जेलदेखि नै केपी ओलीको माया पाएको मान्छे हुँ, चुनाव भए जित्छु : लालबाबु पण्डित [अन्तर्वार्ता]

जेलदेखि नै केपी ओलीको माया पाएको मान्छे हुँ, चुनाव भए जित्छु : लालबाबु पण्डित [अन्तर्वार्ता]

A+ A A-

नवौँ महाधिवेशनमा एमाले उपाध्यक्षमा भिडेका १० जनामध्ये एक हुन्, लालबाबु पण्डित । त्यतिबेला माधव नेपाल पक्षबाट उम्मेदवार बनेका उनले ९ सय ९८ मत पाएका थिए । लालबाबु आसन्न १०औँ महाधिवेशनमा चुनाव हुने भए त्यही पदका दाबेदार छन् । सर्वसम्मत गर्नुपर्दा अध्यक्ष र महासचिवबाहेक अरु पदाधिकारीमा बस्न उनी तयार छन् ।

एमाले उपाध्यक्षमा लालबाबुसँगै घनश्याम भुसाल, रघुजी पन्त, किरण गुरुङ, सुरेन्द्र पाण्डेसहित एक दर्जन नेताको दाबी छ । विधानमा पार्टीमा वरिष्ठबाहेक चार जना उपाध्यक्ष हुने व्यवस्था छ । निकै सरल स्वभावका लालबाबुले अध्यक्ष केपी शर्मा ओलीसँग भेटेर महाधिवेशनको उम्मेदवारीबारे आफ्नो धारणा राखिसकेका छन् । सर्वसम्मत भए अध्यक्ष ओलीले तपाईंलाई पत्याउने आधार के ? लालबाबु भन्छन्, ‘मैले पार्टी र सरकारमा बसेर राम्रो काम गरेको छु, इमानदार छु ।’

गत चुनाव जितेर केपी ओली नेतृत्वमा सरकार बनेपछि उनले संघीय, मामिला तथा सामान्य प्रशासनमन्त्री बनेका थिए । त्यसअघि २०७० सालमा उनी सुशील कोइरालाको क्याबिनेटमा सामान्य प्रशासनमन्त्री बनेका थिए । त्यतिबेला उनले गरेको एउटा निर्णयले व्यापक चर्चा र बहस छेडेको थियो । डीभी, पीआर, ग्रीन कार्ड लिएका कर्मचारीलाई कारबाही गर्ने नीति अख्तियारी गर्दै पण्डितले निजामती सेवा ऐन संशोधन गरेका थिए । तत्कालीन प्रधानमन्त्री ओलीले लालबाबुलाई कर्मचारी समायोजनको काम थाँती रहँदारहँदै २०७६ साल मंसिरमा हटाइएका थिए । अहिले पनि ओलीले पत्याउने उनको आस छ । पुरानो सम्बन्ध र अहिले पार्टीमा दिएको योगदानकै कारण आफूलाई ओलीले प्राथमिकतामा राख्नेमा लालबाबु आशावादी छन् । पण्डित २०३५ सालतिर भएको औद्योगिक आन्दोलनमा सहभागी थिए । नेपाल स्वतन्त्र मजदुर युनियन (हालको जिफन्ट) मा आबद्ध थिए । लालबाबु काठमाडौं सभापति थिए । आन्दोलनकै क्रममा पक्राउ गरेर उनलाई सेन्ट्रल जेलको गोलघर पुर्‍याइएको थियो । ओली त्यतिबेला त्यहीँ जेलजीवन बिताइरहेका थिए । नेता पण्डितसँग शिलापत्रका लागि अनुप पौडेलले गरेको कुराकानीको सम्पादित अंश:

तपाईं उपाध्यक्ष र सचिवमध्ये एक पदमा इच्छुक हुनुहुन्छ भन्ने सुनियो । कुन पदमा जाँदै हुनुहुन्छ, खुलाइदिनुस् न ।

सहमति भएमा अध्यक्ष र महासचिवबाहेक जुनसुकै पदाधिकारीमा भए पनि म सहमत छु । चुनावबाटै प्रतिस्पर्धा गर्नुपर्‍यो भने म पार्टीको केन्द्रीय उपाध्यक्ष पदमा प्रतिस्पर्धा गर्छु ।

पहिला त्यही पदमा पराजित हुनुभयो । यसपालि निर्वाचित हुन के तयारी गरिरहनुभएको छ ?

पार्टी अध्यक्षसँग पनि भेट भएको छ । अरु नेतासँग पनि भेट भएको छ । आफ्नो कुरा प्रस्ट राखेको छु । अहिले पदको घोषणा गरिसकेको छैन । तर, जुनसुकै पदमा उठे पनि मतदातालाई आग्रह गरिरहेको छु । चुनाव भएमा मलाई मत दिन सबै प्रतिनिधिलाई तपाईंको मिडियामार्फत पनि आग्रह छ ।

अहिले महाधिवेशनमा आउने झण्डै ९० प्रतिशत प्रतिनिधिसँग मेरो प्रत्यक्ष भेटघाट, चिनजान हुँदै आएकाले पूर्व-पश्चिम, उत्तर-दक्षिण, देशभरका पार्टी पङ्क्ति र जनताको बीचमा परिचित छु । चाहे पार्टीको होस्, चाहे जनताको होस्, चाहे सरकारको होस्, निरन्तर काममा लागिरहेको हुनाले मलाई चिन्ने, बुझ्ने, माया गर्ने हुनुहुन्छ । विगतका दुई महाधिवेशनमध्ये आठौँमा (केन्द्रीय सदस्य) सबैभन्दा धेरै मत ल्याउनेको चौथो नम्बरमा मेरो नाम थियो । नवौँ महाधिवेशनमा मैले उपाध्यक्षमा उम्मेद्वारी दिँदा थोरै मतले, त्यतिखेरको परिस्थितिले गर्दा जित्न सकिनँ । यसपालि सबैको साथ पाउँछु भन्ने पूर्ण विश्वास छ ।

अध्यक्ष केपी ओलीले भेटमा तपाईंलाई के भन्नुभयो ?

तपाईंको आकांक्षालाई म सकारात्मक रूपमा लिएको छु । तपाईंसँग कतिपय नेताको तुलना नै गर्न सकिँदैन । पार्टी र जनतामा तपाईं कामले परिचित हुनुहुन्छ भन्नुभयो । उहाँ मलाई पदाधिकारीमा ल्याउन सकारात्मक हुनुहुन्छ भन्ने मेरो अनुभूति छ ।

महाधिवेशन सकेसम्म सर्वसम्मत टुंगाउने कुरा छ । तपाईंलाई ओलीले आफ्नो टिममा लिनुहोला त ? त्यसका आधार के–के छन् ?

मैले नेताको रूपमा मात्रै आफूलाई सम्झेको छैन । झण्डै ४४ वर्ष यही पार्टीमा बिताइसकेँ । राजनीतिक आस्थाका हिसाबले ५० वर्ष पुगेको छ । म जुँगाको रेखी पनि नआउँदा २०३५ सालतिर काठमाडौंको सेन्ट्रल जेलमा पर्दा ढोकामा स्वागत गर्ने र हात मिलाउने अहिलेका हाम्रा अध्यक्ष कमरेड केपी शर्मा ओली नै हुनुहुन्थ्यो । र, मलाई जेलदेखि माया गर्नुभयो ।

मलाई राम्रो काम गर्दागर्दै पनि विशिष्ट परिस्थिति आउँदा माओवादी अध्यक्ष प्रचण्डको दबाबमा उहाँले निर्णय लिनुपरेको थाहा पाएको छु । मैले आफू मन्त्रीबाट हट्दा पनि सरकार पाँच वर्ष रहनुपर्छ, प्रधानमन्त्री केपी ओली नै हुनुपर्छ भन्ने मान्यता थियो । पार्टीलाई संकटमा पुर्‍याउने काम कतिपय नेताहरूले गरे । जुन आज पार्टीमा छैनन्, भागेका छन् । त्यतिखेर पनि म जनताको बहुदलीय जनवाद र सूर्य चिह्नको पक्षमा उभिएको हुँ ।

पार्टीका कामलाई जनताबीच पुर्‍याउने, पार्टीभित्र पाएको कामलाई इमानदारीपूर्वक पूरा गर्ने, सरकारमा रहँदा इमानदार भएर काम गरेको, संसदमा राष्ट्रिय, अन्तर्राष्ट्रिय मुद्दामा स्पष्ट रूपमा आफ्नो धारणा राख्दै आएको सर्वविदितै छ । त्यसकारण मलाई थप पहिचान गर्नुपर्ने आवश्यकता छैन ।

तत्कालीन नेकपामा विवाद आउँदा तपाईं कुनै पक्षमा लाग्नुभएन । त्यतिबेला खुलेरै ओलीसँग रहनुभएका नेता पनि उपाध्यक्ष र अन्य पदका दाबेदार हुनुहुन्छ । ओलीले विगतको कुरा हेरेर छनोट गरे तपाईं पछि पर्ने हो कि ?

मैले त्यतिखेर गालीगलौज, आरोप-प्रत्यारोपमा ओर्लिन्नँ, जबज र सूर्य चिह्न जहाँ हुन्छ, त्यही हुन्छु भनेर प्रस्ट रूपमा भनेको थिएँ । त्यस कारण अहिले पनि जबज र सूर्य चिह्नको पक्षमा छु र नेता केपी ओली भएकाले अन्यथा केही हुन्छजस्तो लाग्दैन । यसपटक प्यानलगत स्थिति छैन । धेरै प्रतिनिधिको मनमा म बसेको छु । त्यही विश्वासका आधारमा म अगाडि बढ्छु ।

सर्वसम्मत कि मतबाटै निर्वाचन गर्ने भन्नेमा नेताहरूका आ-आफ्नै धारणा छन् । तपाईंलाई कुन विधि ठीक लाग्छ ?

अहिले सबैभन्दा राम्रो ९० प्रतिशतभन्दा बढी प्रतिनिधि सर्वसम्मत आउनुभएको छ । सर्वसम्मत भएर अगाडि बढ्नु लोकतान्त्रिक विधि नै भएकाले यसमा मलाई आशा र विश्वास छ । धेरै नेताको आकांक्षा भएकाले सबैलाई मिलाएर, समावेशी हिसाबले अहिलेको आवश्यकतालाई अनुभूति गरेर नेताहरूले प्रस्ताव गर्नुहोला । त्यस्तो स्थितिमा सहमति भएमा म सहमतिको बाधक होइन । प्रतिस्पर्धा भएमा म उभिन तयार छु र प्रतिस्पर्धाबाट जित्नेमा पूर्ण विश्वस्त छु ।

प्रकाशित मिति: मंगलबार, मंसिर ७, २०७८ ११:३८