर्ने भनेर सभापतिलाई निम्ता दिएका तामाङ सांसद पद जाने डरले रोकिएका थिए ।

दलबलसहित कांग्रेसमा प्रवेश गर्ने योजना बनाएका तामाङलाई दल परिवर्तनसम्बन्धी व्यवस्थाले रोकेको थियो । त्यसैले सुटुक्क कांग्रेस छिरेर उनी सर्वसम्मत महाधिवेशन प्रतिनिधि बनेका हुन् ।

बागमती प्रदेशसभा सचिव कृष्णहरि खड्काका अनुसार आधिकारिक रूपमा प्रेम तामाङ जसपाकै सांसद हुन् । 'निर्वाचन आयाेगबाट हामीलाई प्राप्त पछिल्लाे चिट्ठीमा पनि उहाँ जसपाकै सांसद भन्ने उल्लेख छ', खड्काले शिलापत्रकाे जिज्ञासामा भने ।

कानुनअनुसार पार्टी फुटाएर जान संसदीय दलकाे ४० प्रतिशत संख्या चाहिन्छ । बागमतीमा जसपाका एक्ला सांसद भएकाले उनीसित शतप्रतिशत संख्या हुन्छ । अर्काे पार्टीमा प्रवेश गर्दा नयाँ संसदीय दल गठन गरेको जानकारी सभामुखलाई गराउँदा हुन्छ ।

यस्ताे जानकारी तामाङले सभामुखलाई गराउनुअघि नै जसपाले प्रेम तामाङ हाम्रो पार्टी सदस्य होइन भनेर सभामुखलाई लिखित जानकारी गराए उनले सांसद् पद गुमाउँछन् । त्यसैले तामाङ कांग्रेसमा खुल्न डराइरहेकाे रसुवा कांग्रेसका एक नेता बताउँछन् ।

प्रकाशित मिति: बिहीबार, मंसिर १६, २०७८ १६:०७