भिडियो देखाउँदै चीनको सरकारी मिडियाले भन्यो, 'पेङ सुआई ठीकठाक छिन्, चाँडै सामुन्ने आउँछिन्'

भिडियो देखाउँदै चीनको सरकारी मिडियाले भन्यो, 'पेङ सुआई ठीकठाक छिन्, चाँडै सामुन्ने आउँछिन्'

A+ A A-

पूर्वउपप्रधानमन्त्री झाङ गाओलीविरुद्ध यौन उत्पीडनको आरोप लगाएपछि नाेभेम्बर पहिलाे सातादेखि टेनिस स्टार पेङ सुआई बेपत्ता छिन् । यसलाई लिएर चीनमाथि अन्तर्राष्ट्रिय दबाब बढेकाे छ । विभिन्न मुलुकका सरकार, टेनिस अधिकारीहरू र खेलाडी र खेलसम्बद्ध संगठन, निकायहरूले पेङ अहिले कस्तो स्थितिमा छिन् भन्नेबारे चिन्ता व्यक्त गरीराखेका छन् ।

यसैबीच त्यहाँकाे राज्यनियन्त्रित मिडियाले भिडियाे फुटेज सार्वजनिक गर्दै पेङ सुरक्षित रहेकाे दाबी गरेकाे छ । स्टेट मिडियाका तर्फबाट साेसल मिडियामा पाेस्ट गरिएकाे भिडियाेमा पेङ चाँडै सबैका सामुन्ने आउने बताइएकाे छ ।

रेस्टुरेन्टमा खिचिएकाे एक भिडियाे छ, जुन शनिबारकाे भएकाे बताइएकाे छ । अर्काे भिडियाे टेनिस प्रतियाेगिताकाे हाे, जसलाई आइतबारकाे भएकाे दाबी गरिएकाे छ ।

रेस्टुरेन्टमा खिचेकाे भनिएकाे भिडियाे ग्लाेबल टाइम्सका सम्पादक हू जिजिनले पाेस्ट गरेका हुन् । उनले दाबी गरेका छन्, पेङ एक रेन्टेरेन्टमा देखिइन् । उनले काेट र टाेपी लगाएकी छन् भने अनुहारमा मास्क लगाएकाे देखिन्छ । अर्काे भिडियाेमा उनी डिनर गरिरहेकी छन् । जिजिनले पेङ सुरक्षित रहेकाे र चाँडै सबैकाे सामु आउने दाबी गरेका छन् । जिजिनका अनुसार पेङ कोच र अन्य साथीहरूसित टेनिसबारे चर्चा गरिरहेकी छन् ।

राजनीतिज्ञ झाङले आफूलाई यौन सम्बन्धका लागि बाध्य पारेको आरोप दुई साताअघि पेङले लगाएकी थिइन् । त्यसयता पेङ बेपत्ता भएकाे भन्दै खेलसम्बद्ध निकायहरू चिन्ता जनाइरहेका छन् ।

के भएकाे थियाे ?

सामाजिक सञ्जालमा ३५ वर्षीया पेङले सेयर गरेको पोस्टअनुसार घटना तीन वर्षअघिको हो । बेइजिङमा झाङ र उनकी पत्नीले टेनिस म्याचको प्रबन्ध मिलाएका थिए । म्याचपछि पेङलाई झाङले आफ्नो घर लिएर गए अनि कोठामा लगेर यौन उत्पीडन गरे ।

त्यो दिनभर आफू डराएको पेङले लेखेकी थिइन् । सात वर्षअघि पनि आफूलाई झाङले यौन सम्बन्धका लागि बाध्य पारेको कुरा पेङले खुलासा गरेकी थिइन् ।

तर, यस्तो पोस्ट सेयर गरेको केही बेरमै हटाइएको थियो । चिनियाँ अधिकारीहरूले देशकी टेनिस खेलाडीले पूर्व सरकारी अधिकारीमाथि लगाएको यौन उत्पीडनको आरोपबारे बहस गर्न रोक लगाएका छन् ।

प्रकाशित मिति: आइतबार, मंसिर ५, २०७८ १५:५३