धितोपत्र बोर्ड नेतृत्वविहीन हुँदा आईपीओ निष्कासनमा अलमल, २५ कम्पनीका ६ करोड कित्ता आईपीओ पाइपलाइनमा

धितोपत्र बोर्ड नेतृत्वविहीन हुँदा आईपीओ निष्कासनमा अलमल, २५ कम्पनीका ६ करोड कित्ता आईपीओ पाइपलाइनमा

A+ A A-

नेपाल धितोपत्र बोर्ड (सेबोन) पछिल्लो दुई महिनादेखि नेतृत्वविहीन हुँदा २५ कम्पनीको प्राथमिक शेयर (आईपीओ) निष्कासन हुन पाएको छैन । आईपीओ निष्कासनको अनुमति पर्खेर बसेका ती कम्पनीको ६ अर्ब ८० करोड रुपैयाँबराबरको ६ करोड ८० लाख कित्ता शेयर बोर्डमै अलपत्र परेको हो ।

१९ असोजमा बोर्डका अध्यक्ष भीष्मराज ढुंगाना सर्वोत्तम सिमेन्टको शेयर खरिद प्रकरणमा जोडिएसँगै बर्खास्त भएका थिए । त्यसयता बोर्ड नेतृत्वविहीन अवस्थामा भएकाले आईपीओ निष्कासनमा ढिलाइ भएको स्वयम् बोर्डले नै जनाएको छ ।

बोर्डका सहायक प्रवक्ता रूपेश केसी प्रशासनिक कामको सम्पूर्ण अधिकार अध्यक्षमा रहेको बताउँछन् । जसका कारण कर्मचारीले निष्कासन अनुमति दिने जोखिम नलिँदा आईपीओ निष्कासन प्रक्रिया अगाडि बढ्न नसकेको उनको भनाइ छ । ‘सम्पूर्ण अधिकार अध्यक्षमा निहित छ । यसले पनि निष्कासन समयमा हुन नसकेको हो । यद्यपि केही फाट्टफुट्ट रूपमा राइट शेयरको निष्कासनको काम भने भइरहेको छ,’ उनले भने ।

बोर्डले ९ भदौमा एफपीओ निष्कासन अनुमति दिएयता गत असोजमा एक ऋणपत्र निष्कासनको स्वीकृति दिएको थियो । ऋणपत्रलाई स्वीकृति दिनैपर्ने दबाब थेग्न नसकेपछि बाध्य भएर बोर्डले उक्त ऋणपत्र स्वीकृत गरेको हो । उक्त ऋणपत्र पनि बोर्ड सञ्चालक समिति बैठकबाट निर्णय गराई अनुमति दिइएको हो । सो ऋणपत्रबाहेक कुनै पनि सार्वजनिक निष्कासनलाई अनुमति नदिइएको बोर्डले जनाएको छ ।

धितोपत्र बोर्डको अध्यक्षका लागि अर्थ मन्त्रालयले २५ कात्तिकसम्म आवेदन माग गरेको थियो भने १२ जना आकांक्षीले आवेदन दिएका थिए । तर, पछिल्लो समय आवेदन पुनः खुलाउने हल्ला चलेसँगै बोर्डले तत्काल नेतृत्व पाउने छाँटकाँट देखिँदैन । यसर्थ अझै केही महिना बजारमा आईपीओ नआउने देखिन्छ ।