प्रदेश १ ले ल्यायो ४२ अर्ब २० करोडको बजेट

A+ A A-

प्रदेश १ सरकारले आगामी आर्थिक वर्ष २०७६/०७७का लागि ४२ अर्ब २० करोडको बजेट ल्याएको छ । आर्थिक मामिलामन्त्री इन्द्रबहादुर आङ्बोले आइतबार प्रदेशसभा बैठकमा ४२ अर्ब २० करोड ४ लाख १२ हजारको बजेट प्रस्तुत गरेका हुन् ।

चालु खर्चतर्फ १८ अर्ब २० करोड ४ लाख १२ हजार र पुँजीगततर्फ २३ अर्ब ५७ करोड ३९ लाख ३४ हजार विनियोजन गरिएको छ । अन्तर सरकारी हस्तान्तरणका लागि ९९ करोड ९९ लाख ९८ हजार छुट्याइएको छ ।

बजेटको स्रोतमध्ये आन्तरिक राजश्व ३ अर्ब ८६ करोड उठाउने लक्ष्य छ भने राजश्व बाँडफाँटबाट प्राप्त हुने १० अर्ब ५२ करोड, अनुदानबाट २१ अर्ब २१ करोड बेहोरिनेछ भने चालु आर्थिक वर्षको खर्च हुन नसकेको बजेट ६ अर्ब ६१ करोड रहने पूर्वानुमान छ ।

प्रदेश सरकारले खाद्यान्न उत्पादन तथा उत्पादकत्व वृद्धिका कार्यक्रमका लागि १९ करोड ४७ लाख रुपैयाँ बजेट छुट्याएको छ । प्रधानमन्त्री कृषि आधुनिकीकरण परियोजनाअन्तर्गत नयाँ पकेट तथा ब्लक कार्यक्रमका लागि ७४ करोड २१ लाख विनियोजन गरिएको छ । मिल्क होलीडेलाई अन्त्य गर्न गुणस्तरीय दूध उत्पादन प्रशोधन तथा उपभोगलाई सहज बनाउन इटहरीमा धुलो दूध कारखानाको निर्माणका लागि १५ करोड ५० लाख रुपैयाँ विनियोजन गरिएको छ ।

प्रदेश सरकारले पर्यटन क्षेत्र अन्र्तगत भेडेटार– राजारानी–राँके मंगलबारे हुँदै महाभारत हरित कृषि पर्यटन क्षेत्रको रुपमा विकास गर्न ३ करोड बजेट छुट्याएको छ । समग्र पर्यटन क्षेत्रका लागि १ अर्ब ६६ करोड रुपैयाँ बजेट विनियोजन गरिएको छ ।

वन तथा बातावरण क्षेत्रका लागि १ अर्ब २० करोड बजेट विनियोजन गरिएको छ । उद्योग वाणिज्य तथा आपूर्ति क्षेत्रको विकासका लागि ४७ करोड बजेट छुट्याइएको छ । प्रदेश सरकारले सिँचाई तथा नदी नियन्त्रणका लागि ३ अर्ब २० करोड बजेट विनियोजन गरिएको छ ।

शिक्षा क्षेत्र तर्फ मनमोहन प्राविधिक विश्वविद्यालय स्थापनाका लागि १६ करोड ५० लाख बजेट विनियोजन गरिएको छ । यस्तै प्राविधिक शिक्षा अध्ययन गराउने शिक्षालयहरुलाई ३८ करोड ६९ लाख अनुदान दिइने बजेटमा उल्लेख गरिएको छ । विद्यालय सुधारका लागि १७ करोड बजेट विनियोजन गरिएको छ । प्रदेश सरकारले युवा वैज्ञानिक र युवा आविष्कारलाई प्रोत्साहन गर्न १ करोड विनियोजन गरेको छ । सरकारले समग्र शिक्षाका लागि भने १ अर्ब २८ करोड विनियोजन गरिएको छ ।

स्वास्थ्य क्षेत्रका लागि १ अर्ब ७ करोड रुपैयाँ बजेट छुट्याइएको छ । खानेपानी र सरसफाईका लागि ३ अर्ब बजेट विनियोजन गरिएको छ । श्रम र रोजगारका लागि मुख्यमन्त्री युवा उद्यमशीलता कार्यक्रम संचालन गर्न २० करोड छुट्याइएको छ । खेलकुद अन्र्तगत एक स्थानीय तह १ खेलकुद मैदान स्तरोन्नती गर्नका लागि ३६ करोड ६० लाख बजेट छुट्याइएको छ । प्रदेश सरकारले समग्र खेलकुद विकासका लागि भने ४७ करोड ५ लाख बजेट विनियोजन गरेको छ ।