बन्दसत्रमा जब ओलीले साेधे- अब मेरो नाम मात्र बाँकी छ, के गरौँ ?

A+ A A-

राति करिब ९ बजेतिर होटलबाट निस्केका केपी शर्मा ओली बन्दसत्रस्थल पुग्दा उनको समर्थन र अध्यक्षका अर्का प्रत्यासी भीम रावलको विरोधमा चर्को नाराबाजी भयो । बन्दसत्र सुरु हुनुअगाडि अध्यक्ष मण्डलको बैठक चलिरहँदा पनि गेट बाहिर भने ओली समर्थकहरूको नाराबाजी कायमै थियो ।

अध्यक्ष मण्डलको बैठकमा ओलीले शंकर पोखरेललाई महासचिव बनाउने प्रस्ताव गरे । दिनभर होटलमा बसेर ओली, ईश्वर पोखरेल, विष्णु पौडेल सर्वसम्मतिको सूची बनाउन लागेका थिए । नेता कार्यकर्ता भने होटल आसपास भौँतारिइरहे ।

ओलीको प्रस्तावमा रावलले असहमति जनाएपछि एमाले महाधिवेशनको निर्वाचन आयोगले चुनावमा जाने तय गर्‍याे । निर्वाचन तालिका सार्वजनिक गर्दा रातको १२ बजिसकेको थियो । निर्वाचन तालिका सार्वजनिक भएपछि अध्यक्ष मण्डलको बैठकबाट समर्थक र स्वयंसेवकको भिडले घेरिएर निक्लिएका ओली पत्रकारका सबै प्रश्न पन्छाउँदै बन्दसत्र हलमा छिरे ।

दिनभर फुर्सदिला भएका महाधिवेशन प्रतिनिधिहरू निर्वाचन तालिका सार्वजनिक भएसँगै मनोनयन फाराम भर्न व्यस्त भए । यता निर्वाचन आयोगले भने प्राधिविक कारण देखाउँदै १३ मंसिरसम्मका लागि निर्वाचनका कार्यक्रम स्थगित गर्‍याे । यही कारण रावलले अध्यक्ष उम्मेदवारीको फारम भरे पनि राति नै दर्ता भने हुन सकेन ।

यहीबीचमा बन्दसत्रमा छिरेका ओलीले ३ सय १ सदस्यको नाम पढेर सुनाए । अनि ओलीले प्रतिनिधिलाई सम्बोधन गर्दै भने, ‘अब मेरो नाम मात्र बाँकी छ । के गरौँ ?’

प्रतिनिधिहरूले ताली बजाउँदै ओलीको पक्षमा मत प्रकट गरेपछि ओलीले आफ्नो नाम पनि पढेर सुनाए । केन्द्रीय सदस्यमा आफ्नो नाम सर्वसम्मतिको सूचीमा नपरेपछि केही प्रतिनिधिले विराेध जनाउँदै मञ्चमा उक्लिने प्रयास गरे । तर, तिनलाई हप्काउँदै ओलीले भने, ‘मञ्चमा नआउनुहोस् ।’

त्यसपछि ओलीले असन्तुष्ष्ट प्रतिनिधिलाई फकाउँदै भने, ‘जसको नाम परेको छैन, उहाँहरूलाई सेटल गरिन्छ ।’ ओलीको सर्वसम्मति रटानलाई चुनौती दिँदै एमाले महाधिवेशनमा चुनावको पक्षपाती देखिएका रावलले भने ओलीले पढेका नामावलीप्रति नै विराेध जनाए । विधि र प्रक्रिया मिचेर आएको नामावलीप्रति आफू असहमत भएको भन्दै उनी बाहिरिए ।

ओली र रावलको यो रस्साकस्सीमाझ एकाएक ओझेल परे दुर्गा प्रसाईं । दिनभर घरि चुनाव त घरी सर्वसम्मति हुनुपर्ने भन्दै ओली बसेको होटलका कोठा-काेठा चहारिरहेका प्रसाईं केन्द्रीय सदस्यको सर्वसम्मत सूचीमा अटाएनन् । ओली बसेको होटलबाट लेखराज भट्ट बाहिरिँदा उनलाई पछ्याउँदै गएका प्रसाईंलाई भट्टले भन्दिए, ‘तपाईंको नाम त देखिनँ नि मैले ?’

अनि फरक्क फर्केर प्रसाईंले चर्को स्वरमा भने, ‘मैले त भनेकै हो नि चुनावमा जानुपर्छ भनेर !’ अध्यक्षका प्रत्यासी रावललाई उनले हलको निर्णय मानेर उपाध्यक्षमा चित्त बुझाउन सुझाए । रावलले जवाफ फर्काए, 'अब त धेरै ढिला भइसक्यो । पछाडि फर्किने सम्भावना छैन ।' रावलको अडानले सर्वसम्मत अध्यक्ष हुने ओलीको अडान साकार भएन । महाधिवेशन निर्वाचनतर्फ उन्मुख भयो ।

प्रकाशित मिति: सोमबार, मंसिर १३, २०७८ ०९:०१