बीपीकाे सुरक्षा दस्तामा रहेका थापालाई देउवा समूहले बनायाे प्रदेश १ सभापतिकाे उम्मेदवार, सिटाैलाकाे साथ

बीपीकाे सुरक्षा दस्तामा रहेका थापालाई देउवा समूहले बनायाे प्रदेश १ सभापतिकाे उम्मेदवार, सिटाैलाकाे साथ

A+ A A-

नेपाली कांग्रेसको १४औँ महाधिवेशनअन्तर्गत प्रदेश १ को अधिवेशनकाे आज नेता कृष्ण सिटौलाले उद्घाटन गर्दैछन् ।

आज उद्घाटनसत्र सकिएपछि निर्वाचनको प्रक्रिया सुरु हुने प्रचार समितिका संयोजक राजीव कोइरालाले जानकारी दिए ।

प्रदेश १ काे कांग्रेस सभापतिका लागि संस्थापन पक्ष (देउवा समूह)ले उम्मेदवारकाे टुंगो लगाइसकेकाे छ । याे समूहबाट झापाका पुराना नेता उद्धव थापालाई सभापतिमा अघि सारिएको छ । उनलाई झापाकै नेता कृष्ण सिटौला समूहको समेत समर्थन छ ।

थापाले चुनावी अभियानसमेत सुरु गरिसकेका छन् । नेपाली कांग्रेसलाई बदलिँदो परिवेशमा अझ सशक्त बनाउन र लोकतान्त्रिक मूल्य मान्यतालाई स्थापित गर्ने अभियानलाई जोड दिन आफूले उम्मेदवारी दिन लागेको उनले बताए ।

थापाले २०३४ सालमा काठमाडौंको शंकरदेव क्याम्पसबाट राजनीति सुरु गरेका थिए । उनी २०३५ सालको जनमतसंग्रहमा निरंकुश पञ्चायती व्यवस्थाविरुद्ध बहुदलको प्रचार अभियानमा सक्रिय थिए । उनले बीपी कोइरालाको सुरक्षा दस्तामा रहेर काम गरेका थिए ।

झापा अर्जुनधारा गाउँसमितिको सचिव/सभापति हुँदै उनले झापा २ नम्बर निर्वाचन क्षेत्रको क्षेत्रीय सभापति, जिल्ला सचिव, जिल्ला उपसभापति र दुई कार्यकाल जिल्ला सभापतिको जिम्मेवारी पूरा गरिसकेका छन् । देउवा–सिटौला समूहले सभापतिको उम्मेदवार टुंगो लगाए पनि पौडेल–कोइराला समूहले अहिलेसम्म कसलाई अघि सार्ने भन्ने निर्णय लिन सकेको छैन । तर, उक्त समूहबाट कांग्रेस संसदीय दलका नेता राजीव कोइराला र गुरुराज घिमिरेमध्ये एकलाई अघि सार्ने चर्चा छ ।

जोगिएला कोइराला परिवारको शाख ?

कोइराला परिवारको आधार क्षेत्र मानिएको प्रदेश १ मा यसपटक पार्टी संस्थापन पक्ष (देउवा समूह) ले बलियो उपस्थिति देखाएको छ । विगतका निर्वाचनमा अधिकांश जिल्लामा कमजोर देखिएको देउवा पक्षले १४औँ महाधिवेशनअन्तर्गत भएको जिल्ला अधिवेशनमा बलियो उपस्थिति देखाएको छ । वडा र पालिका अधिवेशनमा एकलौटी वर्चस्व कायम गरेको पौडेल–कोइराला पक्षले जिल्ला अधिवेशनसम्म आइपुग्दा त्यसलाई कायम राख्न सकेन ।

नेपाली कांग्रेसले प्रदेश १ का सबै जिल्ला अधिवेशन सम्पन्न गरिसकेको छ । चुनावी नतिजाअनुसार कोइराला परिवारको बलियो पकड भएको प्रदेश १ मा यसपटक देउवा पक्षले शक्तिशाली उपस्थिति देखाएको छ । हालसम्म प्रदेश १ का १४ जिल्लामध्ये ७ जिल्लामा देउवा समूहले बाजी मारेको छ भने कोइराला–पौडेल पक्षले ६ जिल्ला सभापति मात्र जितेको छ । झापामा सिटौला पक्षका सभापति छानिएका छन् ।

देउवा समूहले धनकुटा, सोलुखुम्बु, ताप्लेजुङ, पाँचथर, ओखलढुंगा, इलाम र उदयपुरमा सभापति जितेकाे छ । झापामा कृष्णप्रसाद सिटौलानिकट देउमान थेवे जिल्ला सभापतिमा निर्वाचित भएका छन् । त्यस्तै, पौडेल–कोइराला पक्षले संखुवासभा, तेह्रथुम, खोटाङ, भोजपुर, सुनसरी र मोरङमा सभापति जितेको छ ।

प्रकाशित मिति: बिहीबार, मंसिर १६, २०७८ १३:०२