ओलीलाई आकांक्षीको व्यवस्थापनमै सकस, सर्वसम्मतिको रटानबाट निर्वाचनको नीतितर्फ

ओलीलाई आकांक्षीको व्यवस्थापनमै सकस, सर्वसम्मतिको रटानबाट निर्वाचनको नीतितर्फ

A+ A A-

पदाधिकारीमा आकांक्षीहरूको व्यवस्थापन गर्न कठिनाइ हुने स्थिति आएपछि नेकपा (एमाले) अध्यक्ष केपी शर्मा ओली सर्वसम्मतिको रटान छोडेर निर्वाचन गराउनेतर्फ उन्मुख भएका छन् । माओवादी केन्द्रबाट एमालेमा आएका नेताहरू, १० बुँदे सहमतिका पक्षधर र एमालेमा आफूलाई विगतदेखि नै सहयोग गर्दै आएका नेताहरूले पदाधिकारीमा दाबी गर्दै ओलीसमक्ष परामर्श बढाउन थालेपछि उनले निर्वाचनलाई आफूले निषेध नगर्ने बताएका हुन् ।

एमालेमा वरिष्ठ उपाध्यक्षका लागि ईश्वर पोखरेल, सुवास नेम्वाङ र रामबहादुर थापा बादलले दाबी गरिरहेका छन् । ओली र पोखरेलको सम्बन्ध त्यति हार्दिक छैन । यता बादललाई वरिष्ठ उपाध्यक्ष मान्न एमालेको ठूलो पङ्क्ति तयार छैन । नेता नेम्वाङले मंगलबारको स्थायी समिति बैठकमा भनेका छन्, 'सर्वसम्मतिमा जाने भए उत्तम, निर्वाचनको परिस्थिति आउँदा म वरिष्ठ उपाध्यक्षमा उम्‍मेदवारी दिन तयार छु ।'

महासचिवमा सुरेन्द्र पाण्डे, शंकर पोखरेल, विष्णु पौडेलले र पृथ्वी सुब्बा गुरुङले दाबी गरिरहेको अवस्था छ । १० बुँदे सहमतिपछि एमालेमा रहेका नेतामध्ये ओलीनिकट कित्तामा देखापर्ने र उनको बचाउमा खरो उत्रने नेतामा पाण्डे पनि छन् । उपमहासचिव पौडेल ओलीलाई विगतदेखि नै साथ दिँदै आएका नेता हुन् । गुरुङ पनि ओलीनिकट नेता हुन् । ओलीले भने पोखरेललाई ओलीले अघि बढाउन चाहेका छन् ।

यता उपाध्यक्षको आकांक्षीको सूची पनि लामै छ । अष्टलक्ष्मी शाक्य र युवराज ज्ञवाली त्यसमा दोहोरिन चाहेका छन् । रघुजी पन्तले पनि ओलीलाई भेट गरी उपाध्यक्ष मागेका छन् । माओवादी केन्द्रबाट एमाले गएका टोपबहादुर रायमाझीको दाबी पनि त्यसमै छ ।

यता सचिवमा ओलीनिकट नेताहरू नै बढी छन् । सचिवको दाबी गर्नेहरूमा छविलाल विश्वकर्मा, खगराज अधिकारी, भानुभक्त ढकाल, विष्णु रिमाल, गोकुल बाँस्कोटा, कर्ण थापा, महेश बस्नेत, शेरबहादुर तामाङ, रघुवीर महासेठलगायत नेताहरू छन् ।

विधान अधिवेशनले पार्टी एकताबद्ध रहेको सन्देश दिनका निम्ति सर्वसम्मत नेतृत्व चयनलाई जोड दिए पनि आकांक्षी बढी भएपछि ओलीले नेता व्यवस्थापन कठिन रहेको महसुस गरेका छन् । मंगलबार सम्पादकहरूसँग राजधानीमा अन्तर्क्रिया कार्यक्रम राख्दै ओलीले भनेका छन्, 'मेरो चाहना नेताहरूको व्यवस्थापन होइन । 'नो नेताहरू'को व्यवस्थापन अब भोट ल्याएर जित्नेहरूको मात्रै व्यवस्थापन,' ओलीले भनेका छन् ।

ओलीले यो उद्घोष गर्दा उनको दायाँमा रहेका नेता सुरेन्द्र पाण्डे र बायाँमा रहेका नेता योगेश भट्टराई न्याउरो देखिएका थिए । नेताहरूको व्यवस्थापनमा लाग्दा पार्टीभित्र पक्ष र विपक्ष भइरहने हुनाले आफू त्यसतर्फ केन्द्रित नहुने ओलीले प्रस्ट पारेका छन् । 'म नेताहरूको व्यवस्थापनका लागि भने पार्टीमा पक्षविपक्ष भइरहने भयो,' ओलीले भने,' कार्यकर्ताहरूको चाहना पनि त्यो छैन । एमालेलाई एउटा पार्टी एउटा संगठन बनाउने उद्देश्यले अघि बढ्छु । नेताहरूको व्यवस्थापनमा लाग्दिनँ ।'

ओलीले महाधिवेशन प्रतिनिधिको मताधिकारलाई आफूलाई बन्देज नलगाउने बताएका छन् । आफूले कसैलाई पनि उठ्नका लागि नसुझाउने उनको भनाइ थियो । 'मैले बोल्दा दबाब महसुस हुने भएकाले कसैलाई पनि सुझाव दिने पक्षमा छैन । म कसैलाई उठ पनि भन्दिनँ । कसैलाई नउठ पनि भन्दिनँ । प्रतिस्पर्धीबीच सहमति भए राम्रो, भएन भने करकाप गर्दिनँ,' ओलीले भने ।

आफ्नो रोजाइमा कोही नरहेको दाबी गर्दै ओलीले सर्वसम्मत हुने पदाधिकारी वा मतदानबाट बढी मत ल्याउने व्यक्ति आफ्नो रोजाइको पदाधिकारी बन्ने उनको भनाइ थियो । एमालेले १०औँ महाधिवेशनको उद्देश्य नेतृत्व निर्माण रहेकाले २२ सयभन्दा बढी प्रतिनिधिले आफ्नो नेता चयन गर्ने बताए । आफूलाई अध्यक्षमा चुनौती दिएका भीम रावलको उम्मेदवारीप्रति उनले भने,' रावलले मलाई चुनौती दिनुभएको होइन । सुझाव दिनुभएको हो। एमाले लोकतान्त्रिक पार्टी हो । जसले जसलाई पनि चुनौनी दिन पाउँछ ।'

महाधिवेशनमार्फत एमालेभित्र व्यापक सुदृढीकरण रहेको र अझै विशाल बनिरहेको सन्देश प्रवाह गर्न खोजिएको ओलीको भनाइ छ । १० मंसिरमा चितवनको नारायणी किनारमा उद्घाटन समारोहमा एमालेले ५ लाख मानिस ल्याउने दाबी गरेको छ । यो महाधिवेशबाट गुट भत्काउँदै एमाले एक पार्टी एक संगठनका रूपमा सुदृढ हुने अध्यक्ष ओलीको दाबी छ ।

प्रकाशित मिति: मंगलबार, मंसिर ७, २०७८ १७:०५