बेमौसमी वर्षाका कारण जोखिममा पुल: कतै पुरिँदै, कतै बीच नदीमा

A+ A A-

कात्तिक पहिलो साताको बेमौसमी वर्षापछि आएको बाढीका कारण बझाङ सदरमुकाम चैनपुर जोड्ने जयपृथ्वी राजमार्गका पक्की पुल जोखिममा परेका छन् । सेती नदी तथा अन्य खोलामा आएको बाढीले आसपासको जमिन कटान गरेपछि ती पुलहरू जोखिममा परेका हुन् ।

जयपृथ्वी राजमार्ग र सेती लोकमार्ग जोड्ने झनाना पक्की पुल, मौरीबगरमा रहेको तारुगाड पक्की पुल, चैनपुर ताक्लाकोट सडकखण्डमा पर्ने सुनिकोट गाड पक्की पुल, नारुगौडामा र तमैलमा बन्न लागेको निमार्णधिन पक्की पुल जोखिममा परेका हुन् ।

झनाना पुल

जयपृथ्वी राजमार्ग र सेती लोकमार्ग जोड्ने झनाना पुलबाट सवारीसाधन सञ्चालनमा रोक लगाइएको छ । झनाना बजार तर्फको पुलको पिलरमा सेती नदीको बहाबले क्षति पुर्‍याएको थियो । प्राविधिक टोलीले पुलको पिलरमा क्षति पुगेर कमजोर भएकाले ठूला सवारीसाधन नचलाउन सुझाव दिएको बझाङका प्रमुख जिल्ला अधिकारी मोहन अधिकारीले बताए ।

सेती पारीका तीन गाँउपालिका तथा बाजुरा र अछामलाई सडक सञ्जालसँग जोड्न तमैलमा निमार्ण हुन लागेको पक्की पुलको एकातर्फको पूरै भाग बगाएको छ । निर्माण कम्पनीले पुलको ६५ प्रतिशत काम सम्पन्न भएको जनाएको छ । तर, सेती नदीमा आएको बाढीले तमैलतिरको जमिन बगाएर पुललाई नदीको बीचमा पुर्‍याएको छ ।

तमैल पुल

तीन वर्षमा निर्माण सम्पन्न गर्ने गरी २०७३ सालमा ११ करोडमा पुल निर्माणको ठेक्का सम्झौता भएको थियो । ठेकेदारको लापरबाहीका कारण समयमै निर्माण सम्पन्न नभएको पुल सेती नदीले कटान गरेपछि थप अलपत्र परेको छ ।

बाढीले पुलमा पुर्‍याएको क्षतिका विषयमा चैनपुर ताक्लाकोट सडक परियोजनाको उत्तर खण्डले विभागमा पत्र पठाइसकेको छ । पुल निमार्णको कामलाई कसरी निरन्तरता दिने भन्ने विषयमा छलफल गर्न कार्यालय प्रमुख काठमाडौं गइसकेकाले निमार्ण कार्य चाँडै सुरु हुने प्राविधिक विष्णु खातीले बताए ।

त्यस्तै तारुगाड खोलामा आएको बाढीले दुर्गाथली गाँउपालिकाको मुख्य व्यापारिक केन्द्र मौरीबगरको तारुगाड पुल पनि जोखिममा छ । बाढीले ढुंगामाटो थुपारेपछि पुल जोखिममा परेको हो । तारुगाड खोला अहिले पुलको एकापट्टीबाट बगीरहेको छ भने अरू भागमा ढुंगामाटो थुपारेर बाँध जस्तै बनेको छ ।

तारुगाड पुल

अध्ययनबिना डोजर लगाएर ग्रामीण भेगमा सडक खनेकाले वर्षामा माटो र ढुंगा बगाएर यस्तो अवस्था आएको स्थानीयहरू बताउँछन् । तारुगाड खोलाको पुल पनि अध्ययनबिना खनिएका ग्रामिण सडककै कारण जोखिममा परेको उनीहरूको भनाइ छ ।

चैनपुर ताक्लाकोट सडक खण्डमा पर्ने सुनिकोट गाडको पुल पनि जोखिममा छ । सुनिकोट गाडमा आएको बाढीले पुलको वरपरको भू-भाग कमजोर बनाएपछि सो पुल जोखिममा परेको हो ।

त्यस्तै केदारस्युँ गाँउपालिकाको नारुगौडामा निमार्णधिन पक्कीपुल पनि जोखिममा परेको छ । पुलको छेउसम्म सेती नदी पुगीसकेको छ । बेमौसमी वर्षाका कारण नारुगौडामा सडक पनि बगाएको थियो ।

तस्वीरहरूः मकरराज धामी/शिलापत्र

प्रकाशित मिति: सोमबार, मंसिर ६, २०७८ १५:१८