‘ओहो ! यो सिंहदरबार त दयालु रहेछ, यसको दया गाउँसम्म कहिले पुग्छ ?’

A+ A A-

गत सोमबार नाम्खा– ६ का वडाध्यक्ष पाल्जोर तामाङ र हुम्लाका सांसद छक्कबहादुर लामा गाउँमा भोकमरी सुरु हुने अवस्था भएपछि चामल माग्न सिंहदरबार आएका छन् ।

सांसद लामाका लागि सिंहदरबार प्रवेश नौलो थिएन । उनी धेरै पटक सिंहदरबार छिरेका छन् । तर, वडाध्यक्ष तामाङका लागि भने सिंहदरबार प्रवेश गर्नु ठूलो र नौलो विषय भयो ।

तामाङ राजनीतिक भेटघाटभन्दा पनि गाउँको भोकमरी समस्या समाधानका लागि सिंहदरबार पुगेका थिए । जसका कारण यो समस्या सिंहदरबारले तत्काल सम्बोधन गरोस् भन्ने उनको चाहना थियो । सांसद लामासँग सिंहदरबार प्रवेश गरेका तामाङले करिब ३ घण्टा गृह मन्त्रालयमा बैठक गरेर बिताए ।

‘काठमाडौं मन्त्री र नेताहरूसँग हात मिलाउन होइन, जनताको पेट भर्ने चामल माग्न आएको हुँ’

दिउँसो १ बजे चामलको समस्या सुनाउन तामाङ सांसद लामासँग गृह मन्त्रालय पुगे । उनीहरूले गृहसचिव टेकनारायण पाण्डेलाई चामल माग्दै गाउँमा हुन लागेको भोकमरीको समस्याका बारेमा जानकारी गराउँदै ज्ञापनपत्र बुझाए ।

तामाङ र लामाले गृह मन्त्रालयमा करिब २ः३० बजेसम्म सचिव र अन्य मन्त्रालयका सम्बन्धित कर्मचारीसँग छलफल गरे । छलफलकै क्रममा वडाध्यक्ष तामाङले सचिवलाई सिङ्गो गाउँ नै भोकमरीको चपेटामा पर्न लागेको विस्तृत जानकारी गराउँदै भने, 'हामी त हुम्लाबाट ठूलो आस बोकेर चामल माग्न आएका हौँ । म मरे केही हुँदैन तर, हुम्ली जनता बाँच्नुपर्‍यो ।'

उनले थपे, ‘सरकार, मिल्छ भने आजै चामलको व्यवस्था गरिदिनुपर्‍यो । हुम्लाका जनता हेलिकोप्टर उड्यो कि भनेर आकाश हेर्न थाले होलान्,' सचिवका अगाडि बसेका वडा अध्यक्ष तामाङले भने, ‘गाउँमा मलाई सरकार भन्छन् । अब मेरो सरकार तपाईंहरू हो । मेरा जनताको पनि सरकार बनिदिनुपर्‍यो ।’

तामाङको बिन्ती सुनिरहेका गृहसचिवले हुम्ला जिल्ला कार्यालय, प्रहरी र सेनाका उच्च अधिकारीहरूसँग फोन संवाद गरे अनि 'चामल बुधबार अथवा बिहीबारदेखि ढुवानी हुन्छ, ढुक्क हुनुहोस् । तपाईंको मात्र होइन, यो समस्या नेपाली जनताको भएका कारण जतिसक्दो चाँडो समाधान गर्छौं' भनेको सांसद लामाले बताए ।

चीनको अनुदान खाद्यान्न बिहीबारदेखि हेलिकोप्टरबाट हुम्ला ल्याइँदै

हुम्लामा लिमी, तिल, जाङ र हल्जी गाउँमा चामल अभावको समस्या लिएर आएका तामाङले 'सिंहदरबार त दयालु रहेछ, यो कहिले दया बोकेर गाउँसम्म पुग्छ' भन्दै खुसी व्यक्ति गरे ।

जनताले सरकार भन्दै कर किन तिर्ने त ? राज्य जनताप्रति जवाफदेही हुनुपर्ने उनको भनाइ थियो । ‘सुनेको थिएँ सिंहदरबार त दिनैपिच्छे धाउनुपर्थ्यो रे । तर, चामलको समस्या भएका कारण सरकारले तत्काल सुनुवाइ गरेका कारण धाउनु परेन,’ उनले भने, ‘हु्म्लामा नुन, चामलभन्दा ठूलो त स्वास्थ्य र शिक्षाको अभाव छ । यो पनि सिंहदरबारले चाँडै सुनिदिए हुन्थ्यो ।’

हुम्ली जनताले चामलजस्तै उपचार र शिक्षा पनि चाँडै पाए हुन्थ्यो भन्छन् उनी । हुम्लाका जनता चामल र नुन खान नपाएर अथवा खोज्न हिँड्दा लडेर नमरून् भन्ने आफ्नो सरकारसँग माग रहेको उनले बताए ।

पुस्तौँदेखि चामल र नुनको पछि दौडिनुपर्ने हुम्लावासी जहिल्यै गाँसको चिन्तामा

चीनको हिल्सा नाकामा अड्किएको खाद्य सामग्री शुक्रबार लिमीसम्म सेनाको हेलिकोप्टरमार्फत ल्याउने गृह मन्त्रालयले जनाएको छ । यो नाकामा चीनले अनुदान दिएको ४ सय ६० क्वीन्टल चामल र अन्य खाद्य सामग्री चार महिनादेखि रोकिएको छ ।

अर्थ मन्त्रालय गए पनि केहीसँग भेट भएन । आज खाद्य संस्थानका महानिर्देशक, आपूर्ति मन्त्रालका सचिव भेटेर समस्या राखेको वडाध्यक्ष तामाङले बताए । सबैसँग हुम्लाको कृषि, चौपाया र अन्य समस्या जानकारी गराउँदै ज्ञपानपज्ञ बुझाउने उनको भनाइ छ ।

आफू कुनै पार्टीको जनप्रतिनिधि नभएको बताउँदै उनले त्यही भएर जनताका समस्या राख्दै आवश्यक सामग्री मागिरहेको बताए । हुम्लामा वार्षिक साढे १ लाख मेट्रिक टन चामल आवश्यक पर्ने खाद्य संस्थानले जनाएको छ । हुम्लामा गहुँ, जौ, फापर, कोदो, मकै स्याउ र तल्लो हुम्लामा धानसमेत उत्पादन हुन्छ ।

हुम्ला चीनको तिब्बतसँग जोडिएको जिल्ला हो । यो जिल्लाका ७० प्रतिशत जनता चीनको हिल्सानजिकैका शहरबाट नुन र चामलमा खरिद गर्दै आएका छन् ।

हिमाली जिल्ला भएका कारण वर्षा र हिमपातका कारण ५ महिना चीन नुन र चामल किन्न जान्न समस्या हुने गरेको हुम्लाका सर्वसाधारणले बताउँदै आएका छन् ।

प्रकाशित मिति: बिहीबार, मंसिर ९, २०७८ ११:४०