मनहरी गाउँपालिकाका ५९ कर्मचारी आन्दोलित, झण्डै डेढ वर्षदेखि भत्ता नपाएको भन्दै गाउँपालिकामा धर्ना

मनहरी गाउँपालिकाका ५९ कर्मचारी आन्दोलित, झण्डै डेढ वर्षदेखि भत्ता नपाएको भन्दै गाउँपालिकामा धर्ना

A+ A A-

मकवानपुरको मनहरी गाउँपालिकाका स्वास्थ्यकर्मी र सफाईकर्मीहरू आन्दोलनमा उत्रिएका छन् । गाउँपालिकास्थित मनहरी अस्पतालसहित १० स्वास्थ्य संस्थामा कार्यरत ५९ स्वास्थ्यकर्मी २०७७ साउनदेखि भत्ता नपाएको भन्दै आन्दोलनमा उत्रिएका हुन् ।

मनहरी गाउँपालिका– ७ स्थित मनहरी अस्पतालसहित एक स्वास्थ्य चौकी, ८ सामुदायिक स्वास्थ्य इकाईका स्वास्थ्यकर्मी तथा कर्मचारीले आइतबार गाउँपालिकामा धर्ना दिए । २०७७ साउनदेखि भत्ता नपाएको उनीहरूको गुनासो छ ।

कोभिड–१९ संक्रमणको अवस्थामा जोखिम मोलेर दिनरात खटिएको भत्ता नपाउँदा आन्दोलन गर्नुपरेको मनहरी अस्पतालका मेडिकल अधिकृत अञ्जन जंग थापाले बताए । ‘ज्यानको जोखिम मोलेर कोभिड–१९ को संक्रमणकालमा गरेको कामबापतको भत्ता उपलब्ध नगराएपछि अस्पतालमा कार्यरत २ जना डाक्टरसहित १९ जना स्वास्थ्यकर्मी, स्वास्थ्य चौकी र सामुदायिक स्वास्थ्य इकाईमा कार्यरत कर्मचारी आन्दोलित भएका हुन्,’ थापाले भने ।

आन्दोलनरत कर्मचारीमध्ये आधाले कार्यालयमै बसेर नागरिकलाई सेवा दिइरहेको र बाँकी कर्मचारी आन्दोलनमा होमिएको मनहरी अस्पतालका सिनियर अहेब रामचन्द्र दहालले बताए । आन्दोलित कर्मचारीहरूले बैठक बसेर भत्ता नपाइन्जेल कालोपट्टी लगाएर काम गर्ने, १२ मंसिरमा गाउँपालिकामा धर्ना दिने, कोभिड खोप स्थगन गर्ने, नियमित रिपोर्टिङ स्थगित गर्ने र गाउँपालिकाले स्वास्थ्यकर्मीका लागि आयोजना गरेको तालिम बहिष्कार गर्ने निर्णय गरेका छन् ।

भत्ता नपाउन्जेल चरणबद्ध आन्दोलन गरिरहने भन्दै गाउँपालिका अध्यक्ष, उपाध्यक्ष, प्रमुख प्रशासकीय अधिकृतलाई उनीहरूले पत्र लेखेका छन् । ‘२०७७ साल साउन महिनादेखि नै जोखिम भत्ता नपाएको । पटक– पटकको बैठक र छलफलमा आश्वासन मात्रै दिएर टार्ने काम भएको र स्वास्थ्यकर्मीको भावनमा ठेस पुगेको छ,’ कर्मचारीहरूले गाउँपालिकलाई लेखेको पत्रमा उल्लेख छ ।

गाउँपालिकाले २०७७ असारभित्रै भत्ता उपलब्ध गराउने भने पनि कार्यान्वयन नभएको सिनियर अहेब दहालले बताए । उनका अनुसार पालिकाले २०७८ सालको दसैँअगाडि भत्ता दिने प्रतिबद्धता जनाएको थियो । पालिकाले पटक–पटक आश्वासन दिए पनि भत्ता उपलब्ध नगराएपछि बाध्य भएर आन्दोलन गर्नुपरेको कर्मचारीहरूको भनाइ छ । उनीहरूले गाउँपालिकालाई तत्काल भत्ता उपलब्ध नगराए आन्दोलन चर्काउने चेतावनी दिएका छन् ।

प्रकाशित मिति: आइतबार, मंसिर १२, २०७८ २०:३७